چیرۆک\ هەورەتریشقە.. نووسینی: ئامانج شێروانی
هێشتا چەند کیلۆمەترێکی مابوو بگاتەوە ماڵەوە، دیمەنی دڵڕفێنی ئەو دارستانە جوانە ڕەهایان نوقمی جیهانێکی ئەفسووناوی کردبوو. لەگەڵ هەر دارێک کە ڕەتی دەدا، لەگەڵ هەر جۆگەلەیەک کە بەجێی دەهێشت، لەگەڵ هەر شەماڵێک کە قژەکەی پەخشان دەکرد، دڵی هێندەی تر دەگەشایەوە. لەم هەموو نەهامەتی و ڕاکەڕاکەیە، ئەم یەک دوو کاژێرەی چوون و هاتنەوەی تۆڵەی هەمووی دەکردەوە. هەموو ڕۆژان سەر لە بەیانی زوو، لە خەو هەڵدەستا و بە پەلەپەل خۆی ئامادە دەکرد و پارووە نانێکی دەپەستایە دەمی، کۆرپەکەی دەبردە باخچەی ساوایانی نزیک ماڵیان، دەستبەجێ پازی دەدایە سەر پاسکیلەکەی و بەرەو کارەکەی دەڕۆیشت.
سەیرێکی ئاسۆی کرد، هەورێکی ڕەشی بینی، سەدان پەڵە هەوری ڕەشی تری بەدوای خۆیدا ڕادەکێشا، پەیتا پەیتا بەری ئەو ئاسمانەیان لێ دەگرت. لە دوورەوە سەرنجی تیشکێکی دا، دەنگێکی گەورەش لەدوای ئەو کە هەر لە تەقینەوەیەک دەچوو. برووسکێکی تر و گەوارەیەکی تر، سەدان برووسکی تر و سەدان گەوارەی تر، ئەو سروشتە جوانەیان لێ کرد بە دیمەنی جەنگێکی ترسناک، جەنگێک لەگەڵ ئاسمان، جەنگێک لەگەڵ سروشت! خۆی هەندێک کۆکردەوە و چاپووکانەتر پێیەکانی بە پەیدانی پاسکیلەکەدا دەکرد. ((دەبێت زوو بگەمەوە ماڵەوە، کۆرپەکەم چاوەڕێمە)).
لەگەڵ هەر برووسکێک دڵێکی دەڕژایە سەر زەوی، لەگەڵ هەر گەوارەیەک هەناوێکی دەکەوت. وەک بڵێی خوداوەندی باوبۆران سووڕ بووبێت لەسەر تاساندنی ئەم دایکە بەستەزمانە، ئەم دایکە کۆڵنەدەرە. ئەمجارەیان بارانێکی بەلێزمەی خوڕیشی داکرد. ئاو وەکوو جۆگەلەیەک بە لەشیدا دەهاتە خوارەوە، جلەکانی تەڕ تەڕ، هەگبەکەی پشتیشی تژی ئاو. ڕەها وچانێکی تری دا و هەندێکی تریش پەیدان لێدانەکانی خێرا کرد. لە دڵی خۆیەوە دەیگوت: ((دەبێت زوو بگەڕێمەوە ماڵەوە، دەبێت ڕۆڵەکەم لە باخچەی ساوایان بهێنمەوە)).
دەنگی تەقینەوەیەک لە پشتییەوە هات، دووکەڵێکی چڕ بەری ئاسمانی تاریکتر کرد. بیری کەوتەوە کە دەبێت خواردن بۆ پشیلەکەی دابنێت. ئێستا ئەویش لە ماڵەوە چاوەڕوانیەتی، پەرۆشی کەمێک یاری کردنە. برووسكێکی تر ڕێک لەبەردەمی بەر زەوی کەوت و ئاگری لە دارێکی زەبەلاح بەردا. هێندەی تر هێزی دا بەر خۆی و هێشتا پەیدان لێدانەکانی خێراتر کرد. بیری کەوتەوە کە بەیانی دەبێت ڕاپۆڕتەکەی ڕادەستی بەڕێوەبەرەکەی بکات.
لێزمەی باران بەهێزتر و برووسکەکانیش گەورەتر دەبوون. پەیتا پەیتا هەستی بەرگریکردنی کەمتر و هەستی خۆبەدەستەوەدانی بەهێزتر دەبوو. ئەمجارەیان لەگەڵ هەر برووسکێک شاگەشکە دەبوو، لەگەڵ هەر گەوارەیەک دەیدا لە قاقای پێکەنینێ! خۆ ئەگەر ڕەهات نەناسیبا، گومانت نەدەبوو کە ئەو تەنها کچێکی شێتە، و هیچی تر. پەیدان لێدانەکانی هێواشتر و پەڵەهەورەکانیش چڕتر دەبوون. تەزوویەکی خۆشی بە لەشیدا هات. گومانی نەبوو کە ئەمشەو جگەرگۆشەکەی لەباوەشێکی گەرم خەو دەکاتەوە، گومانی نەبوو کە پشیلەکەی لە ئامێزی میهرەبانێک دەبۆرژێت.
ئاسمان ڕووناک ڕووناک بووەوە. زەوی وشک وشک، نە هەورەتریشقە، نە گەوارە، نە باوبۆران. دارەکان تێراو بوون، گژوگیایەکانیش سەوز سەوز. دیسان ئارامی باڵی خۆی بەسەر ئەو دارستانە چڕەدا کێشایەوە. چاوەکانی کردەوە، ئاسمانی ساماڵ هەناسەیەکی گەرمی بە جەستەیدا هێنا. دوو کەسی بینی، لەبەردەمی شتێکی نامۆ وەستابوون، شتێک کە وەک هیوایەک وابوو، شتێک کە وەک پەرۆشی وابوو، شتێک کە پڕ متمانە، پڕ ئومێد، پڕ ئاوات بوو. لە دوو کەسەکە ورد بووەوە، گوێی خۆی بۆ قوڵاخ کردن، بیستی کە باسی ژنێک دەکەن، کە خاوەنی منداڵێک و پشیلەیەک بووە، دوێنێ ئێوارە بە سواری پاسکیلەکەی لە کارەکەی دەگەڕایەوە، کەچی لەگەڵ باوبۆرانەکەی دوێنێ شەو برووسکێکی بەر کەوتبوو، سەراپای ببووە خەڵووز!
