مردن بە ترش و خوێی ووردەوە.. نەوزاد بەندی

ئێمە به دوای مردنا ئەگەڕێین ،
یان ئەو بە دوای ئێمەدا ئەگەڕێ ؟
( دیار نییە.. )
ئەو ئێمە ئەدۆزێتەوە
یان ئێمە ئەو ئەدۆزینەوە ؟
( دیار نییە ..)
ئێمە خۆمان لەو شاردۆتەوە ،
یان ئەو خۆی لە ئێمە شاردۆتەوە ؟
( دیار نییە .. )
ئێمە لە دەست ئەو ڕا ئەکەین ،
یان ئەو لە دەست ئێمە ڕائەکا ؟
( دیار نییە .. )
ئەو ئێمە ڕزگار ئەکا
یان ئێمە ئەو ڕزگار ئەکەین ؟
( دیارە ..
ئەو ئێمە ڕزگار ئەکا )

٭ ٭ ٭
عێراقییەکان ،
تاکە میللەتن ،
لە کاتی ژیانیشدا ، مردوون ..
گەورەترین گۆڕستانی دنیا ،
لە عێراقە و
بچووکترین هەلی ژیان ،
هەر لە عێراقە ..

٭ ٭ ٭
هۆکاری مردنی بە کۆمەڵی عێراقییەکان بۆ ئەوە ئەگەڕێتەوە ،
چەند کەسێک هەموو هۆکارەکانی ژیانییان دزیوە ..

٭ٓ ٭ ٭

ئەوەی لە عێراق ڕاکا ، ناگەڕێتەوە ..
مەگەر تێک چووبێ ..
یان خزمی ئەوانە بێ ،
کە هەموو هۆکارەکانی ژیانیان دزیوە ..

٭ ٭ ٭

ژیان لە عێراق ،
بریتیە لە خواردنی برنج و شلە و زاوزێ ..

٭ ٭ ٭

هەر کەسێ پرسیاری هەیە ،
با پرسیار کا ..

٭ ٭ ٭

لە ڕۆژێکی مێژووییدا نوسراوە ،
ئەو ڕۆژەی مامۆستای باکوری عێراق ،
دوای سێ مانگ ،
ئیحتیمالە دوو سەعاتێکی تر ،
موچەی مانگی 7 وەربگرن

( وێنەکە 118 ساڵ پێش ئێستایە ، شاری مانهاتن ی ئەمەریکا ..ئەوسا نە دوو تاوەری بازرگانیی جیهانیی تێدا دروست کرابوو ، نە ئوسامەی کوڕی لادن هێشتا لە دایک بوو بوو )