زۆربەی جار.. شیعری نەوزاد بەندی
زۆربەی جار کە دەنگت ئەبڕێ ،
ئەڵێم بەجێی نەهێشتبم بۆ یەکجاریی ؟
دوو هێڵی ڕاست و چەپی
پیا هێنابم بە ناچاریی ..؟
ووشەیەکم ،
دڵی وورد و خاش کردبێ ..
سەرنجێکم ،
ئارامیی لێ هەڵگرتبێ ..
ئەڵێم نەڕۆیشتبێ بۆ دوور ..
نەیبڕیبێ دەیان سنوور ..
ئەڵێم نەخۆش نەکەوتبێ
لە نەخۆشخانە خەوتبێ ..
تەنانەت دوورتریش ئەڕۆم ،
ئەڵێم دڵی
لە لێدان بێزار نەبووبێ ..
لە پڕ توابێتەوە وەک مۆم ..!!!
ئیتر نامەی ناڕەزایی و
هاوخەمی
ئەنێرم بۆ خۆم ..!
٭ ٭ ٭
زۆرجار کە ئیتر وون ئەبی ،
بە هەفتە و مانگ ..
ئەڵێم تەواو ..
منی لابردووە لەلای خۆی ..
ئیتر بەخۆم ئەڵێم بڕۆ ..
نەبا بێتەوە لە ناکاو ..
دڵ پڕ کاتەوە لە خورپە و
چاویش لە ئاو ..
هەوری خەونەکان دامپۆشن
وەک بەنگکێش ، وون بم
لەبەر چاو ..
خەریکە دەرچم لەو زۆنە ..
لە پڕ نیوەشەوێ ئەڵێی :
نەوزاد چۆنە !!
٭ ٭ ٭
زۆر جار ئەڵێم ،
بێ پێشەکی ، دەستی بگرم ،
تا ئەو سەری دنیا ،
نەهێڵم قوتار بێ ..
بەڵام نایشزانم لەو سەری
دنیا چی بکەین ،
کە من خۆڵەمێشی مات و
ئەو نەورۆزی نەوبەهار بێ ؟
پەشیمانیی ئەمکاتەوە ،
بە نادیارەکەی جارانت ..
ئەمخاتەوە ناو سەنگەر و
ئەمداتەوە دەست میلیشیای دڵەڕاوکێ ..
ئەمخواتەوە لە ئاهەنگی نازانم کێ..
شتی تریش …
