ئێوارانە ٥٨.. شیعری سەردار جاف
دەمە دەمی ئێوارانەی پڕتەمتومان
دۆراندۆری خۆ دەکێڵم
پێکی شەراب
لە کۆڵانانی شاترلوو بە دووم وێڵە
دەست لە ملی مەرگ دەنێم
ساقی بەرۆکی گرتووم و
پەيتا پەيتا
پێکی مەستبوون بەدەم سەماوە پڕ دەکا
خەراباتی خۆ دەخۆم و قورتار نابم
بوومە پاشماوەی کاولاشێ
لێوە لەرزەی پياڵەی مەيم
ئەم شێتخانە
بەرۆکی منی گرتووە و
يەخسيری نێو چوار ديوارم
کچێ بەنازەوە هەڵدێ و
لە گوێسەبانەی ئازارم
ژان دەڕێژێ
دامەنی حەزی تەنيوم
شەکرە پڕپڕ
فشار هەڵچوو
دەريای مەنگە ، بەردەرگای ژينی گرتووم
خۆم بير چووە
وام لەو ديو تاريکيا لە گێژاوی رەشتر لە رەش
شەپۆلە نەرمی سەر ڕێگام
نە دەمبینێ و نە پەی دەبا
دەخولێمەوە
شنەی سپێدەم لێ ونە
بە سەر پشتی قەترييەکانی سەر جلم
لێم ئاڵاوە و غلۆر دەبم
منجڕێکم
لە شوولە دەوەن نابمەوە
ئەو لەو بانێژەی شەهلايا
پرياسکەکانی لە بەردەم خەرمانەی مانگا کردەوە
تريفەيەکی رۆشنە
ناخی رەش رەش
رەشتر لە گێژاوەکەی من
لە سۆراغی هەناسە و هەنگاوی دوێنێ
ديواربەندی خۆرهەڵاتی لێگرتووە
ئەم شيعرەتوولە ڕێيەکە
گوڵەوەچنێی چرپە و ترپەی بەر بارانە
بە ناو بێسيمێ رێ دەکا
حەرفەکانی عەوداڵ و وێڵ
لە کەناری جوڵەی دەسمە
تەنها شەهلا کە خۆشەويسترين کەسمە
٣ / ١ / ٢٠٢٤
