نیگا خەیاڵییەکانی چاوەکانم.. دڵکەش قادر

ئەم تەنیاییەم بچووک مەکە!
کە دەمەوێت لە تەنیاییمدا
چادرێک بم
بۆنی میسک و عەمبەر بەئاسمانی شاردا
بڵاو بکەمەوە و
داکۆکیکارێکی نیگا خەیاڵییەکانی چاوەکانم بم
مەزنایەتیم لە جەنجاڵی شاردا ون نەبێت و
شنێنەری بتی چاوەکانت بم
تۆ پێم ناڵێیت بەم هەموو سەوڵە شکاوانەتەوە
دەتەوێ بەرەوێ بڕۆی
ئاخر من بخووردی تەنیاییم مەزنە و دەگاتە بناگوێی هەموو دنیا
ئەوەی دامنابڕێ
دەنگی خڕخاڵە لە هەنگاوەکانما
تەڕیەتی پڕتەقاڵە لە سینەی مندا
خوناوی کانی منە لە نەسیمەکانی تۆ
ئەم تەنیاییەم بچووک مەبینە
ئاوڕێک لە خوناوی چاوەکانم بدەوە
تا بیرت بێت خوسانی من لەشەودا بێ وێنەیە
خوسان، شێتبوونی دواچرکەی ژیانە
لەنێوان گەمارۆدان و هەڵگۆفین
خاڵیکردنەوەی حەزە
لەنێوان دوو بەرداش و
تێکئاڵانی دوو خەیاڵ.

سلێمانیی
دڵکەش قادر

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.