Skip to Content

دووڕیان.. زیاد ڕەشاد قادر

دووڕیان.. زیاد ڕەشاد قادر

Closed
by ئه‌یلول 24, 2022 General, Poems

پێكه‌وه‌ بووین
سبه‌ینان پێكه‌وه‌ له‌ یه‌ك كوپدا شیرمان ده‌خوارده‌وه‌
ده‌مه‌و نیوه‌ڕۆیان به‌ یه‌ك كه‌وچكه‌ چا
بنكڕى مه‌نجه‌ڵى شیرمان ده‌لێسته‌وه‌
هێوارانیش وێكڕا دانمان بۆ مریشكه‌ شامییه‌كان ڕۆده‌كرد و
به‌رخه‌كانمان ئاو ده‌دا
سه‌ر له‌ به‌یانییه‌كى ته‌مومژاوى منداڵیمان ون كرد و
ئه‌من گه‌وره‌ بووم و ئه‌ویش هه‌روا
ڕۆژگار هات و ڕۆیشت و ئێمه‌ش كه‌وتینه‌ سه‌فه‌ر
سه‌ره‌نجام له‌ دووڕیانێكدا یه‌كدیمان به‌جێهێشت
ئه‌و چووه‌ به‌غدا و له‌ به‌رده‌م ته‌ختى هاڕوونه‌ ڕه‌شید
كه‌مێ چه‌ماوه‌ و شیعرى بۆ به‌نى عه‌بباس و به‌رمه‌كییه‌كان گوت
منیش له‌ به‌سرا
له‌نێو كوخه‌كه‌ى ڕابیعه‌ى عه‌ده‌وى
ده‌رسى عیرفان و ته‌وازوع فێربووم
ئه‌و له‌ سه‌مه‌رقه‌ند له‌به‌رده‌م چلچراى غه‌زنه‌وییه‌كاندا
كردى به‌ به‌زم و چه‌پڵه‌ و خۆبادان
ئه‌زیش له‌ ئه‌سفه‌هان
له‌حزوور چرا كزه‌كه‌ى عومه‌رى خه‌یام
هه‌تا توانیم شه‌رابى شیعرم تێر تێر هه‌ڵقوڕان
ئه‌و له‌و باكووره‌ بووه‌ ده‌رگاوانى میرى حه‌سه‌نكێف
من له‌ مزگه‌فتێ سۆرى بۆتانێ
بوومه‌ میوانىغه‌زه‌ل و قه‌سیده‌ى مه‌لاى جزیرى
تا ده‌هات درزى نێوان من و ئه‌و گه‌وره‌ گه‌وره‌ ده‌بوو
چه‌شنى گه‌وره‌یی
زوهدى رابیعه‌ وپه‌یڤى جزیرى و فه‌لسه‌فه‌ى خه‌یام
تا ده‌هات نێوانى من و ئه‌و ته‌ڵخ و ته‌مومژاوى ده‌بوو
ته‌مومژاویتر
له‌ مێژووى ته‌ڵخ و تاریكى
كۆشكى ڕه‌شید و بازاڕى غه‌زنه‌وییه‌كان و
باغ و باغاتی میرى حه‌سه‌نكێف
نها من
هه‌موو شتێكم هه‌یه‌
دڵته‌نگى و ڕاكه‌ڕاكه‌ و سامان نه‌بێ
نها ئه‌و
هه‌موو شتێكى هه‌یه‌
كتێب و عیشق و ئیمان نه‌بێ

زیاد ڕەشاد قادر
هه‌ولێر

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next