سۆناتای زەمەن.. ستیڤان شەمزینی
دەزانم چۆن ئێستا بە ھاوارەوە ئەژیم
رۆژێک بە بێدەنگی ئەمرم
نامەوێت زاری قەڵەم ببەستم
با زریکەی بگاتە ئۆرانۆس
خوێنی لەشی بگاتە
بەردەم دەرگای ماڵی یار
تەنیا یەک وشە ئەھێڵمەوە
بۆ سەرەمەرگ:
خۆشم ئەوێی
دەزانم چۆن ئاوی ژیانم
لە سەرچاوەوە لێڵە
مەرگێکی تەڵخ
لەسەر رێی چارەنووسمە
رێ لە لافاوی فرمێسک ناگرم
با جۆگەلە ببەستێت بۆ بەردەم زیۆس
با بە ھاژەوە بەلای یاردا تێپەڕێت
تەنیا یەک دڵۆپ دەھێڵمەوە
بۆ سەرەمەرگ:
دڵۆپی دوا دێڕە شیعر
گوێ نادەم بەوەی
گروپێک شەمشەکوێرە
نیازی کوشتنی خۆریان ھەیە
ئاوڕ لەو گوڵە گەنمە سەوزە نادەمەوە
لە دەمی سن و کوللەی غەمێکی ئەزەلیدایە
بە لای تەرمی مەسیحدا تێدەپەڕم
لە خاچی بێھودەیی دایناگرمە خوارێ
رەنگە پێتان سەیر بێت ئەوەندە دڵڕەقم!
خۆم خۆر و گوڵە گەنم و مەسیحم
بەسەر تەرمی خۆمدا
بە تەنھا شیوەن ئەکەم
تۆش بەلامدا تێدەپەڕیت
وا دەزانی شۆخی ئەکەم
بایەقوشی بێزاریی
لەسەر رۆحی رۆشنایی دەخوێنێ
دەستم لەژێر چەنەم داناوە
تەنھا تەماشا دەکەم
پاسەوانانی ئەھریمەن
بە شمشێری رق
جەرگی شەوقی
ئاتەشتگایەکی دێرین ھەڵدەدڕن
بە بێدەنگی
کتێبی ھەڵھاتن ئەخوێنمەوە
راوچییە تووڕەکان
نیشانە لە سوێسکەی شیعر ئەگرنەوە
دەستم تێی نەچوو
لە دیوانێکدا بینژێم
رەنگە پێتان سەیر بێت
ھێندە دڵڕەقم!
خۆم رۆشنایی و شەوقی ئاتەشتگا و
سوێسکەی شیعرم
لە کەنارێکدا خەریکم
گۆڕ بۆ خۆم ھەڵدەکەنم
تۆش بەلامدا تێدەپەڕیت
وا دەزانی گەمە دەکەم
ئای چەند سەختە ئەم زەمەنە
بۆ دۆزینەوەی خۆشەویستی
دەبێت سەر بکەیت بە مۆزەکاندا
لە مۆزەی لۆڤەر
بەردێکی رەقم بینی
لەسەری نوسرابوو
پەیکەری خۆشەویستی
مێژووەکەی
بۆ چاخی بەردین ئەگەڕایەوە
بیرم کردەوە
لە چەرخی بەردینی دڵەکاندا
پەیکەرێک بۆ خۆشەویستی دابتاشم
رەنگە رەنج بەخەساریش دەربچم
ئای چەند زەحمەتە ئەم زەمەنە
بۆ دۆزینەوەی کتێب
دەبێت روو بکەیتە ئەرشیفخانەکان
لە ئەرشیفخانەیەکی بەرلین
کتێبێکم دۆزییەوە
لەسەری نوسراو بوو
کتێبی خۆشەویستی
تۆز و خۆڵی مێژوو
بە رووخسارییەوە بوو
لە پشتەوەیدا
دێڕێکی سەرنجڕاکێش ھەبوو:
ئەم کتێبە بۆ مرۆڤی دێرین نوسراوە
بیرم کردەوە
لە چاخی مەرگی کاغەزدا
کتێبێک لەسەر خۆشەویستی بنووسم
کێ ناڵێت دوای ئەوە
نامبەن بۆ شێتخانە؟
ستیڤان شەمزینی
