لە نیوەی ڕێ.. کورتە چیرۆک / نەوزاد بەندی
ئەمە کاتی خۆی ، لە دەستی دەرچوو بوو ماچێکی کردبوو.. واتا وەک چۆن بە لای درەختێکا ئەڕۆی ، دەنکێ تووی نیمچە گەییو لێ دەکەیتەوە ، بێ ئەوەی بە تەما بیت دەمی پێ شیرین بکەی ، هەروا لەناو دەستتا وەک دەنکی تەزبیحێ ئەیهێنیت و ئەیبەی .. ئەمیش بە هەمان شێوە ، بێ ئەوەی ئاگای لە خۆی بێ و ..بێ ئەوەی نیازی وا بێ خۆشییەک ببینێ ..ئاوا دەمێکی بۆ برد و ماچێکی کرد ..زیاتر ڕەنگە نیازی وا بووبێ بێدەنگی بکات ، چونکە مێشکی بردبوو ..قسەی زۆر ئەکرد ..باسی ئەو پۆلە پیس و پۆخڵانەی ئەکرد کە دەرسی تێدا ئەوتنەوە ، بە جۆرێک ڕۆژ نییە مشک لە تەوالێتەکانەوە بە هەڵەداوان خۆیان نەکەن بە پۆلدا و مناڵەکان نەترسێنن .. هەروەها ئەو دیوارە چەورە چڵکنانەی کە بە کاری هیچ نایەن بێجگە لە ڕوخان .. باسی موچەی بۆ ئەکرد ، کە بەردەوام دوا ئەکەوێ ، لە کاتێکا دوایش نەکەوێ ، یان تەنانەت پێشیش بکەوێ ، بە کاری چی دێ ؟ نە ئەتوانی گەشتێکی پێ بکەی ، نە ئەتوانی تاقمی ناوماڵی پێ بگۆڕی ..نە هیچ .. تەنها ئەبێ بڕۆی بۆ شوێنە قەڵەباڵغەکان ، لەسەر عەرەبانەکان ، مامەڵەی سەوزە و میوەی کۆن و ڕزیوی پێ بکەیت ..
قسەی تریشی زۆر ئەکرد .. وەک ئەوەی ڕەنگە خۆکوشتن شتێکی خراپ نەبێ ، چونکە بەردەوام بوون لەم جۆرە ژیانە ، وەک کفر و لە دین دەرچوون وایە ..حەق وایە ئەو مەلا و ڕیشدارە ترسنۆکانەی دەیان ساڵە تەنها قسە ئەکەن ، ئەو ئاسانکارییەیش بۆ موسوڵمانان بکەن کە لە بارودۆخێکی وادا ، خۆ کوشتن ، نەبێتە هۆی تووڕە بوونی خوا و بێ باوەڕیی …
ئەیویست پێی بڵێ شتی وا چۆن ئەبێ ؟ ..بە تایبەت لێرە نان دەست هەموو کەسێ ئەکەوێ ، هەر بۆیە حەق وا نییە ئەوەندە ڕەش بین بێ ..
بەڵام ئەو سوور بوو لەسەر ئەوەی کە بەردەوام بوون لە وەها ژیانێکدا ، ڕەنگە مرۆڤ بۆ بێ باوەڕیی ببات ..کوا جاران کتێبی ئاینیی ئەسووتان ..؟
هەروەها بە دوور و درێژیی باسی بەرپرسێکی حیزبیی بۆ کرد ، کە بۆیاخی سمێڵەکانی لە هی پێڵاوەکانی تۆختر بوون ، هەر ڕۆژێ ئاڵۆشی ناوگەڵی هێرشی بۆ ببات ، خۆی ئەکا بە مەکتەبەکەیاندا و ..لەگەڵ بەڕێوەبەرە شۆخ و شەنگەکەیاندا ئەکەوێتە باس و خواسی لابەلا و ..چاو ئەبڕێتە سنگ و ڕانی بەڕێوبەر و مامۆستاکان و ..دەستەکانیشی لەناو دێراوی شەرواڵە شاڵەکەیدا وون ئەبن ..ئەیووت ئەو سمێڵ بۆیاخکراوە ، جووتێ ژنیشی هەیە ، بەڵام وەک کەڵەشێرێکی بێ حورمەت لە ناوەختا خۆی ئەکا بە مەکتەبەکەیانا و .. بە بیانووی ئەوەی گوایا مەکتەبەکەیان چالاکی حیزبیی کەمە و ..ناتوانن تەلەبه وکەس و کاریان بکەنە هاوڕێی حیزب ، خۆی لە ژووری بەڕێوەبەر ئەخزاند و .. بە چاوە پڕ شەهوەتەکانیەوە ، بە دوای ئەندامی لەشی بەڕێوەبەردا ئەگەڕا نەک بە دوای ئەندامی تازەی حیزبا ..
ئەم پێی ووت : ئەی بۆچی ڕیسوای ناکەن ؟ تاکێ نەعل بکێشن بە سمێڵە بۆیاخکراوەکەیا ..
ئەو چاوەکانی زەق بوونەوە ، وەک ئەوەی بترسێ لە پڕ ئەو بەرپرسە بەو ناوەندەدا تێپەڕێ و گوێی لە شڵپەی ئەو قسەیە بێ کە پێڵاوێکە و نوساوە بە سمێڵە بۆیاخکراوەکەیا ، بە چرپەوە ووتی : چۆن شتی وا ئەبێ ؟ بەڕێوەبەر ئەندامی شانەکەی ئەوە و بۆی هەیە بە نوکە قەڵەمێ هەڵی بداتە لادێیەکی دوورە دەستی سەر سنوور ..!
ئالێرەدا ، کە بە چرپە و ترسەوە قسەی ئەکرد ، ئەم هەستی بە جوانییەک کرد تیایدا ، دەمی برد و ماچێکی کرد ..
ئەو سەرەتا بڕوای نەکرد ماچ کرابێ ، دەستێکی هێنا بە لێویدا و ..پرسی : ( ئەوە چی بوو ؟ )
ئەم وەڵامی نەدایەوە .. بێدەنگیی باڵی بەسەر هەردووکیانا کێشا ..
(چیت کرد ؟ بۆ زمانت لاڵ بوو ؟ )
کە بە چرپە قسەت ئەکرد ، لەو مناڵانە ئەچووی کە لە مەتبەخ مەنجەڵێک یاپراخیان قڵپ کردۆتەوە و..بە چرپە بۆ براکەیانی ئەگێڕنەوە ، هەتا ڕێگا چارەیەکیان دەست بکەوێ ، ئیتر حەزم کرد ماچێکت بکەم ..
(یەعنی چۆن ؟ )
ئیتر هەر نەیدەبڕییەوە ..کار گەیشتە ئەوەی لێی تووڕە بوو ، نەڕاندی: کابرای سمێڵ بۆیاخکراو سواری خۆتان و مدیرەکەتان بێ ، ئاساییە لە لاتان ، بەڵام وەک مناڵێ ماچێکتان بکەن، دنیا وێران ئەکەن..
( حەدی چیە ؟ )
(کێ ؟ )
( سمێڵ بۆیاخکراوەکە )
قسەی تریشی زۆر کرد .. وەک ئەوەی کە ئەبێ دوای ڕەمەزان بێتە داوای و .. ئاڵتون و شت زۆر گرنگ نین و .. ئەبێ لە جیاتی مەلا ، قاچاخچیەک بدۆزنەوە و لەناو دەریای ئیجەدا لێکیان مارە ببڕێ و …
زۆر قسەی تریش ..
