یەکەم کۆڕى ناساندنى ڕۆمانى فڕینى پردەکان لە هەولێر بە ڕێوەچوو

ئەمڕۆ ڕۆژى شەممە رێکەوتى 23\12\2023 بە ئامادەبوونى ژمارەیەک نووسەر و ڕۆماننووس و لە ناوەندى ڕۆشنبیرى مەم و زین لە هەولێر یەکەم کۆڕى ناساندن و بڵاوکردنەوەى ڕۆمانى فڕینى پردەکانى ڕۆماننووس دڵشاد کاوانى بەڕێوەچوو.
ڕۆمانى فڕینى پردەکان ڕۆمانێکى یوتۆبیاى خەیاڵییە و تێکەڵ بە ئایین و فەلسەفە و مێژووى سیاسیى کراو، ڕۆمانەکە براوەى پێشبڕکێى ڕۆمانە لە ڤیم فاوندەیشن بۆ ساڵى 2023 ڕۆمانی فڕینی پردەکان سەرجەم بنەما و پێکهاتەکانى ڕۆمانی باوی تێکشکاندووە، لە کاتى بڵاوبوونەوەى هەواڵى ڕۆمانەکە سەر ئاستى ناوەندەکانى ئەدەبی کوردی و عەرەبى و ئینگیلیزییەوە لە بارەیەوە نووسراوە و دەنگدانەوەیەکى گەورەى بەدواى خۆیدا هێناوە.
لە میانەى کۆڕکەدا لەلایەن هاوکار جمیل مامۆستاى زانکۆى سەلاحەددین ڕانانێکى ورد و ئەکادیمى بۆ کرا و تیشکى خستە سەر لایەنە شاراوەکانى ڕۆمانەکە. هاوکار جەمیل ئەمەى خستەڕوو کە ڕۆمانى فڕینى پردەکان بۆ خوێنەریکى ئاسایى نەنووسراوە و بەڵکو پانتاییەکى زۆرى بۆ توێژەران لێکۆڵەرانى زانستى و ئەکادمىى تەرخانکردووە و سەرجەم ڕەهەندە جیاوازەکانى لە خۆگۆتووە بۆ ئەوەى توێژەران بتوانن لە ڕوانگەى جیاوازەوە توێژینەوەى لەبارەوە بکەن. هەروەها ئەمەشى گوت: کە ڕۆمانى فڕینى پردەکان بە تەواوى شێوەى تەکنیکى رۆمانى باوى ڕەتکردۆتەوە و بنەماکانى ئایین و فەلسەفە و عیرفان و دەروونشیکارى و تێکشکاندووە و پڕە لە ڕەمز و کۆد و وێنا و ڕوئیای نوێ و بۆ ئایندەسازیىى ژیانى مرۆڤایەتى هەیە.
ئەم مامۆستایەى زانکۆ بە پیویستشى زانى هەرچى زووە ئەم ڕۆمانە بچێتە سەر زمانەکانى دیکەى جیهان خزمەتێکى گەورە بە ئەدەبیاتى ڕۆمانى کوردى و جیهانى بە گشتى دەکات.
ڕۆمانی فڕینی پردەکان، ڕۆمانێکی فرە ڕەهەندی سادیستی، مێژویی سیاسییە، دەروونی و فەلسەفیی عرفانییە، کە تێیدا کوشتن و دەسەڵات و ململانێی مانەوە، پێکهاتەی سەرەکی ڕۆمانەکەیە. هەروەها باس لە دروستبوونی میتۆلۆژیا و ئایینێک دەکات، کە دوای کۆتای هاتنی ئاییەنەکان بەناوی ئەهلی حەق و کتێبی قینات کە لە سێ لەوحەکانی سوور و ڕەش و شین، پێکهاتووە و هێمان بۆ فەلسەفە و سیستەم و دەسەڵات.
دڵشاد کاوانى نووسەرى ڕۆمانەکەش لەبارەى ڕۆمانەکەیەوە دەڵێت: کە ڕۆمانەکەى لە تەکنیک و زمان و کارکەتەرسازیىى بەتەواوى جیاوازە لە ڕمانەکانی کە تائێستا نووسراوەتەوە. ڕۆمانى فڕینى پردەکان باسى سەرەداوەکانى ئەنفال و کۆمەڵکوژى و ڕووخانى پردى گەیشتنى نێوان مرۆڤەکان دەکات و دەرد و نەهامەتییەکانى کۆمەڵگەى مرۆڤایەتى خستۆتە ڕوو.
لە کۆتایی کۆڕەکەشدا لەلایەن ڕۆماننووس واژوو لەسەر کتێبەکان کرا.

Dilshad Kawani

دڵشاد ڕەزاق ڕەسوڵ ناسراو بە (دڵشاد کاوانی). نووسەر و وەرگێڕ و چیرۆکنووس ڕۆماننووس و ڕۆژنامەنووس. چاڵاکوان له بواری ڕێکخراوەیی و مافەکانی مرۆڤ. لەدایکبووی 01-07-1978 شاری قەزوینی ئێرانە. لە ساڵی 1984 لە گوندی کاوانیانی شەقڵاوە چووەتە بەر خوێندن. یەکەم وێستگەی نووسینی لە ساڵی 1996 بە شیعر دەستی پێ کردووە. پاشان یەکەم چیڕۆک بە ناوی (هەرگیز پاشگەزنابمەوە) لە ساڵی 1997 نووسی، زیاتر لە 24 چیڕۆک و (100) کورتیلە چیڕۆکی لە گۆڤار و ڕۆژنامەکان بڵاوکردۆتەوە، خەڵاتی یەکەم و دووم و باشترین چیڕۆکی لە فیستڤاڵەکانی کوردستان وەرگرتووە.