Skip to Content

بیرەوەریيەکانی فەقێیەکی گومڕا-(57).. شەماڵ بارەوانی

بیرەوەریيەکانی فەقێیەکی گومڕا-(57).. شەماڵ بارەوانی

Closed
by نیسان 16, 2023 General

بریا گووم خواردبا، نەڕۆیشتباما ئەو کۆبوونەوەیە!
من لە قوتابخانەی ئایینی زۆر زیرەک بووم، فەقێیەکی تا بڵێیت پابەند و جددی بووم. هەموو ئەو مەلایانەی وانەیان پێ دەگوتین، زۆریان خۆشدەویستم و ڕێزی تایبەتیان دەگرتم.
تەنها دانەیەک نەبێت، کە لە بەشەکانی تری بیرەوەرییەکانی فەقێیەکی گومڕا باسم کردووە.
لە قوتابخانەی ئایینی(مەلا عەبدولڵا پەلپیتانی)، بەڕێوەبەرەکەمان، مامۆستا مەلا(سەعدەدین مەلاعەبدوڵلا پەلپیتانی)، کە لەمزگەوتی(سپیش) مەلا و وتاربێژ بوو. لە یەکێک لە خولەکانی پێشووتر پەرلەمانتاربوو. چەندجار لەپۆل پێی دەگوتم: شەماڵ، تۆ داوای ئەو دوو چاوانەم لێ بکەیت، بۆتیان دەردێنم، زۆرم خۆش دەوێیت، تەنها ئەوەم پێ ناخۆشە، کە ئیسلامیت، خۆزگە ئەوە نەدەبوویت.
هەموو ڕۆژێک دەڕۆیشتمە قوتابخانە و نەهاتن(غیاب)م هەرگیز نەبوو.
لە (کۆلێژی زانستەئیسلامییەکان)یش هەروا بووم، ئەوەی بیرمە، تا گەیشتنم بە قۆناغی چوارەم یەک ڕۆژ غیابم نەبوو.
لە قوتابخانەی ئایینی، ڕۆژێک کۆبوونەوەی حزبیمان هەبوو، لە مەڵبەندی دووی یەکگرتوو، لە هەولێر.
من و دوو سێ فەقێی تر، هەموومان یەکگرتوو بووین و ئەو ڕۆژە نەڕۆشتینە قوتابخانە. ڕۆژی دواتر مەلا سەعدەدین دەیزانی من هەرگیز دوا ناکەوم و غائیب نابم لە قوتابخانە.
داپیرم لە پۆلی دوانزە و لەناو ئەزموونەکانی نیوەی ساڵ کۆچی دوایی کرد. هەر بە ڕۆژدا چووم و گەڕامەوە.
مامۆستا سەعەدەدین، نازانم چۆن زانیبووی و کێ پێی گوتبوو، کە من بەهۆی کۆبوونەوەی حزبییەوە، نەڕۆشتووم بۆ قوتابخانە!
ڕۆژی دواتر کە ڕۆشتمەوە بۆ قوتابخانە، بە لالچێک و تەنزەوە پێی گوتم: ها کوڕم شەماڵ، جا هەر پێی دەگوتم کوڕم، وەک خۆشەویستی و ڕێزێکی زۆر، ئەوە دوونێ لۆ نەهاتبوویتە قوتابخانە؟
کۆبوونەوەی حزبیتان هەبوو ها؟ کەوای گوت، فەقێکان هەموویان دایانە قاقا.
لەسەر ئەوە چەندین ڕۆژ، لێم لالچ و دڵگران دیار بوو، کە دەهاتە پۆل وانەمان پێ بڵێتەوە، هەر تەعلیق و تەنزی لۆ حەوالە دەکردم و ناوی نەدەهێنام و هەر نموونەی کۆمێدی لەسەر دەهێنامەوە و دەیگوت: وەکی هەندەک فەقێیان، فەقێکانیش دەیانزانی لەگەڵ منیتی و قاقا پێدەکەنین. منیش لەژێرەوە دەکوڵام و دەمگوت، بریا گووم خواردبا، بەڵام، نەڕۆشتباما ئەو کۆبوونەوەیە.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish