نرکە نرکی نیوەشەو.. بەشی دووەم و کۆتایی.. شیعری: ستیڤان شەمزینی
لە نیوەشەودا فێ دەمگرێت
بەرد دەگرمە ئاوێنەکانی دوێنێ
چون نەیانتوانی ئەمڕۆم ببینن
بەسەر پشتی ئەسپی عەشقەوە دەگلێم
نرکەم دەگاتە کەشکەڵان
کوندەپەپوو لەسەر ئایندەم دەخوێنێ
ھەموو ئەو ھیوایانە سەردەبڕم
وەک وەھمێک لە بۆشایی خەیاڵدا
دروستم کردبوون و
ھەموو تەمەنمیان ھەڵلووشی
پەلاماری ئەو خەونە دووبارانە دەدەم
وەک چەقۆیەک لە قەبرەغەم دەدرێن و
بۆنی خوێنی بەزینیان لێدێ
لە چیای بەرزی غرورەوە
خۆم ھەڵدەدەمە دۆڵی لەناوچوونەوە
تەنیا بۆ ئەوەی پەریە ژنێک
تەرمی ھەلاھەلام ھەڵبگرێتەوە
لە نیوەشەودا
دەنگێکی غەریب بانگم دەکا
ھێی ئەی موسافیری رێی شکست
خەیاڵە تەڕەکانت لە شیعردا بھۆنەوە
ئەم بەختەوەرییەت زۆر نابات،
دابڕانێکی ئەزەلی چاوەڕێتە
مەرگێکی ئاگراویی لەبەردەم دەرگاتە
ئەمێستا نازانم
خەونەکانم بنووسمەوە
یان بەسەر باڵای رۆژگارمدا بگریم؟!
نازانم سەفەر بکەم بۆ ناو خۆم
یان لە پێش چاوی تۆدا بتوێمەوە؟!
نازانم قەڵەمەکەم لە سێدارە بدەم
یان بیچەقێنمە
چاوی نوقاوی ھەقیقەت؟
نازانم لەم پایزەی عومردا
بە بۆنی گوڵێکی رۆژھەڵات
بە ئامێزی بەھار دەگەمەوە؟!!
لە نیوەشەودا
ھیچم لەسەر خۆم بیر نایەتەوە
جگە لەو چاڵە رەشەی ناو مێشکم
کە ناوی غەمە
ھیچم لە رابردووی خۆم
بیر نەماوە
تەنیا ئەوە نەبێت
چرایەکم ھەبوو شکا
ھیچ لە بارەی ئێستای خۆمەوە نازانم
تەنیا ئەوە نەبێت بە پێی پەتی
بەسەر شووشەی شکاوی
تەمەندا رێ دەکەم
نازانم لە ئایندەدا
چ بەڵایەکی ترم بەسەردێ
تەنیا ئەوەندە نەبێ
لە دڵی یاردا ھەڵدەکوڕزێم
بین دەنێم
بە گۆزەی بەتاڵی ماچەکانییەوە
دەرگایەک بەرووی خۆمدا دەکەمەوە
خاڵی لە ئەو و
تەژی لە نەزعەی خۆکوشتن
ئەو ھەورە رەشەی
سایەی بەسەرمدا کردووە
چەقۆ دەبارێنێت
بۆ لەشی گۆرانییەکانم
ئەو رەشەبایەش کە لرفە لرفێتی
پەیامی ھەڵوەرینی منی پێیە
لە دڵی شۆخە ژنێکدا
لە نیوەشەودا
دەبمە تارماییەک
لە کوچە تاریکەکانی ژیاندا
دەزریکێنم
لە بەردەم درەختی سوورباوی
دڵی ژنێکدا دەوەستم
ھاوار دەکەم
ئەی شەپۆلاویترین خۆرەتاو
ئەو دڵەی من
ھێندە ناسک بۆتەوە
بە باڵەفڕکێی پەروانەیەکیش
درزی تێ دەبێت
رۆحی ئاوریشمیم
بە جۆرێک نەرمە
دەتوانیت بە لۆکەش
سەری ببڕیت
ئەو چاوانەم
ھێندە خەردەلی درۆیان تێزاوە
بە یەک وشەی سارد وەک کانییەک
لە سەردەمی وشکەساڵیدا
کوێر دەبنەوە
ئەو گوێیانەی من ئاخنراون
بە دەنگی ھەرەس
بە چرپە
باسی ئەو شەھیدانەم بۆ مەکە
دڵیان بە ئەستێرەی کاروانکوژە
خۆش کردبوو
ئەو ھەنگاوانەم ھێندە سست بوون
بە ھەزار ساڵیش
ھەورازەکانی ئەوینی تۆ و
نشێوەکانی غەریبیی خۆمم
پێ نابڕدرێ
سەرم ھێندە
لە ئانی کڕنووش ماوەتەوە
لە ئاستی جوانی تۆدا
بە ھەزاران فریشتە بەرز نابێتەوە
دە تۆش وەرە لەم نیوەشەوەدا
مەھێڵە وەنەوزی نائومێدیی بمباتەوە
ئاڵای خۆشەویستییەکی ئەبەدیی
لە ناوەڕاستی جەرگم بچەقێنە
شیعری: ستیڤان شەمزینی
