دزینی ووتار.. نەوزاد بەندی
هەموومان ، نوسینمان لێرە و لەوێ ، براوە .. شیعرمان فڕێنراوە .. ئیتر لە کۆمەڵگایەکی سەیردا ئەژین ، تەنانەت یەکێک لەو ماعیرانەی کە شیعری بەندەی بردبوو بەناوی خۆیەوە لە پەیج و ڤیستڤاڵەکاندا خوێندبوویەوە ، پێم ووت : ( بۆچی شیعری منت دزیوە ؟ )
پێی ووتم : ( خۆ شیعری تۆ قورئان نییە !! بە دڵم بوو بردم !!)
ئاخر وەڵامی چی دەدەیتەوە ؟؟
هەر ئەوەندە پێم ووت پەشیمانم کە دانەیەک لە دیوانە شیعرییەکەم پێشکەش کردووی ، هەر ئێستا بیدڕە و بیکەرە تەنەکەی خۆڵەکەتەوە بۆ ئەوەی لەوە زیاتر نەیاندزیت !
لەم ڕۆژانەیشدا شتێکی سەیر ڕووی دا ، هاوڕێیەکم ڤیدیۆیەکی بۆ ناردم ، براڵەیەک بە ناوی بەرزانەوە ، بابەتێکی وەرگێڕراوی بەندە دەخوێنێتەوە لەسەر میرزا ئەدیب ، ئەو شاعیرە پاکستانییەی کە دزێک گیرفانی ئەبڕێت ، کە ئەبینێ تەنها نۆ ڕوپیەی پێیە و بە تەمایه بینێرێ بۆ دایکی بە داوای لێبوردنەوە کە پارەیەکی کەمە بەڵام بە هۆی لە دەستدانی ئیشەکەیەوە ناچار بووە ئەو بڕە کەمەی بۆ بنێرێ ، دزەکە غیرەت ئەیگرێ و ..41 ڕوپێی خۆی ئەخاتە سەر 9 ڕۆپێکە و ئەینێرێ بۆ دایکی میرزا ئەمین ..هەتا دوایی ..
ئەم بابەتەم بەناوی دزی شەریف و نیشتمانفرۆشی دز ، لە مانگی ئابی 2024 لە پەیجی دەنگەکاندا بڵاو کردۆتەوە کە لە ڕاستیدا لە زمانی عەرەبییەوە وەرمگێڕا بوو ..
ئەو بەرزانە بابەتەکەم بە هەڵە و شێواوییەوە ئەخوێنێتەوە ، بۆ نمونە من وتوومە : ( میرزا ئەدیب کە لە ساڵی 1999 کۆچی دوایی کردووە …) ئەو ئەڵێ : ( میرزا ئەدیب لە ساڵی 1999 لە یەکێک لە کتێبەکانیدا ئەڵێ ..!! )
بەم دۆخە سەرسام نەبووم ، شتێکی ئاساییە ، وڵاتێک دز فەرمانڕەوایی بکات ، بێگومان دزیی ئەبێتە پیشەیەکی بەرز و شاهانە ، وەک چینییەکان ئەڵێن فەمانڕەوا هەر هیوایەت و حەزێکی هەبێ ، ئەو هیوایەت و حەزه لەناو هاووڵاتیاندا دەبێتە جێی بایەخ و گرنگیپێدان ..بەڵام ئەوەی وای لێکردم ئەم چەند دێڕە بنووسم ئەوە بوو ، چۆن ئەو براڵەیه ڕێی بەخۆیداوە بابەتێک کە باسی دزی شەریف و نیشتمانفرۆشی دز ئەکا ، ببات و بە ناوی خۆیەوە بڵاوی بکاتەوە ؟؟ بە بێ ئەوەی بڵێ ئەم بابەتە فڵان کەس وەریگێڕاوە ؟؟ نا .. هەروەک ئەوەی خۆی لەگەڵ میرزا ئەدیبا بووبێت بەو جۆرە بڵاوی کردۆتەوە ..ئەوەیش لینکی ڤیدیۆکەی ئەو و بابەتەکەی بەندەیە :
https://www.facebook.com/share/v/1H32HsGYFj/?mibextid=D5vuiz
