ئەو ساتە وەختە بوو.. شیعری نەوزاد بەندی
تەنها جارێ
خولیام پاشایەتیی بوو بێ ،
ئەو جارە بوو ،
لە پڕ پێت ووتم : پاشاکەم !
لەو کاتەوە ،
بۆ تاج و تەختێ ئەگەڕێم ،
لەوێوە تۆ تەماشا کەم ..
هەر دوای ئەوە بووی بە هەڵم ..
کۆچت کرد ..؟
یان
پەشیمان بوویتەوە ؟ یان ..
یان پاشایەکی تر هاتە جێگاکەی من
ڕێگاکەی من بوو بە پێشانگای سەیارە ..یان ؟ ..
دڵەڕاوکێ بەندی کردی ..
ڕۆحی بردی .. یان ..
پەنجەکانت لەکیبۆرد عاجز بوون ؟ یان ..
تۆڕی ئەنتەرنێتت لەگەڵ پاکەتی بەتاڵی پیتزا ،
خستە تەنەکەی خۆڵەکەوە ؟ یان ..
نازانم بۆ بووی بە هەڵم ؟
بۆ ئەبەد نەمای لەگەڵم ..
من واز ناهێنم لە گەڕان ..یان ..
سووڕانەوە و ..
کات کوشتن ..
بۆ تاج ..
بۆ کورسی ..
بۆ خەدەم ..
حەشەم ..دار و دەست ..
ئەسپی ڕازاوە به ئاڵتون ..
یان ..
لە چوار دەوری کۆڕی شیعرە بێتامەکان ،
لەگەڵ پاقلە فرۆشەکەی بەردەرگا ،
جنێو بە دەسەڵات ئەدەین ..
یان ..
نایەمە ژوور ،
ئەڵێم بەڵکو تۆ بێیتە دەر ..
نایەیتە دەر
ناڕۆمە ژوور ..
لە پڕ لە خەیاڵێکما دێیتە دەر ،
ئەمبینی ،
ئەگەشێیتەوە ،
لە پلیکانە خۆت هەڵئەدەی ،
بۆ سەرسنگم ..هەزار جار ئەڵێی پاشاکەم ..چیت بەسەرهات ؟ ..لێم گەڕێ ئێستا هەتاکو دە هەزار ملیۆن ساڵی تر ، تەماشاتکەم ..
من هیچ ناڵێم ، چونکە دەم بکەمەوە گریانە ..
لە ناو ئەنتەرنێت داڕزام ..
چی کتێبە لێم عاجز بوو ،
تەنانەت مزگەوتەکانیشت بۆ گەڕام ..
نەهاتیتە دەر ..
نەچوومە ژوورەوە .. یان ..
لە دەوری ڤیستڤاڵە
پڕ لە قەتێ کەبابخۆرەکان ،
هەندێ جار ،
لەگەڵ پاکەتفرۆشی بەردەرگا ،
ڕائەوەستم ،
ئەو ئەڵێ مارلبۆرۆی عەرەبی
خراپ نییە .. یان .. ئینگڵیزی ..
من ئەڵێم هەردووکیان ..یان ..
من پاکەتێکی کەنت ئەکڕم ..
ناڕۆمە ژوور ..
نایەیتە دەر ..
ئەڵێم بەڵکو
بە ڕێکەوت تۆ پەیا بیت ، یان ..
هاوار بکەی شاهانشاکەم ..
من هیچ ناڵێم ..
دڵنیام دەم بکەمەوە ، گریان زیاترم پێ نییە ..
نایەیتە دەر ..
ناڕۆمە ژوور ..
کەبابخانەیش هێندە کەبابی تیا ناخورێ ..
بانکیش هێندە پەڕەی پارەی تیا ناژمێررێ ..
شیعری چی ؟ کۆبوونەوەی چی ؟
کۆمەڵێ کەرکەدەن ، یان ..
دیناسۆر .. بە کەمانچە ، مووی زبری تێکستە ڕزیوەکانیان ،
پەت و پەتکاری ئەکەن ..یان ..
بیشمکوژن ناڕۆمە ژوور ،
لە دەرەوە ،
لەگەڵ پەشمەک فرۆشێکا ،
باسی بەڵێننامەی ژێر به ژێری
ئێرە و ئەولا و بەغا ئەکەم ..
باسی دووبارە هاتنی
چاخی بەرد و ئاغا ئەکەم ..
پەشمەکێکی لێ ئەکڕم و
ئەیدەمە دەستی مناڵێ ،
لە عەفرینەوە هاتووە ،
لەبەر دەرگای ڤیستڤاڵچێکانا سواڵ کا ..
نایەیتە دەر ..
لە خەیاڵما کە دێیتە دەر ،
پۆلیسی هۆڵ ئاگادار ئەکەی ،
تیرۆریستێ لە بەردەرگا ،
لەگەڵ پەشمەکفرۆشێکا ..
هاوار ئەکەم من پاشاکەم ..
یان ..دێیتە دەر ..
ئەڵێی لاچۆ ..
لەوەتەی تۆم لێ دیار نییە ،
سەردانی عیادە ناکەم ..
یان ..
نایەیتە دەر
لەو کۆڵانە شێدارانەی ،
درەختەکانی ئەمبەر و
ئەو بەری تێکەڵاو بوون و ، دەست شکانەوە ئەکەن ..یان ..
کە حیساب بۆ پەرەمێزی هەتاو ناکەن ..
بۆت ئەگەڕێم .. یان ..هەروا ئەسوڕێمەوە ..وەکو ئافرەتێکی دوو گیان ، پارەی پێ نەبێ بیداتە پزیشکەکان ، مناڵەکەی بۆ دەربێنن ..
ناڕۆمە ژوور
نایەنە دەر
نە تۆ ..نە کۆرپەلەکە ..یان .
ئەڵێم ڕەنگە لە ماڵێکەوە قریشکەی
تۆ ببیستم ، کاتێ ناتەوێ شیعرێکی خوار و خێچ ،
بێتە ژوورەوە ..
من لە دەرەوە ئەوەستم ..
نایەمە ژوور ..
ئەزانم تۆ بووی بە هەڵم
ئیتر نەماوی لەگەڵم
(سڵاووو ئەی پادشای سەبر!!
ئەزانی وتم خۆم ئەگرم و وەڵام نادەمەوە
بەڵام لە شەریعەتی شیعر هەڵنایەم کە دەڵێ لە هەرجێیەک شیعرت بینی سوجدەی بۆ بەرە
پادشاکەم بۆستە با سوجدەیەک بەرم لێم تێئەگەی کام سوجدەیە
ئەو سوجدەیە نا کە راسیزمێکی وەهابیی بزانێ تیرۆرم بکا
سوجدەی موحیبەت بۆ پەیڤی ناخ هەژێن!!
ئەزانی بەندی تۆ ئێستا عەرشی منت لەرزاند؟بە پێوەری ۱٠٠٠٠٠٠٠٠٠٠ بلیۆن رێختەر ؟
لێتخۆش نابم گەر چی دی ئەم عیلاجانەم بۆ نەنووسیت بە بای وەشتێکی نارنجی بە باڵی راکردن لە تاریکی دونیا بۆم نەنێریت ؟؟
بەندی زۆر بێزارم
دونیا کەسی تیا نیە ئەڵێی نازانم ؟
راستیان گووتووە لەم وڵاتە هەموو شت زۆرە تەنها بەنی ئادەم کەم !!
ئەرێ لای تۆش دۆزینەوەی مرۆڤ وا کەمە؟
ئەمرۆ کەمێک لە فێستیڤاڵی …… دانیشتم
ئێڵنجم یا لەو سیاسی و کەو مرۆڤە زلە بێ هونەرانە
قەستم بوو هەستم و مایکەکە لە …….. بگرم بڵێم ئێستا کەی وەختی ئەم گوو خواردنەیە ؟؟
کەس نەی ئەزانی…… م تەنها کورێک نەبێ گوتی خاتوو ….. سڵاو وەڵامم دایەوە وتی ئۆخەی لێرە وەڵامی سڵاوەکەمت دایەوە هیچم نەگوت رۆیشتم و زەردەخەنەیەکی پلاستیکی ..)
