شیعر\ سەفەرە سەختەکانی تەمەن.. سەرهەنگ خامۆش
Closed
ئاسمان ڕەنگی خۆی بیر چۆتەوە
باوەشی تژی بووە لە بلێسەی ئاگر
فریشتەکان هەراسانن
لەبەربونەوەی هاواری شەوەزەنگ
چ ئاوازێکی نەشازە
گوێی مردنی کاس کردووە…
بەیانی خەمێک لە دایک دەبێت
خەمی بیرچونەوەی ساتەکانی فیراق و
سەفەرە سەختەکانی تەمەن
بە نێو کۆڵانەکانی تەنیایی
تا ئەودیو سنورەکانی عەدەم…
ژیان ڕەنگی کاڵ بۆتەوە
لێرە هیچی تر شک نابەم
جگە لە هەناسەی (با)و
ڕووت بونەوەی ڕەنگی خەیاڵ
شوێن پێی ئەو فرمێسکانەی
کە لەکەلێنی پەنجەکانی خاکدا ون بوون…
لەسەر دیوارێکی ڕماودا
گوێم لە چرکەی
میللی کاتژمێرێکی کۆنە
گوێم لەترپەی
کەوتنە خوارەوەی دوگمەکانی زەمەنە
لە لێواری ساڵێکی تری پڕ لە ئازار…
سەرهەنگ خامۆش
