(30) چرا بۆ یادی پاشای حەیران رەسوڵ بێزار گەردی دادەگیرسێنین.. هەندرێن خۆشناو
ئەمڕۆ پێنج شەممە 17/10/2024 شنە بای یادی سی ساڵەی ماڵئاوایی مامۆستای هونەرمەند رەسوڵ بێزار گەردی بەسەر كوردستان و هەولێری لاوك و حەیران و هونەر و موزیك و هۆنراوە گوزەردەكات، و كەڵە هونەرمەندی رەسەن مامۆستا بێزار گەردیمان دێنێتەوە یاد، و دەنگە بە سۆز و ئاوازە دڵرفێنەكانی بە گوێمان دەچرپێنێت، و هەستی پڕ عەشق و خۆشەویستیمان دەوڕوژێنێت، و پێمان دەڵێ مامۆستا (رەسوڵ) تان بێتەوە یاد، كە سیمبول و نیشانەیەكی دیاری شاری هەولێرە، رۆحی پاكی ئەم هونەرمەندە مەزنە قبوڵناكات كوچە و كۆڵانەكانی هەولێری دێرین جێبێڵێت، و وەك كزە بایەكی فێنك رۆژانە بەسەریاندا تێپەڕدەبێت، هەر كە لاوكێك یان حەیرانێك یان گۆرانیەكی رەسەنی كوردی دێتە بەر گوێچكەی رۆڵە بەوەفاكانی ئەم شارە.
ئەوڕۆ ئێوارێ لەدوم هەناردی لۆچی نەهاتی ..
حەیران ئەوڕۆكە سێ رۆژە زانیتم بازن و خڵخاڵت لەكن وەستا شەریفی زێڕینگرە، جلكی بوكێنیت لەسەر خەیاتی..
خزم و برادەر هەموو دەزانن ئەتوو سەری چەند ساڵانە دۆست و گراوی من بووی.. حەیف و سەد مخابنی دنیایێم
دەمینی شەو ساڵەكە هاوینێ بە قسەی دوژمنان و ناكەسان لەگەڵ من خایەن دەرهاتی..
ئەو هونەرمەندە توانی بە درێژایی نیو سەدە لە داهێنان و خزمەتكردنی هونەر و ئەدەب و فۆلكلۆری كوردی بچێتە دڵی هەموو هونەردۆستێك، و بچێتە كاروانی نەمران و مامۆستایان لەم بوارەدا، و سەرمەدیانە لە دڵ و سۆزی خەڵك بمێنێتەوە. هەر لە منداڵیەوە خولیای هونەر و كولتور و فۆلكلۆری نەتەوەكەی بووە، و هەر لە زووەكەوە دەوروبەری هەستیان بە بەهرەمەندی ئەو هونەرمەندە كردووە، و لە دەنگخۆشی و شارەزایی لە مەقام و لاوك و حەیران، و هەروەها لە شیعر هۆنینەوە و ئاوازدانان.
بە تۆ یار پەیدا نابێ
پەیداش بێ فایدەی نابێ
سەد ساڵ خونچە بشكوی
بێ بولبول بەهار قەت نابێ
بریندارم بریندارم
رەسوڵ بێزار گەردی لە چلەكانی سەدەی رابردوو روویكردۆتە رادیۆ و ئێزگەی كوردی، بە هەگبەیەكی پڕ لە داهێنان و هونەری رەسەن و شیعر و ئاواز و لاوك و حەیران، یەكەم كەس بووە كە حەیرانی كوردی لە رادیۆ گووتوە و بە راستەخۆیی پەخشكراوە، و هەروەها یەكەم كەس بووە كە حەیرانی نووسیوەتەوە، و بەتایبەتی ئەو حەیرانانەی كە گووتویەتیەوە و بۆخۆی دایناوە و دایڕشتووە و لە دوو توێی چەند كتێبێكدا تۆماریكردوون، یەكەم كەس بووە كە حەیرانی لەگەڵ موزیكدا چڕیوە، بۆخۆشی شیعری بۆ زۆربەی گۆرانیەكانی داناوە و ئاوازی بۆ هەموو بەرهەمەكانی خۆی داناوە، بووە یەكەم كەس كە ئاواز بۆ سەرجەم بەرهەمەكانی خۆی دابنێت، بۆیە بە ئاسانی جێگەی خۆی كردۆتەوە لە نێو مامۆستا و پێشەنگانی هونەری كوردی. مامۆستا رەسوڵ سیمبولی هونەری رەسەنی كوردی بوو، چونكە لاوك و حەیران هونەرێكی تایبەت بە گەلی كوردن، و گەلەكانی تر خاوەنی ئەم هونەرە رەسەنە نین، و ئەم هونەرە بە یەكێك لە بنەما سەرەكیەكانی ناسنامەی گەلی كورد دادەنرێت.
مامۆستا رەسوڵ بێزار گەردی پێشمەرگەیەكی ئازا و نیشتمان پەروەر بووە، نەك هەر بە هونەر و نووسین بەڵكو بە گیانیش خزمەتی كوردستانی كردووە، بەشدارییەكی بەرچاوی هەبووە لە شۆرشی ئەیلولدا، و یەكێك بووە لەو كەڵە پیاوانەی هەر لە سەرەتاكانی دامەزراندنی ئێزگەی دەنگی كوردستان بەشداری تێداكردووە بە گوتنی چەندین سروودی لە یادنەكراو و هەروەها دانانی چەندین سروودی نیشتمانی، بۆتە یەكەم كەس كە سروودی نیشتمانی و بەرگری بە شێوازی حەیران و مەقام بچڕێت.
كاروانی ئێمە كەوتۆتە رێگا
بە ئامانجی كورد هەر ئەبێ بگا
ئەگەرچی شەوی خەباتی ژیان
گیانی زۆر لاوی وەك گوڵ هەڵوەران
بەڵام هەر ئەبێ شەفەق دەركەوێ
كورد لەو هەورازە سەختە سەركەوێ
ماڵئاوایی كردنی ئەم هونەرمەندە مەزنە، كەلێنێكی گەورەی كردەوە لە هونەری كوردی، بە تایبەتی لە بواری لاوك و حەیراندا، كە زۆر ئاشكرا هەست بەو كەلێنە دەكرێت، و كاریگەرییەكی گەورەی كردە سەر هونەری گۆرانی و موزیكی كوردی، چونكە رەسوڵ بێزار گەردی بەمانای وشە میری حەیران و حەیرانبێژان بوو، و رێباز و رێچكەیەكی تایبەتی خۆی هەبوو، و جێپەنجەی لە هونەری كوردیدا دیار و بەرچاوە. ئەو بلیمەتە بە دەنگە خۆش و بەسۆزەكەی سەدان گۆرانی و لاوك و حەیران و مەقام و سروودی چریوە و مەحاڵە لە یادبكرێن، كە وەك گەنجینەیەك بۆی بەجێهێشتین.
مامۆستا رەسوڵ بێزار گەردی دوایی چەندین ساڵ لە بەرەنگاربوونەوەی نەخۆشی دڵ، بێنازانە دڵە ماندووبوەكەی لە 17/10/1994 توانای ترپەكردنی نەما و كز و بێدەنگ بوو، لە رۆژێكی وەك ئەمڕۆدا و سی ساڵ لەمەوبەر رۆڵە بەوەفاكانی هەولێری دێرین لە ئەدیبان و نووسەران و هونەرمەندان و خزم و برادەران، تەرمی پاكی ئەو زاتە مەزنەیان بە خاكی كوردستان سپارد، دوای ئەوەی بە گشت كۆڵان و شەقامەكانی هەولێردا دوایین گەشت و گەڕانی كرد، و ماڵئاوایی و خواحافیزی لە هەموو خەڵكی هەولێر و كوردستان كرد. یاخوا لە باوەشی خاكدا هەر شاد و سەربەرز بیت.
