هەموو ڕۆژێك لە ژووانی كتێبدا.. سەدیق سەعید ڕواندزی

هەفت ساڵ زیاترە، سەیری هیچ كام لە تیڤی و كەناڵە ئاسمانییەكان ناكەم و گەیشتوومەتە ئەو بڕوایەی، مەعریفە تەنێ لە نێو كتێب و دنیای خوێنەوەدایە، بۆیە سێ لە سەر چواری ژیانی ڕۆژانەم، بە كتێب و خوێندنەوە بە سەر دەبەم و هیچ كات ئامادەنیم گوێ لە گفتوگۆی بە ناو ڕووناكبیرێك لە كەناڵێكی ئاسمانی بگرم، كە ڕۆژێك گۆڕانە، ڕۆژی دواتر نەوەی نوێ، ڕۆژی سێیەم پەسنی ئیبسلامییەكان دەدا یاخود بە دەنگی بەرز ڕەخنە لە حكومەت دەگرێت و بڕوای وایە گەندەڵە، كەچی خۆی بە پلەی عەقید مووچەی حانەنشینی سەربازیی لە حكومەتە گەندەڵە وەردەگرێت ! ئامادە نیم كاتەكەم بۆ هونەرمەندێكی نەناسراوی كورد، كە لە دە كەس نۆ كەس نایناسن تەرخان بكەم، كە لە ترسی ژنەكەی وازی لە گۆرانی گوتن هێناوە، یان گوێ بدەمە گفتوگۆی بە ناو بیرمەندێك، كە بڕوای وایە ژنەكەی دەست و پێیەتی و هەموو شتێكیەتی لە ژیان، ئەی ئەوانەی بە نموونە وەك من ژنیان نییە؟ دەبێ ناتەواو بن و مرۆڤ نەبن؟ ئەم جۆرە بەرنامە و گفتوگۆ بێ مانایانەی كەناڵەكان، شایەنی ئەوە نین ڕۆشنبیر كاتی خۆیانی پێ بە هەدەر بدات. من بە سرووشت شەوان زۆر زوو دەنووم، هەندێكجار كاتژمێر هەشت بە تایبەتیش زستانان، ئەمە دەستووری خەوی ژیانی منە لە هەر چوار وەرزەكەدا، كە هیچ كام لە تۆڕە كۆمەڵایەتی و چات و فەیسبووك و ئەم جۆرە پەیوەندییانەشم نییە تاكو تا بەرەبەیان لە سەر هێڵ بم، بۆیە زوو دەنووم بە یانیانیش كاتژمێر پێنچ لە خەو هەڵدەستم. دوای هەستانم، دەچمە ژوورەكەم و یەك بە یەك تۆزی سەر كتێبەكانی نێو كتێبخانەكەم دەتەكێنم و پاشان دەست بە خوێندنەوە دەكەم، تا ئەو كاتەی برسی دەبم و ئینجا چایەك ئامادە دەكەم و نان دەخۆم، بێ ئەوەی دایكم و خوشكەكەم لە خەو بكەم . تەنانەت گەر دەوامی قوتابخانەشم هەبێت و دەڵێم بۆچی ئەوان لە خەو بكەم لە كاتێكدا خۆم بە ئاگام؟ مەگەر ژن خزمەتكاری پیاوە؟ ئیدی ئەمە بەرنامەی ڕۆژانەی ژیانی منە و هەر كتێبێك نۆرەی هاتبێت دەیخوێنمەوە و هەندێ جاریش لە سەر داخوازی نووسەران و هاوڕێیان، ڕێزبەندییەكە دەگۆڕم چونكە لوتف دەنوێنن كە كتێبەكەیان زوو بخوێنمەوە و گەر سەرنجێكم هەبێت، بۆیانی بنووسم. لە ماوەی هەفتەی ڕابردوودا، دووكتێبی دكتۆر (كەمال میراودەلی)م خوێندنەوە بە ناوەكانی:( فەلسەفەی ئەز و ئەریكۆلۆژی فۆكۆ) ئەم دوو كتێبە، بە زمانێكی كوردییانەی یەكجار جوان و ڕەوان نووسراون و هەوڵێكی سەركەوتووانەی بە كوردیكردن و كورداندنی فەلسەفەن و ئاماژەیەكی گرنگن بەوەی كە زمانی كوردی لەو زمانانەیە، دەتوانێت لە فەلسەفە بدوێت . لە نێوەندی ئەدەبی كوردیا، گەلێك نووسەر و هەوڵی ناساندنی كاری فەلسەفیانە هەن و دەبینرێن، بەڵام بەدەگمەن ئەو كارانە، لە ڕووی بابەتی و زمانییەوە دەتوانن فەلسەفە لە خوێنەری كورد كە تەنها زمانی كوردی دەزانێت بگەیەنن، بۆیە ئەم دوو كتێبە، بە زمانێكی جوان و ڕەوان، بابەتەكانی خود و ڕەهەندە فەلسەفییەكانی فۆكۆ باس دەكات و دوای تەواوبوونیان، هەست دەكەی زانیارییەكی زۆرت لە بارەی بە نموونە فۆكۆ، دەست كەوتووە، پێچەوانەی ئەوانەی سەدان لاپەڕەی لە سەر دەنووسن، بێ ئەوەی دواجار تێمان بگەیەنن فۆكۆ كێیە و كارەكانی چین؟ بۆیە ئەوەی لە كتێبەوە دەست دەكەوێت، مەحاڵە لە بەرنامەی پێشكەشكارێكی نەخوێندەوار و دەستت بكەوێت، كە لە خولەكێكدا دەیان جار لە بێ مەعریفەی زمانی وشەی (باشە باشە) بەكار دێنێت! كەواتا تا كتێب هەبێت، من چۆن ئامادە گوێ لە بەرنامەی نێرێك بگرم، كە سنگی ژنان بە شووتی و لیمۆ دەچوێنێت ! چۆن گوێ لە پێشكەشكارێكی سەر ڕووتی هەواَلەكانی كەناڵێك دەگرم، كە مووچەكەی دە بارتەقای مووچەی منە، كە سی ساڵە مامۆستام. ئەو كەناڵ و تیڤییانەی بە پارەی نەوت و داهاتی ئەو میللەتە پەخش دەكرێن، نەك هەر نابێ سەیر بكرێن، بەڵكو دەبێ بایكۆتیش بكرێن. كۆمەڵگەی ئێمە، خراپ ئاڵوودەی شاشە بە هەموو جۆرەكانییەوە بووە، شاشەش جۆرە خوێنەرێكی ڕاگوزە ر و تێپەڕو بیرنەكەرەوە دروست دەكات، بۆیە هوشیار نابێتەوە. بە كولتوریكردنی خوێندنەوە، هەنگاوەكانی هوشیاربوونەوەی كۆمەڵگە، مەعریفەی ڕاستەقینە لە نێو كتێب دایە، نەك بەرنامە بێ ماناكانی تیڤییەكان، كە فۆكسیان هەر لە سەر كەباب و زەڵاتە و كوڵیچە و شیرینی و پرسیاری كەسی بێ مانایە !

ڕواندز

Sadiq Said Rwandze

سەدیق سەعید ڕواندزی، لە ساڵی 1972 لە شارۆچکەی ڕواندز لە دایکبووە. خوێندنی سەرەتایی و دواناوەندی هەر لەو شارە و ساڵی 1993 _1994، بەشی کوردی _ پەیمانگای مەڵبەندی مامۆستایانی لە هەولێر تەواو کردووە. هەر لە ڕواندز دەژیت و خولیایەکی گەورەی بۆ کتێب و خوێندنەوە هەیە و زۆرجاریش وەک خوێنەرێک سەرنجەکانی لە بارەی پرس و بابەتە ئەدەبی و ڕۆشنبیرییەکان و کتێب و تێکست دەخاتە ڕوو.