ئۆپەرێت: سنوور.. نووسینی: ئامانج شێروانی
نەبەز:
کەژاڵی چاو جوان، کەژاڵی چاو جوان
لە تاوی عیشقت، دڵم کەوتە ژان
هەر لەو ڕۆژەوەی کە تۆم دی لەوێ
خەو لە چاوانم هەرگیز ناکەوێ
لە ڕێی کانییان، ئاسکی باسک
بەناز و عیشوە، بە غەمزەی ناسک
دڵت ڕفاندم، شەیدات بووم شەیدا
دێوانەت کردم، دڵم پڕ سەودا
کەژاڵ:
نەبەزی دلێر، نەبەزی دلێر
ئەی کوردی نەبەرد، ئازا وەکوو شێر
شەو و ڕۆژ هەردەم لە خەیاڵمی
گیرۆدەی دەستی زوڵمی زاڵمی
هەر لەم ڕۆژەوەی تۆم دی لای کانی
لە خەیاڵمی شەو تا بەیانی
ناتە ناو دەستم سێوی پڕ مێخەک
یاری چاونەترس، پڕ وەفا و ئەمەک
ئێستاش چاوەڕێم، چاوم لە ڕێتە
گیانم قوربانی گەردی بەر پێتە
نەبەز:
نەفرەت لە شەڕ و لە دوژمنانمان
لە سەفەربەرلک، جیهادی تورکان
سەدان ساڵ پاڵەین، ئەوانیش سەردار
کە هاتە بێنیان، کەوتنە گریە و زار
گوێمانیان کاس کرد، بە قسەی زلیان
قەرداش قەرداش و جەنگی گاوران
من چیم لە تورکە، لە ئالی عوسمان
زمانم کوردی و شاهم شاماران
چەند ساڵە لەبەر خزمەتی سوڵتان
ئاوارەی کێو و کەژ و کۆساران
کورد هەتا کەینێ حاڵی وا دەبێ؟
نۆکەری فارس، تورک و عارەبێ
هەتا کەی خاوەن وڵاتمان نەبین؟
هەڵی کەین ئاڵا، ئاڵایێ ڕەنگین
چیرۆکبێژ:
هاتن وا هاتن، لەشکر وا هاتن
دوژمنی خەڵکی شار و دێهاتن
نە ئەویان دۆستە، نە ئەمیان هاوڕێ
کورد لەم نێوەدا، بەڵای هاتە ڕێ
شەڕ دەستەویەخە، شەستیر و هاوان
یەک یەک دەپێکێ لاوی کوردستان
گرمە و ڕمبەڕمب، حەوت شەو و ڕۆژان
شار و وڵاتیان وێران کرد، وێران
لە هەموو لایێ، لاوی تازەجوان
بە پۆل دەوەرن، وەک گەڵای خەزان
دایکی شەهیدان، کەوتنە گریانێ
لە کرمانشانێ هەتا کۆبانێ
دەشت و دەر هەمووی ئاگر بارانە
خەڵتانی خوێن بوو ئەم کوردستانە
هەر چی کە کوردە وا بوو ئاوارە
ئەمڕۆ ئاهەنگی گورگ و کەمتیارە
بەشی کورد هەردەم گریە و ڕۆڕۆیە
هەردەم خۆ کوژی و شەڕە پەڕۆیە
ئەو کلکی ئەو لا، ئەم کلکی ئەم لا
لەم نێوانەدا، بووین هەلاهەلا
کەژاڵ:
هەواڵمان بۆ هات، هەواڵمان بۆ هات
شەڕ ڕاوەستاوە لە شار و دێهات
دەستم دامێنت، ئەی چەرخی گەردوون
بێوەی بێ یاری عاشق و مەجنوون
ژێر پێم سووتایە، ئۆقرەم نەمایە
یاری شیرینم کەی دێ خودایە
چاوم هاتە دەر لە چاوەڕوانی
یار کەی دێتە لام بۆ دەستگیرانی
ئاخۆ تۆ بڵێی، ئێستاش وەک جاران
شێت و شەیدام بێ، یاری نەوجەوان
یاخۆ تۆ بڵێی، لەوێ لە سەنگەر
کچێکی جوان و باریکە کەمەر
بە لەنجەولاری شێتی کردبێ
بە تیری چاوی دڵی بردبێ
ئۆقرەم لێ بڕا، هۆشم نەمایە
یاری شیرینم کەی دێ خودایە
نەبەز:
کەژاڵ وا هاتم، کەژاڵ وا هاتم
شێتی دیداری بەژن و باڵاتم
چرای ژینمی، مەرهەمی ژانمی
شێرکۆ گوتەنی، تۆ نیشتمانمی
ئاخۆ تۆ بڵێی یاری چاو جوان
چاوی لە ڕێم بێ وەک جاری جاران
خۆ لەوانەشە، کوڕێکی زەنگین
خاوەن تەلار و کۆشکێکی ڕەنگین
بە قسەی شیرین، بە ماڵ و سامان
فریوی دابێ، بە گفت و پەیمان
کەژاڵ:
چارم ناچارە، ئیدی خۆم ناگرم
سەر لە بەیانی، سەرم هەڵدەگرم
بەرەو ئاسۆی ڕوون، بەرەو یارەکەم
تاکوو نەیبینم، مەرجە سڵ نەکەم
نەبەز:
گیرۆدەی دەستی یاری شیرینم
ماندوێتیم ناشکێ، تاکوو نەیبینم
سەرم هەڵدەگرم پەیمانم داوە
تاکوو نەیبینم ناڕۆم لەم ناوە
چیرۆکبێژ:
کەژاڵ لە ئەمبەر، نەبەز لە ئەوبەر
ڕێگەی جەنجاڵی، گوندیان گرتە بەر
ئەویان لەم گوند و ئەویان لەو دێیە
ماوەی نێوانیان یەک قۆناخ ڕێیە
تامەزرۆی دیدار، وان بە نەرمەغار
بۆ یەکدی دەڕۆن، دوو دڵ و دڵدار
هەر چەند هەنگاوێ دوور بوون لە یەکتر
وا بە باڵ کەوتن، وەکوو دوو کۆتر
بەڵام خۆشییان هەتا سەر نەما
هیوا و ئاواتیان یەکسەر داڕما
دوو دەستەیان دی، دوو دەستە عەسکەر
یەکیان ڕوو لەمبەر، یەکیان ڕوو لەوبەر
چەکیان لە شان و بوغز لە چاوان
دابەشیان دەکرد خاکی کوردستان
دەنگی کەڕەنا و نەعرەتەی زوڕنا
هیوای ئەوینی وانیان لە گۆڕ نا
هاواریان هەستا: «ئەی سنوور بەزێن
ما نامانبینن، ئەوە بۆ کوێ دێن؟
نازانن ئیتر لێرە بەدواوە
ئەمبەر و ئەوبەر لێک ترازاوە؟
وا کێشاومانە سنووری دەستکرد
لەتلەتمان کردووە خاکی گەلی کورد
خاکی کوردانمان کردە چوار پارچە
بە زەبری هێز و گوللە و دەمانچە»
