دیدار لەگەڵ شاعیر ڕۆستەم خامۆش.. هەڤپەیڤین- كامەران حاجی ئەلیاس
Closed
شاعیر ڕۆستەم خامۆش: ئەدەبی منداڵان بریتییە لەو نووسینانەی، كە بە پێی زمان و تێگەیشتن و تەمەن و لایەنی دەروونزانیی منداڵان دەنووسرێن
شاعیر رۆستم خامۆش: ئیشكردنم لە دنیای منداڵان، واتا گەل و نەتەوە و نیشتمانەكەم خۆشدەوێن
نووسەر و شاعیری بواری منداڵان ڕۆستەم جەلیل ئیبراهیم مەحمود ناسراو بە( ڕۆستەم خامۆش)یە كێكە لەو شاعیرانانەی كە خزمەتێكی زۆری بواری ئەدەبی منداڵان كردوە هەرچەندە خامۆش لەسەرەتای دەستپێكی لە ساڵی 1996 بە شیعرنووسین بەگشتی دەستپێكردە ،بەڵام لە ساڵی 2000دا خۆی یەك لایی كردوە بەنووسین لە شیعری منداڵان..خاوەنی چەندین كتێبی شیعرییە لەو بوارەدا هەندێك لە شیعرەكانی لەنێو میتۆدی نێوقوتابخانەكان دەخوێندرێن.. ئێمەش بەچەند پرسیارێك لە نزیكەوە بەسەر كردوە..
هەڤپەیڤین- كامەران حاجی ئەلیاس
*سەرەتا پێمان باشە، باس لەچۆنیەتی ئاشنا بوونت بە ئەدەبی منداڵان بكەیت و چۆن بوو ئاوڕت لەو بوارە دایەوە؟
- بەر لەوەی شیعر بۆ منداڵان بنووسم، شیعرم بۆ گەورەساڵان دەنووسی، لە ساڵی (١٩٩٦)دا، لە تەمەنی (١٦) ساڵیدا، دەستم بە شیعر نووسین كرد و هەستم بە بوونی ئەو بەهرەیە كرد، بەڵام دواتر لە ساڵی (٢٠٠٠)دا دەستم بە نووسینی شیعر بۆ منداڵان كرد و یەكەم شیعرم بە ناوی (باڵندەیەكی بەندكراو) بوو، واتە: لە ساڵی (٢٠٠٠)دا نووسیم، بەڵام درەنگ بڵاوم كردەوە. دوای (١٣) ساڵ، لە ساڵی (٢٠١٣)دا لە ژمارە (٢١٣)ی گۆڤاری جگەرگۆشەكان بڵاوكرایەوە.
ڕەنگە ئەم خاڵانە هۆكاری ئاشنا بوونی من بن بۆ ئاوڕدانەوەم لە شیعر و ئەدەبی منداڵان.
1- خۆشەویستییەكی زۆرم بۆ منداڵ، وای كرد شیعر بۆ منداڵان بنووسم و لە ڕێی قەڵەمەكەمەوە خزمەت بە ئەدەبیاتی منداڵانی كورد بكەم.
2-ئاوڕدانەوەم لە ئەدەبی منداڵان، واتە: ڕوانینم بۆ داهاتووی گەشی منداڵان هەیە.
3- نووسین بۆ منداڵان، نیشانەی دڵ پڕ ئومێدیی منە بۆ جوانتر كردنی ژیانی منداڵان لە ڕێی ئەدەبیاتەوە
4-پەروەردە و دڵخۆشكردنی منداڵان لە ڕێی شیعری تایبەت بە خۆیانەوە، خزمەتێكە و شانازیی پێوە دەكەم.
5-ئیشكردنم لە دنیای منداڵان، واتا: گەل و نەتەوە و نیشتمانەكەم خۆشدەوێن.
*پێمان خۆشە یەكەم شیعرت كە بۆ منداڵانت نووسیوە، بیخەیتە بەر دیدەی خوێنەران؟ - بە خۆشحاڵیەوە، منیش پێم خۆشە خوێنەرانی ئەم دیمانەیە، یەكەم شیعرم بخوێننەوە، كە لە ساڵی (٢٠٠٠) دا بۆ منداڵانم نووسیوە.
(باڵندەیەكی بەندكراو)
ئــەو بـاڵـنــدەی بـەنـدكـراوە
مــافـــی ژیـنـی لـێ خـوراوە
هــەمـــوو سـاتـێ دەنـاڵێنـێ
بۆ سەربەستی دەجریوێنێ
دەڵـێ: ئێـســتـا نـیـگــەرانــم
دوور لە ئـاشنا و گوڵستانم
بــە ئـــاواتــم، كـــە بێـمــەوە
لــە ســـەر چـڵـدا بنیشـمـەوە
بــە ســۆزەوە لــە نـاخـی دڵ
تێر بخوێنـم بـۆ جوانـی گوڵ
خـۆشـــە فـڕیــن بــە ئــازادی
هــەردەم بــژی بـە دڵـشـادی.
*چیرۆكی نازناوی (خامۆش) بۆچی دەگەڕێتەوە؟ - وەك دەزانین شاعیرانی كورد، لە سەردەمی كلاسیك و نوێ، یان ناوی خۆیان گۆڕیوە و ناوێكی دیكەیان بۆ خۆیان داناوە، یان نازناوێكیان لەگەڵ ناوەكەیان داناوە. منیش پێم خۆشبوو نازناوێك بۆ خۆم دابنێم، بۆیە لە ساڵی (٢٠٠٠)وە نازناوی (خامۆش)م بۆ خۆم هەڵبژاردووە و بەناوی “ڕۆستەم خامۆش” بەرهەمەكانم بڵاو دەكەمەوە. ڕەنگە وشەی (خامۆش) زۆر واتای هەبێ، بەڵام من بەو واتایە وەرمگرت، كە وشەی خامۆش، واتا: (بێدەنگ، هێمن، ئارام، كپ).
*چۆن پێناسەی ئەدەبیاتی منداڵان دەكەیت؟ - ڕەنگە ئاسان نەبێ بتوانرێ پێناسەی شیعر و ئەدەبی منداڵان بكرێ، چونكە ئەدەب، بەهرە و ئەزموونە، وە بەرهەمی بیركردنەوە و هزر و خەیاڵی كەسی شاعیرە، بۆیە پێم وایە تا ئێستا چەندان پێناسە بۆ ئەدەبیاتی منداڵان كراوە، هەرچەندە زۆربەی پێناسەكان بەشێك لە ڕاستییان تێدایە، بۆیە من، یەكێ لەو پێناسانەم بەدڵە و پێم وایە ڕاستە، ئەویش پێناسەكەی «ماریا نیكۆڵا»یە، كە دەڵێت: ((ئەدەبی منداڵان، ئەو ئەدەبەیە كە لەلایەن كەسانی شارەزای جیهانی منداڵانەوە نووسراوە و بەرهەمهێنراوە و بڵاوكراوەتەوە، كە خوێنەرە سەرەكییەكەی منداڵانن)).
یان دەتوانین بڵێین هەموو ئەو دەقانەی، وەك: (شیعر، چیرۆك، ئۆپەرێت، شانۆ و ڕۆمان)، كە بە زمانی سادە و ئاسانی منداڵان نووسراون، دەچنە نێو بازنەی ئەدەبیاتی منداڵانەوە، دیارە هەموو ژانرەكان مەرج و تایبەتمەندییان ئەوەیە كە بە زمانی منداڵ نووسرا بن، بێگومان شاعیر و نووسەری شارەزای ئەدەبی منداڵان دەزانێ چیی و چۆن بۆ منداڵان بنووسێ، بۆیە ئەدەبی منداڵان بریتییە لەو نووسینانەی، كە بە پێی زمان و تێگەیشتن و تەمەن و لایەنی دەروونزانیی منداڵان دەنووسرێن.
*مێژووی ئەدەبی منداڵان لە كوردستان بۆ كەی دەگەڕێتەوە، ئەو نووسەرانە كامەن كە بەپێشڕەوانی ئەدەبی منداڵان دەناسرێن؟ - ئەوەی تا ئێستا دیارە و لێكۆڵینەوەی لەبارەوە كراوە و ساغ كراوەتەو، كە شیعری بە شێوەی فەرهەنگ بۆ منداڵان نووسیوە و ئاوڕی لە زارۆكان داوەتەوە، شاعیری ناسراو “ئەحمەدی خانی” (١٦٥٠–١٧٠٧)، وەك یەكەم شاعیری كورد، ئەژمار دەكرێ، كە ئەویش فەرهەنگی «نووبهارا بچووكان»ـە و بەرهەمی ساڵی (١٦٨٣)ی زایینیە و بە شیعر بۆ فەقێ و قوتابیانی كوردی نووسیوە و مەبەستی بووە فێری زمانی عەرەبییان بكات، كە بێگومان بۆ ئەو كات پێویست و گرنگ بووە، كە “ئەحمەدی خانی” بیری لە منداڵ كردووەتەوە و شیعری بۆ نووسیون.
دواتر “شێخ مارفی نۆدێ” (١٧٥٣ – ١٨٣٨) هەر لەسەر شێوازی (نووبهارا بچووكان)، لە ساڵی (١٧٩٥) كتێبی فەرهەنگی (ئەحمەدی) داناوە، كە بۆ (كاك ئەحمەدی شێخ)ی كوڕی نووسیوە، كە تەمەنی (٣) ساڵان بووە، بەمەبەستی فێركردنی زمانی عەرەبی، دواتر ئەو فەرهەنگە لە ساڵی (١٩٢٦) لە چاپخانەی (زاری كرمانجی) لە ڕەواندز چاپكراوە.
یەكێكی دیكە لەو شاعیرانەی، كە ئاوڕی لە شیعری منداڵان داوەتەوە، «مەلا خدری ڕواری»یە. كە لە (سەدەی هەژدە ژیاوە)، ((مەلا خدری ڕواری، نامیلكەی (ڕۆڵە بزانی)بە شیعر داناوە و بە دیالێكتی (هەورامی)نووسیویەتی.
وەك “سدیق بۆرەكەیی”، دەڵێ: وا دیارە بۆ كوڕەكەی هۆنیوەتەوە و لە قاڵبێكی ڕێك و پێك و لە ئەوپەڕی سادەیی و ڕەوانیدا دایناوە و بە چەشنێكی جوان، مەبەستەكانی لە چوارچێوەی هۆنراوەدا جێكردووەتەوە، بە بێ ئەوەی ناڕێكییان تیا هەبێ
.((مەلاكانی كوردەواری (ڕۆڵە بزانی)یان فێری منداڵ و قوتابیانی خۆیان دەكرد))
هەروەها كەسانی دیكەش هەبوون كە كتێبی فەرهەنگ و فێركارییان نووسیوە، وەك «عەلی تەرەماخی» كتێبێكی نووسیوە بەناوی (دەستوری زمانی عەرەبی بە كوردی). ((ئەم كتێبە لەلایەن دكتۆر مارف خەزنەدارەوە ساغكراوەتەوە و پێشەكی بۆ نووسراوە، لە ساڵی ١٩٧١ لە بەغدا چاپكراوە)).
مامۆستا مەلا «عەبدولكەریمی مودەڕیس»یش كێبێكی فەرهەنگی داناوە بە ناوی (دوو ڕشتە)، لە ساڵی ١٩٧٠ لە بەغدا چاپكراوە.
دوای فەرهەنگ نووسین چەند شاعیرێكی دیكە هاتنە مەیدان و كۆمەڵێك شیعری جیاواز و هەمە جۆریان بۆ منداڵان نووسی، دیارترینیان (زێوەر، بێكەس و گۆران) بوون، دواتر هەندێ شاعیری دیكەش خزمەتی ئەو بوارەیان كرد و شیعری منداڵان لە باشووری كوردستان هەنگاوێكی باش چووە پێش، ئەو شاعیرانەش ئەمانە بوون: (مەدحەت بێخەو، ع.ع. شەونم، عوسمان محەمەد هەورامی، كاكەی فەلاح، فەرەیدون عەلی ئەمین، عەزیز مەلای ڕەش، لەتیف هەڵمەت)، وە شاعیری دیكەش هەبوون، بەڵام ئەوانە ناسراو و دیارترن، كە توانیویانە خزمەتێك بە ئەدەبی منداڵانی كورد بكەن، دەكرێ بڵێین بە هەوڵ و تێكۆشان و خەمخۆری و دڵسۆزیی هەموو شاعیران و نووسەرانی ئەدەبی منداڵان، ئەو بوارە بەرەوپێشتر چوو. - تایبەتمەندیی شیعری منداڵان چییە؟
- بەڕای خۆم و بە دید و بۆچوونی شارەزایانی ئەدەبی منداڵان، بە تایبەتی ژانری شیعر، كە ئاماژەیان پێكردووە و دەڵێن: تایبەتمەندییەكانی شیعری منداڵان، پێویستە ئەو مەرجانەی تێدابێ، كە بریتین لە:
1- شیعرەكە بە زمانێكی زۆر سادە و ساكار نووسرا بێت و ڕەنگدانەوەی زمانی منداڵی پێوە دیار بێت.
2- هەتا بكرێ ڕەگەزی خەیاڵی تێدا بێت، چونكە خەیاڵ بیركردنەوەی منداڵ بەهێز دەكات.
3-لە شیعری منداڵان نابێ وشەی قورس و ئاڵۆز و هێمای تێدا بێت، چونكە دەبێ تێكستی منداڵان نزیك بێ لە هزر و تێگەیشتنی خودی خۆیان، كەواتە دەبێ شاعیر تەواو شارەزا بێ لە زمانی منداڵ
4- پێویستە دەقەكە لە دونیای منداڵەوە هەڵقوڵا بێت و ناكرێ و نابێ داخوازیی گەورەساڵانی تێدا تێكەڵ بكرێ.
5- منداڵ حەز و ئارەزووەكانی خۆی تێدا بدۆزێتەوە و لە كاتی خوێندنەوەی، یان گوێ لێگرتنی، دڵی پێخۆش بێت.
6- شیعرەكە ئاسان و سەر بە جیهانی منداڵ بێت، واتە منداڵ هەر زوو لە شیعرەكە تێبگات.
7- پەیڤەكانی ناسك و جوان و مۆسیقی بن، واتە شاعیر بە لێزانیی و زیرەكییەوە وشەكان لە شوێنی پێویستدا جێ بكاتەوە و بزانێ لە كوێیان دادەنێ .
8- ناوەڕۆكی شیعرەكە هەڵگری پەیامێك بێ و مانادار و واتای هەبێ و زانیاری بەخش بێت .
9- شیعرەكە سوودبەخش بێ، یان منداڵ هانبدات بۆ بیركردنەوە و داهێنان، یاخود لایەنی گەشبینی و ئومێد و هیوا بۆ سەركەوتن لە ژیان، بەشێكی سەرەكیی بێ لە نێو دەقە شیعری منداڵان.
11- شیعری منداڵان، دەبێ بڕگەكانی كورت بن، بۆ ئەوەی لە كاتی خوێندنەوەدا منداڵ ماندوو نەكات و بە ئاسانی و بە ئاوازەوە بیخوێنێتەوە و ئەگەر ویستی زوو ئەزبەری بكات. - چۆن دەڕوانیتە شیعر لە كتێبی پڕۆگرامی خوێندن، ئایا تۆ شیعرت لە پڕۆگرامی خوێندندا هەیە؟
- هەبوونی شیعر، وەكو وانەیەك لە كتێبی پڕۆگرامی خوێندندا، زۆر گرنگە و جێی بایەخە، هەموومان زۆربەی ئەو وانانەی كە شیعر بوون، هێشتا لە یادگەمان ماون، كەواتە وانەی شیعر زۆر پێویست و گرنگە بۆ پەروەردە و فێركردن، دیارە پێشتر كۆمەڵێك شیعر دانراون و دەخوێندران، هەندێ شیعر تەواو سەر بە ئەدەبی منداڵان بوون، وە هەندێكی دیكەشیان پەیوەندییان بە ئەدەبی منداڵانەوە نەبووە و بۆ پەروەردە و فێركردن سوودیان نەبووە، بەڵام ماوەی چەند ساڵێكە دەستكراوە بە گۆڕانكاریی، كە كۆمەڵێك شیعری نوێیان داناوە و بەشێك لەو شیعرانەی پێشتر لابراون، بەڵام لەو شیعرە نوێیانەی كە دانراون، زیاتر لەبارەی پێكەوەژیان و مرۆڤدۆستی و هەستی نیشتمانیی و ژینگەن، یان ئەو جۆرە شیعرانەن كە لەگەڵ پەروەردەی سەردەم گونجاون .
بەڵێ شیعرێكم كە بە زاراوەی كرمانجی سەروو (بادینی) نووسیومە، وەكو وانە لە كتێبی خوێندنی كوردی – قۆناغی بنەڕەتی – پۆلی دووەم – وەرزی یەكەم دەخوێندرێ .
پێم خۆشە شیعرەكە بخەمە بەر چاوی خوێنەرانی خۆشەویست.
(وارێ مە)
وارێ مـە گەلەك جوانە
نـاڤـێ وێ كـوردسـتـانـە
وارێ مــە جــهــێ ژیـنـە
قەشـەنگ و پـڕ ئـەڤـیـنـە
وارێ مــە بـــاخێ گـــولا
خــۆشــتــەڤـــی لبــەر دلا
وارێ مــە زۆر شیریـنـە
هــەمـــی دەمــا ڕەنـگیـنـە.
*نووسین بۆ منداڵانی كوردستان، دەكرێ تایبەتمەندیی خۆی هەبێ، یان لە هەموو وڵاتەكان وەكو یەكن؟ - كە دەگوترێ منداڵ، لە هەر شوێنێكی ئەم جیهانە بن، پێویستە ماف و پەروەردە كردنیان بە یەكسانی بۆ دەستەبەر بكرێ، كار بكرێ بۆ بەختەوەریی و دڵخۆش بوونیان. لە نووسینیشدا ئەوەی بۆیان دەنووسرێ، واچاكە ڕەچاوی ئەوە بكرێ كە ئەو دەقە بۆ هەموو منداڵانی دنیا نووسراوە، چونكە ئەدەب و پەروەردە و ماف و دڵخۆشكردنی منداڵ بووە بە مەبەست و ئامانجی نووسین، بەڵام دەبێ ئەوە بزانین، چونكە گەورەكان بۆ منداڵان دەنووسن، بێگومان ڕەنگدانەوەی ئاین و كەلتوور و شارستانیەت و جوگرافیای ئەو وڵاتەی پێوە دیار دەبێ، بێگومان بۆ ئێمەی كوردیش هەر ڕاستە، چونكە ئاین و كەلتووری خۆمان هەیە، بۆیە نووسینی هەندێ زمانی نەتەوەی دیكە، ڕەنگە سوودی بۆ منداڵی كورد نەبێ .
بەڵام باشترین و جوانترین نووسین بۆ منداڵان، پێویستە خاڵی هاوبەشی تێدابێ، بۆ ئەوەی ببێتە نووسینێكی جیهانیی بۆ منداڵان. - پێت وایە لە ئەدەبی منداڵانی كورد، دەقی جوان و نوێ هەبن، كە بگەنە ئاستی تێكستی جیهانی؟
- كە سەیری مێژووی ئەدەبی منداڵانی كورد دەكەین، كۆمەڵێك دەقی جوان دەكەونە پێش چاو، بەڵام زۆر لەوە زیاتر دەقی كرچ و كاڵ و دوور لە خەیاڵ و زمانی منداڵ بڵاوكراونەتەوە، وە هەندێ دەقی سواو و جوینەوەی پێش و خۆیان و هاوسەردەمەكەشیان ڕێژەكەی بەرزە، بەڵام جێی ئومێدە كە ئەدەبی منداڵانی كورد لە سایەی چەند قەڵەمێكی دڵسۆز و هەندێ كەسی شارەزای ئەو بوارە، ڕووەو لوتكە هەنگاو بنێ، بەڵێ كۆمەڵێك شیعری جوان و ناسك و نوێ بۆ منداڵان نووسراون و بڵاوكراونەتەوە، كە لە ئاستێكی بەرزی ئەدەبیدان، دەكرێ ببێتە جێی دڵخۆشی و شانازیی بۆ شاعیر و نووسەران و دڵسۆزانی ئەدەبی منداڵانی كورد .
- بوونی ئەو تەكنەلۆژیایەی سەردەم وەكو ئایپاد و مۆبایل… تاچەند كاریگەریی ئەرێنی و نەرێنی لەسەر منداڵ هەبووە؟
- كاتێك سەیری تەكنەلۆژیا و ئامێرە زیرەكەكان دەكەین، دەبینین زانست و پێشكەوتن زۆر خێرایە و هەنگاوەكانی بەرەو لوتكە دەچن، كە جێی دڵخۆشی و خۆشحاڵی مرۆڤایەتییە، بەڵام دەبێ ئەوەش بزانین كە لایەنی چاك و خراپی هەیە، بۆیە پێویستە ژیرانە مامەڵەی لەگەڵدا بكرێ، بە تایبەتی توێژی منداڵان پێویستە زۆر بە وریاییەوە بە كاری بهێنن، وا چاكە لە ژێرچاودێری دایك و باوكدا بە كاری بهێنن و لایەنی چاكە و خراپەی تەكنەلۆژیایان بۆ ڕوونبكرێتەوە، بە هۆی ئامێرە زیرەكەكان و تۆڕی بەرفراوانی ئینتەرنێت، تۆڕەكۆمەڵایەتییەكانیش زۆرن و هێشتا هەر زیاتریش دەبن، وەك دەبینین گەورە و بچووك بەكاری دێنن، بەڵام بۆ منداڵان پێویستە سنووردار بێت و كەمتر بە كاری بێنن، چونكە ئەزموونی ژیانیان كەمترە و لە هەموو ڕوویەكەوە تەواو پێنەگەیشتوون، وە لە ڕووی تەندرووستیشەوە زیانی هەیە، وەك دەركەوتووە ئەو منداڵانەی زۆر هۆگری ئامێرە زیرەكەكان و تۆڕەكۆمەڵایەتییەكانن، زیان بە چاویان گەیشتووە، بۆیە وا باشترە كە ئەوەندە پێیەوە سەرقاڵ نەبن و دایكان و باوكان، كتێب و گۆڤاری تایبەت بە خۆیان بۆ دابین بكەن، كە بێگومان سوودی زۆر زیاترە.
- دوا وتەت چییە؟
- لە كۆتاییدا زۆر سوپاستان دەكەم و خۆشحاڵ بووم بۆ ئەم بەسەر كردنەوەیە، وە دڵخۆش بووم كە ئەدەبیاتی منداڵان جێی بایەخ و گرنگ بوو لای ئێوە، هیوادارم كاری جددی و باشتر بكرێ بۆ بەرەوپێش بردنی ئەدەبیاتی منداڵانی كورد، لەگەڵ سڵاو و ڕێزم بۆ خوێنەرانی ئازیز.
ڕۆستەم خامۆش، شاعیر و نووسەری ئەدەبی منداڵان لە چەند دێرێك دا
- رۆستەم خامۆش لە ساڵی (١٩٨٠)ی زایینی لە گوندی (كانی كوردە)ی سەر بە ناحیەی ئاشتی، قەزای كۆیە، پارێزگای هەولێر، لە دایك بووە، ئێستا لە شاری هەولێر نیشتەجێیە.
- لە ساڵی (١٩٩٦)ی دەستی بە شیعر نووسین كردووە بۆ گەورەساڵان، بەڵام لە ساڵی (٢٠٠٠)دا زیاتر ڕووی لە ئەدەبی منداڵان كردووە و یەكەم شیعری بەناونیشانی (باڵندەیەكی بەندكراو) بۆ منداڵان نووسیوە.
• تا ئێستا لە چەندین ڕۆژنامە و گۆڤار و بڵاوكراوەی كاغەزیی و ئەلیكترۆنی و ماڵپەڕ و تۆڕەكۆمەڵایەتییەكان، شیعر و بابەتەكانی بڵاوكراونەتەوە، كە بریتین، لە:
(١٧ ڕۆژنامە و ٣٧ گۆڤار و ٣٧ ماڵپەڕ و ٨ بڵاوكراوەی كاغەزیی و ئەلیكترۆنی).
• چەندان شیعری، كە بۆ گەورەساڵان و منداڵان نووسیون، ئاوازیان بۆ دانراوە و لەلایەن هونەرمەندانەوە كراون بە سروود و گۆرانی.
• شیعرێكی ڕۆستەم خامۆش بەناونیشانی (وارێ مە)، كە بە زاراوەی كرمانجی سەروو(بادینی) نووسیویەتی، لە كتێبی خوێندنی كوردی- قۆناغی بنەڕەتی- پۆلی دووەم- وەرزی یەكەم، دانراوە و دەخوێندرێ.
• تا ئێستا (٨) كتێبی چاپكردووە، كە بریتین لە:
١- داری هیوا، شیعر بۆ منداڵان، ساڵی 2017، هەولێر.
٢- گوڵی ئاوات، شیعر بۆ منداڵان، ساڵی 2019، هەولێر.
٣- ژینگەی كوردستان، شیعر بۆ منداڵان، كۆكردنەوە و ئامادەكردن، ساڵی 2020، هەولێر.
٤- دۆستی ژینگەم، هۆنراوەی ژینگەیی بۆ منداڵان، ساڵی 2021، سلێمانی.
٥- باخی ئومێد، شیعر بۆ منداڵان، ساڵی 2021، سلێمانی.
٦- هاوڕێی پێنووس، شیعر بۆ منداڵان، ساڵی 2021، هەولێر.
٧- ئەدەب و هونەری منداڵان، چاوپێكەوتن لەبارەی ئەدەب و هونەری منداڵان، بە هاوبەشی لەگەڵ د. هاوژین سڵیوە، ساڵی 2022، كۆیە.
٨- دیداری ئەدەبی منداڵان، چەند توێژینەوەیەكی ئەدەبیی و ڕەخنەیی، بە هاوبەشی لەگەڵ چەند نووسەرێك، ساڵی 2022، سلێمانی.
• لە ڕێكەوتی ٤ی ٩ی ٢٠٢٢، بە توێژینەوەیەك، بەناونیشانی (ڕۆڵی ڕاگەیاندن، لە ئەدەبیات و ڕۆشنبیریی منداڵاندا) بەشداری لە دیداری ئەدەبی منداڵان كردووە لە شاری سلێمانی.
• لە ڕێكەوتی ١٥ی ١٠ی ٢٠٢٢، بە پێشنیار و ڕاسپاردەیەكی (١٥) خاڵیی بەشداری لە یەكەمین كۆڕبەندی پەروەردەیی و ئەدەبی هاچەرخی منداڵان كردووە لە شاری سلێمانی.
• لەپای نووسینی بۆ منداڵان بە تایبەتیی و بە گشتی، وەك شاعیر و نووسەر، یان وەك هاوكاریكردنی گۆڤارەكان بە نووسینەكانی، زیاتر لە (٢٠) خەڵاتی ڕێزلێنان و سوپاسنامەی پێ بەخشراوە، سێ لەوانە بریتین لە:
١- ئەنجومەنی پارێزگای هەولێر، ساڵی ٢٠١٨
٢- دەستەی دەسپاكی هەرێمی كوردستان، ساڵی ٢٠١٩
٣- یەكێتیی نووسەرانی كورد – لقی سلێمانی، ساڵی ٢٠٢٢
