واتایه‌ك بۆ تۆ نادۆزمه‌وه.. ستار ئەحمەد
گه‌ڵای قه‌سیده‌یه‌ك
له خوێنما هه‌ڵوه‌ری
جه‌سته‌م بۆنی هه‌ناسه‌و
په‌رچه‌می تۆی گرتووه
گوڵدانی خۆزگه‌م و
خوناوكه‌ی وشه
دێڕی عومرم ده‌نوسێته‌وه
به‌هاران به‌سه‌ر خاك
نیگای بارانا ده‌ڕژێم
گڵ به‌ته‌م ده‌مشواته‌وه
شووشه‌ی به‌رامه‌م وردو خاشده‌بێت
ده‌بمه شه‌هیدی هه‌ناسه
گوڵه هه‌ناری خوێن
له جه‌رگما ده‌ڕوێ
بولبول ده‌گرێ
هێلانه به‌رده‌بێته‌وه
ئاوازی سوور
به‌سته‌ی سیا ده‌گرێنێ
گۆرانی عیشق
بۆ مه‌رگی سۆز
په‌رچه‌م ده‌ڕنێ
تاریكی داگیرمده‌كات
ده‌سووتێم
دۆزه‌خێك له‌دووكه‌ڵا
ده‌مخنكێنێ
شۆڕده‌بمه‌وه به‌نێو گوناهه‌كانا
له شێوه‌ی تۆو خۆم
كچانی نێو شیعره‌كانم
به‌بێداری و سره‌وتنه‌وه
ته‌نها له‌خۆم ده‌نۆڕم
ده‌ستێكم رۆحی روناكی هه‌ڵگرتووه
ئه‌وی دیكه‌م له تۆ ده‌گه‌ڕێ
دڵۆپێ باران شیده‌كه‌مه‌وه
مانایه‌ك بۆ نامۆییت
وه‌ڵامێك بۆ نه‌مانت نادۆزمه‌وه
ده‌گه‌ڕێم
به‌دوای هێلانه‌ی كه‌ناریا
ته‌لبه‌ندی گڕ ده‌مته‌نێ
لاسكی گه‌ڵا ده‌نه‌خشێنم
خه‌زان ده‌مپۆشێ
له‌رۆحی روناكیا
وردوخاشده‌بم
نابیته مۆمێك
له‌ته‌نیایتدا بتوێمه‌وه
له باڵای هه‌ور ده‌ئاڵێم
ستار ئەحمەد
