ساڵی نوێ وپێک شاد بوون.. چیرۆکی قوتابیەکەم.. چرۆ زەند
لە کۆتایی ساڵی ٢٠١٩ قەیرانی داخستی شوێنە گشتیەکان وە قەدەغەکردنی هاتوچوو دەستی پێکرد. کارو وپەیوەندیەکان لەڕێگای زووم وئنتەرنێت گەشەی کرد. ماوەیەک دابڕام لە پۆلی زمانی کوردی. پاشان لەڕێگای زووم جارێکی تر بە پۆلە خۆشەویستەکەم شاد بوومەوە. خۆشەویستی قوتابیەکانیشم گەورەترین پاڵپشتی بوو. ئەوان بونە هاندەرم بۆ کردنەوەی پۆلەکەم. پۆلی زمانی کوردیم ڕاگەیاند لە توڕە کۆمەڵایەتیەکان لە ماڵی کورد وڕۆژنامەی دەنگەکان کە ڕۆژنامەیەکی سەربەخۆی ئەلەکترۆنیە، دەنگی خەڵکە بێ جیاوازی.
وەک یەکەم مامۆستای زمانی کوردی لە تورنتۆ لە کەنەدا کە سێ ساڵ هەوڵمدا لە پەروەردە وفێرکردن تا توانیم زمانی کوردی بخەمە ڕیزی زمانەکانی دنیا. زمانی کوردی بۆ یەکەم جارلە ساڵی ٢٠٠٣ دانی پێدا نرا، لەو کاتەوە من دەستم کرد بە وانە وتنەوە. من نەم ویست هەوڵی بیست ساڵم لەو قەیرانەدا بەهەند بڕوات، بۆیە بەردەوامیم هەڵبژارد.
ئەم جارەش پۆلەکەم کرایەوە، پۆلم کرد بە دوو بەش. پۆلی یەک، بۆخوێنکاری سەرەتایی. پۆلی دوو، بۆ خوێنکاری ئادەڵت، پێشکەوتوو. بۆ یەکەم جار لە ڕێگای زووم وانەم وتەوە. ئەمە کارێکی نوێ بوو بۆ من. قوتابیەکانم لە ڕێگەی ئنتەرنێت داخڵ بە پۆل دەبوون. پرۆگرامی پۆلەکان کات وڕۆژەکانم بۆ دەستنیشان کردن. هاوکاری قووتابیەکانم پۆلەکەم بەردەوام بوو.
زیلان پەڕتووکی زمانی کوردی کردە پی دی ئێف بوە ڕابەری زووم بۆ پۆلی دوو. میلۆدی بوە سەرپەرشتی زووم بۆ پۆلی یەک. پەری ڕابەری پۆلەکان بوو یاداشتی ناوەکانی دەکرد، هەر قوتابیە ئەرکێکی بوو، بەپێی بوارو لێهاتوویان. بۆ قووتابیەکانم پۆل بووە پەنجەرەیەکی ڕووناکی، تێکەڵ بوون بوو بە کۆمەڵگا لە ڕێگای کۆمپیوتەر، هەناسەیەک بوو بۆمانەوە و بەردەوامی، بەرگریەک لە داخستن وقەدەغەی هاتوچۆ. لەلایەکی ترەوە، وەڵامێک بوو بۆ ئەو زوڵم وستەمەی کە لە ولاتی زێد لێیان کرابوو، زمانی دایک یاساغ بووە. قوتابیەکانم بونە سەرمایەیەکی بەنرخ بۆ پۆلەکەم، هەوڵی ئەوان وهەوڵی من ئاویزان بوون، هاوکێشەیەک بوو پێکەوە لەیەک جودا نەدەکرایەوە. نە من بێ بوونی وان کارم پێدەکرا نە ئەوانیش بێ من پۆلی زمانی دایکیان دەبوو. لە کۆتایی ڕۆژەکەدا پاداشتی من، جوانی زانستی زمان بوو، زەردەخەنەی قوتابیەکم بوو، کە پێی دەوتم سوپاس مامۆستا، من ئێستا فێر بووم بەکوردی ناوی خۆم بنووسم.
چیرۆکی یەک لە قووتابیەکانم لە قۆناغی دوو؛
قوتابیەکانی قۆناغی دوو بە کوردی دەدوان، وەلی لە بواری نووسین وخوێندنەوەدا هەندێکیان کێشەیان هەبوو، دەبا لە نووسینی ناوی خۆیانەوە دەستپێکەن. ژمارەیەک لە قوتابیە نوێکانم ڕوو بە ڕوو نەدیتبوو. من تەنها لە ڕێگەی ئنتەرنێت زووم پۆلەکەم ئامادە دەکر. شەونم یەکێک بوو لە قوتابیانە، شەونم لە ناسکی وجوانیدا لە شەونمی سەر گووڵاڵە دەچوو. بڕێ شەرمن و دووڵ بوو، هەندێ جار بێ ئاگا بوو لەپۆل .گەلێ جار دوا دەکەوت، جاریش وا پێش دەهات پێش دەسپێکی پۆل خۆی ئامادە دەکر. جار جار ئەو بڕە کوردیەشی کە دەیزانی لەبیری دەچۆوە، کاتێ کۆشش وچالاکی پۆل کە دەبوو بخوێنێتەوە چەند جارێ دەیگووت بە خودا مامۆستا چرۆ ئامادەبووم ئێستا بیرم چووە. من دەستم دەکردەوە بە دووبارە وتنەوەی ڕستەکە، دەیگووت ئا، ئا بیرم کەوتەوە، با خۆم بیڵێم، بە پەلە ڕستەکەی دووبارە دەکردەوە، لەگەڵ دووبارەیی وشەکان، دووبارە دەوەستا، ڕستەکەی بۆ تەواو نەدەکرا. شەونم نەیدەتوانی کۆششکەی بەباشی بکات.
گەلێ رۆژ، شەونم بیری دەچوو کە پۆلمان هەیە، بە تەلەفۆن پێش وەخت ئاگادارم دەکردەوە. لەپۆلدا، کە پرسایری پیتێکم دەکرد لە ڕستەدا داینێن، ناوێک لە سەر زاری بوو، لەپر دەی وت. ڕۆژێک ویستم چیرۆکی ئەم قوتابیەم لا ڕوون بێت. مۆڵەتم لێ وەرگرت تا لە نزیکەوە لەگەڵی بدوێم، ئەوکات زانیم کە شەونم خۆشکی یەک لە هاوڕێی ودەستە خۆشکی ئازیزم لە کەنەدا خاتوو شیلان، ساڵانێکی زۆرە دوو کوڕی رۆح شیرینی شیلان قوتابین لە پۆلی یەک لە زمانی کوردی.
کاتێ گوێبیستی چیرۆکی قوتابیەکەم بووم، چیرۆکێکی نوێ نەبو، چیرۆکی زۆرینەی پەناهەندەی گەلی کورد بوو، چیرۆکی دابڕان لە وڵاتی زێد وجیابوونەوە، دووری لەخۆشەویستان، لە کوڕە تاقانەکەی. چیرۆکی غوربەت و جیابوونەوە. ڕەزا تەمەن ٢١ ساڵە، لە تەمەنی پانزە ساڵیدا، بە ڕووداوێک، وەیان هەڵەی پارێزەرێک ولەهەمان کاتدا وەک کورد کە مافی هاوڵاتی لێ زەوت کراوە، مافی سەفەری نەبوە، نەیتوانیوە لەگەڵ شەونمی دایکی سەفەرکات بۆ کەنەدا. شەونم شەش ساڵ مۆمی لەدایک بوونی بەتەنها بۆ کوژاندۆتەوە، بەحەسرەتی بەیەک گەشتن. شەونم نەک هەر گریان فریایی نەدەکەوت، دەژیا تەنها بۆ ئەو چرکە ساتەی بۆ جارێ باوەش بکات بە کوڕە تاقانەکەیدا. ئەو منداڵ وهاوژینەکەی لەگەڵ نەبوو، لەکوردستانی ڕۆژهەڵات مابونەوە، شیلانی خوشکی پشت وپەنای بوو، هاندەری بوو بۆ ژیان وگوزەران. شەونم نەیدەیویست کە دڵخۆشی کەس تێک بدا، لە کۆبونەوە وچونە دەردا، بەڵام لەناخدا وەک لاشەیەکی بێ ڕوح دەژیا، ئازاری دابڕان لە کوڕە تاقانەکەی لە ناخیدا پەنگی دەخوارد زۆر جار زەردەخەنەیەکی بە خۆی بەڕەوا نەدەدی، لەپڕ دەیدا لە پڕمەی گریان.
لە کۆتایی مانگی دیسەمبەر ساڵی ٢٠٢٣، خاتوو شیلان خوشکی شەونم، پەیامێکی بۆ دانام، ئیتر ئەو کاتە مێژوویەی کە شەونم لە فرۆکەخانەی تۆرنتۆ چاوەڕوانی ڕەزا دەکات. من نەم زانی چۆن هەستم دەربڕم، دەم ویست ئەو چرکە ساتە کە شەونم باوەش بە ڕەزادا دەکا لە هزرمدا تۆمارکەم، لەو کاتەدا بژیم، بەچاو بیبینم. ئەو کاتە بوو شەونم وتی من ئیتر هیچ ویستێکم نەما دەمەوێ بمرم.
ڕەزاش وتی من ژنێک باوەشم پێدا دەکات، هەست دەکەم نایناسم، ئەوەی من گفتووگۆم لەگەڵ دەکرد لە تەلەفۆندا بۆ ماوەی ئەم شەش ساڵەدا لە ڕاستی نەدەچوو. کە دایکم ڕۆی، لە پێشدا زۆر ستەم بوو بێ دایک گەورە بم، پاشان بۆم دەرکەوت هەموو شت ڕاهاتنە. ڕاهاتم لە بێ دایکی، کاتێ دەچوومە ماڵی نەنکم هەستم بە قەرەباڵغی دەکرد لە دەورو پشتم ئەو کاتانە بۆ من باشتر دەگوزەرا. باوکم زۆر چاک بوو، من لەگەڵ ئەو دەژیام، جار جار بۆڵەمان دەهات، بەڵام دەڵێم هەموو شت ڕاهاتنە.
لە کۆتایی مانگی دیسەمبەر شەونمم دیت بۆ یەکەم جار لە ماڵە خنجیلەکەی کوڕەکەی لەگەڵە. نە دڵی باوەڕ دەکات، نە هەست دەکات کە ڕاستی بێت. ئەو شەوە وشەوی پێش گەشتکردنیان هیچکامیان نەنووستبوون، خەو لە چاوی هەردووکیان زڕابوو، ساتەکان تەنها تێڕوانین وگێڕانەوەی ساڵەکانی دابڕان بوو. شەونم پاش شەش ساڵ بە کوڕە تاقاناکەی گەیشتەوە. چیرۆکی قوتابیەکەم، دەسپێکی ساڵی نوێ، شاد بوونەوەی بە کوڕە تاقانەکەی.
December 27, 2023
