عوزر خوایی بۆ شیعر.. نەوزاد بەندی

دەمێکە شیعرم نەنوسیوە ..
دەمێکە لەم شەقامەدا،
شیعری جوانتان نەبینیوە ..
شەقامەکەم ،
پڕ بووە لە دز‌ و جەردە ..
هەر فریای ئەوە ئەکەوم ،
ئاگادارتان بکەمەوە و
لە ڕوویان هەڵماڵم پەردە ..

٭ ٭ ٭
ئەوان حەز ئەکەن خەڵکەکە ،
دەست لەو خاکە هەڵگرن و
بە هەڵبەستەوە سەرقاڵ بن ..
بۆ ئەوەی هەر دەربەدەر و ..
هەر جەردە خاوەنی ماڵ بن ..

٭ ٭ ٭
ئەوان لاوانیان ڕاهێنا ،
لەسەر سوکایەتی و جنێو ..
میدیایان پڕ کرد لە درۆ و ..
ڕۆژنامە نوسی وەکو دێو..

٭ ٭ ٭

ئەبێ شیعر
جلی سەربازی لە بەرکا ..
کاسکێت و
بێری لەسەر کا ..
ببێ بە فیشەک
بە بڕنەو ..
هەر هیچ نەبێ ،
خەڵکەکە هەڵسێنێ لە خەو ..

نەوزاد بەندی

Nawzad Bandi