Skip to Content

بیرەوەریيەکانی فەقێیەکی گومڕا(53).. شەماڵ بارەوانی

بیرەوەریيەکانی فەقێیەکی گومڕا(53).. شەماڵ بارەوانی

Closed
by ئازار 19, 2023 General, Opinion

دەمی خۆت بگرە، دەنا بەشەق دەتکەمە دەرەوە!

ئەزیزان بۆیە کاتێک دەڵێم سەلەفیگەرا و ئیسلامی سیاسی تاکڕەهەند و تۆتالیتار بیروباوەڕن و دەسەڵاتیان هەبێت، بە شەق و پێلەقە و چەقۆ و سەربڕین ناچاری چوونە ژێر بار و بڕیار و ئەحکام و دۆگم و ئیدەلۆژیا و بۆچوونەکانی خۆیانمان دەکەن، لەخۆڕا نییە وادەڵێم.

کاکە گیان ئەوان بیروباوەڕەکەیان وایە. ئەوە پرەنسیپ و قەناعەت و ئەقیدە و مەبدەئیانە. ئەوان باوەڕیان بە پلۆرالیەتی ئایینی و سیاسی و کۆمەڵایەتی نییە و ناتوانن گوێ لە بۆچوونی جیاواز بگرن و دید و ئاراستەی جیاواز قبوڵ کەن.

سەیری مەلا لەتیف سەلەفی بکەن، لەناوجەرگەی دەوڵەتێکی سیکۆلاریزمدا، لە بەریتانیای عەلمانیدا، ڕای جیاواز بە شەق دەکاتە دەرەوە و هێرش دەکاتە سەر سیکۆلاریزم. ئای چەند گلەییم لەو جۆرە سیکۆلاریزمە گاڵتەجاڕە هەیە، وەک چۆن ئازادی بە هۆمۆسێکچواڵێک و لیسبێک و ترانزجێندەرێک دەدات بەو پەڕی ئازادی بژین(کە مافێکی سروشتی خۆیانە و خێر و سەدەقەیەک نییە پێیان دەبەخشێت و کەس بۆی نییە ئەو مافەیان لێ زەوت کات، تا دووبارە وەکو منەتێک پێیان ببەخشێتەوە) هەمان شێوە دەرفەت بە مەلا لەتیفێکی سەلەفیزم و فێندەمێنتالیست و لەهەمان کاتدا داعش بیرێکیش دەدات، کە بە کامی دڵی خۆیان و بەوپەڕی ئازادییەوە بانگەشە بۆ ئایدیۆلۆژیا ناتۆلێرانس و بیرە دەمارگیر و مەزهەبە پڕ لە ڕق و نا مرۆڤانەکەی خۆیان بکەن!

جا جەنابی بابای سەلەفیزم، هێشتا نا قایلە و گلەیی لەو عەلمانییەتە موجامەلەچی و ناحاڵی و ساویلکەیەیش دەکات. تۆ لەوە گەڕێ مەلا لەتیف دەسەڵاتی هەبێت لەدەوڵەتە سیوکراتی و فیقهییەکەی مەلای سەلەفیزمدا، خۆی وتەنی(دەرفەت نادات یەک ئافرەت بێ لەچک و نا باڵاپۆش بێت. لە کەناڵی Nrt خۆم پێش چەندساڵێک، لەدیدارێکدا ئەوم بینی کە وای گوت)، دەبێت هەمووان وەکو دەوڵەتەکەی ئەبوبەکری بەغدادی، یەک شێوە جلوبەرگ و پۆشاکی شەرعی و بە پێوەر و قیاسی بابای سەلەفیزم هەڵبژێرن. گەرنا بە شەق و تێهەڵدان و بە زۆری و بە هەڕەشەی چەقۆ و سەربڕین ناچاریان دەکات.

تۆ لەوەش گەڕێ ئێمەی سیکۆلاریزم و لیبڕاڵی و چەپ و ئێزدی و زەردەشتی و جوو و مەسیحی و بوودی و ئەویتری نا موسڵمان ، کە یەک ڕۆژ ناتوانین لەو شوێن و دەوڵەتە بژین، کەئەو و هاوبیرەکانی و ئیسلامی سیاسی تێیدا بالادەست بن و حوکم بکەن، دەمان دەنە بەر شەق و پێلەقە و بە تاوانی لادان لە ئایین، حوکمی هەرتەقەیی و زندیکبوون و کافربوونمان دەدەن و خوێنمان حەڵاڵ دەکەن و وەکو بەرخ لە گۆڕەپانی گشتی و لەبەردەم هەموواندا وەک بەرخێک سەرمان دەبڕن. بەڵکو ئەو سەلەفیزم و ئیسلامگەرایانەش، ئەو مەزهەب و بیر و بۆچوونە جیاوازانەش، کەسەر بەهەمان ئایینەکەی ئەون و لەگەڵ بیرکردنەوەی فێندەمێنتالیستیانەی خۆیان و هاوبیرەکانیان ناگونجێن و خیلافی جوزئیان هەیە، بەشەق دەیانکەنە دەرەوە، یان زیندانییان دەکەن، یان سەریان دەبڕن.

ئەوانەی دواجار لەگەڵ مەلا عەبدوللەتیف سەلەفی و هاوبیرانی، سەر بە یەک ئایینن و لە بنەمادا هەموویان یەکن و دەسەڵات بکەوێتە دەستی هەرکامەیان هەمووی داعشە.

بینیمان پار، لە ڤیدیۆیەکدا مەلا عەبدول لەتیف سەلەفی، ئەو ڤیدۆیەی کە لە زۆرێک لەپەیج و گرووپ و ئەکاونتەکانی سۆسیال میدیا بڵاو ببووەوە. ڤیدیۆکە لە بەریتانیایە، هی ئەو سەردانەی مەلا لەتیف بووە. وەک خۆی دەڵێت بۆ کاری (دەعوە) چووەتە ئەو وڵاتە، تابەریتانیە کافر و بێ دینەکان، بەراز خۆر و سەڵیبی و عەلمانییە شەرابخۆرەکان، بێنێتەسەر ڕێگای ڕاست و ئاشنای ئەقیدە و ئایدیۆلۆژیا و دۆگمەکانی سەلەفیزمیان بکات و سەبارەت بە چێژەکانی حەفتاو دوو حۆری بەهەشت بۆیان بدوێت.

بابای سەلەفیزم لەو ڤیدیۆیەی بڵاو بووتەوە، دەبێتە مشتومڕی لەگەڵ کۆمەڵێک لە فێندەمێنتالیستی تری ئامادەبووی موحازەرەکە، دیقەتم دا و گوتم لەوانەیە ئەو هەراوهۆریا و هەڕەشەی شەق و شەڕە دەمەیە، بە دڵنیاییەوە لەسەر چوونەسەرمانگ و پرسی ڕۆبۆت و چۆنیەتی دروستکردنی ئایفۆنی تازە و نەشتەرگەری چاندنەوەی دڵ و گواستنەوەی سەری مرۆڤێک بۆ یەکێکی تر و کۆمەڵەک بابەتی تر وەکو: تەکنەلۆژیا و گرنگی وانەی فەلسەفە و یەکسانی جێندەری لە پەیمانگا و زانکۆکانی مەریخ و ناز و نیعمەتەکانی دەوڵەتانی سیکۆلاریزم و بابەتی ناپاکیکردن لە شۆڕش لەناو ڕۆمانی(مەزرای ئاژەڵان)ی جۆرج ئۆروێڵ و مەسەلەی دارولکفر و بەرزی و نزمی پلەکانی ئیمان و دەستکاری کردنی کەشوهەوا و جیناتەکانی مرۆڤ و کۆپیکردنی مناڵ و سوودەکانی گەڕانەوە بۆ سەردەمی ئەشکەوت و حیکمەتەکانی کارنەکردن بە ئەقڵ و مەترسییەکانی گڵۆباڵیزەیشن و پێشکەوتنی زانستی و شۆڕشی تەکنەلۆژیا و هەروەها لەسەر ئایندەی تارەتگرتن بە سێ بەرد و لێستنەوەی پەنجەکان لە کاتی نانخواردن و فەزلی چوونە تەوالێت بە پێی چەپە و هاتنەدەرەوە بەڕاست و کۆمەڵێک تەوەری تری لەو شێوەیە. بەهەرحاڵ دیاربوو هەندەک لە ئامادەبووان و برایانی سەلەفیمان خوا هەمیشە پشت و پەنایان بێت و بیانپارێزێت و پایەداریان بکات، هەندەک جیاوازی ڕاوبۆچونیان هەبوو لەنێو خۆیاندا، کە دژ و پێچەوانەبوون. جا لە دەرەنجامی ئەو ڕا جیاوازییە، لە نکاوڕا دەبێتە دەنگەدەنگ و شەڕە قسە و هەڕەشەی شەق تێهەڵدان. مەلا لەتیفی سەلەفیش لا ئیرادییەن سەر و دڵی دەگیرێت و قیچەک هەڵدەچێت و دەڵێت(ئا ئەو بێ ئەدەبانە بكەنە درەوە! … ئەوانە نایانەوێت فێربن…). هەر لەو گەرمەی دەنگ هەڵبڕین و قسە بەیەکتری گوتنەدا، سەلەفییەکی تری لایەنگری مەلا لەتیف سەلەفی و برای دینیمان تووڕە دەبێت و دەگوڕێنێت و بەسەلەفیەکی تر و دەڵێت: (دەمی خۆت بگرە، دەنا بە شەق دەتکەمە دەرەوە). براکانم لەمیانی ئەو شەڕە دەم و هەڕەشەی شەق تێهەڵدانە، بۆمان دەردەکەوێت کە ئێرە(بەریتانیا) دەوڵەتی عەلمانییە و تەنها مەجالی ئەوە هەیە و ئەوەی لە دەستیان دێت، تەنها جوێن و چاوسوورکردنەوە و هەڕەشەی شەق تێهەڵدان و دەرکردنە. کە دەسەڵاتیان بوو و دەوڵەت دەوڵەتی ئایینی بوو و خۆیان حاکم و هەموو شتێک بوون، ئەوکات هەڕەشەی چەقۆ و سەر بڕینە.

Previous
Next
Kurdish