خەڵوەتێک لە نێو گەردیلەکانی ڕووناکیدا.. شیعری کنێر حەسەن

مۆمێك ،ڕەنگ دەبارێنێتە نێو تاریکی،
دەنگێک، لە شێوەی هاواری ژەنینێکی خەمبار، لە ئامێرێکی موزیکدا دەکەوێ.
ڕووناکی لە نێوخانوویەکی قوڕیندا، بیرم دێنێتەوە، کە چرایەک لەوێدا داگیرسابوو.
کات، هەموو ڕووداوەکان، دێنێ و دەبا،
داهاتوو، چەند نادیارو دیار، لە ئێستادا دەڕوێ و شێتانە لێرەدەبێ.
لە دەرگای دەرەوە، زەنگێک هەڵدەستێ، بەڕاکردن بەرەو ئەوێ دەچم ،
تا دەگەمە دەرگا، کات پێش من دەکەوێت، کەس لەوێ نەماوە،
دەرگا ناکەمەوە، دایکم، لەوێدا لەگەڵ تارماییەک دەدوێ.
کات وەک رەشەبا، لێرە وە هەڵدەکات.
هەموومان راپێچ دەکات و من لێرەوە ون دەبم، بۆ گەڕانەوە،
لەسەیری هەڵدێری بەسەرچووندا دانیشتووم و
نائاگاییم خوێنی زامەکانم خەستتر دەکات.
لە نێو دەستەکانی ئاگاییمدا، لە سەماییەکی بێکۆتایی، لە ئاسۆییەکی سەوزباودا،
دەنگێک شارەجوانەکانی ئاوەدانیم ڕووناک دەکاتەوە.
وێران نابێت ڕابردوو، لە نێودڵدا ماڵێکی بۆ سازدەکەم،
هەموو وێنەکان ، لە ئەلبوومی دیوارەکانی هەڵدەواسم.
گشت ئەمانە لێرەن و، من دەچم دەرگا بکەمەوە، کات وەک رەشەبا پێش من دەکەوێ..
چەند بێهێزە بەسەرچوون، لە نێو ساڵ و مانگەکاندا،
کاتێک مرۆڤ ون دەکات وخۆی نازانێ،
ئێمە لە ماڵە پەنهاکانی دڵماندا حەشارمان داون.
برینێک خوێن دەبارێنێ،
زامێک لەسەر دەستی چەپم بەرەو پێدەشتی دڵ دەکشێ.
چارەسەرێکیش نییە، دەستی راستم ، دەخەمە سەر سوورایی خوێن،
وادەزانم، سووری گوڵاڵە ی بەهارەو، بەروویدا بەئارامی پێدەکەنم.
چارەسەری ترم نییە ، خوێنبەربوون، بە پانتایی دەستەکانم،
بەجوانی بوون لە ئێستا دا سارێژدەکەم.

سیحری ئازاری یادگاری و نوشتە و جادووی بەسەرچوونیش بێڕەنگتر بوون،
کاتێ ئێستا بە ئەسپایی کشا بەرەو هەواری من.
لە پیاسەیەکی ئارامدا لە نێودارستانێکی چر، بەڵێنماندا، نەگەرێینەوە بۆ دواوە.
کاتێ داهاتوو دەبارێ من دەستی گەردیلەکانی ئێستام دەگرم،
خۆی ونیگەرانییەکانی لە ژێرتینی تیشکی هەتاوی ئێستادا
وەک و هەڵم بەرەو ئاسمان بەرزدەفڕێ،
من عاشقی جوانییەکانی هەڵفرینی ئارامی رەوتی خۆی دەکات .
من لە ئێستادا، بۆ ئەوێ، بۆ پشوێک لە ژێر تیشکی خۆرباراندا،
بۆ سەمایەک لەنێو دڵۆپی باراندا،
بۆئەوێ و ون بوون لە خۆمدا، بۆ تەنیایی لە نێو خەندە و دەنگ و ئاپۆرای مرۆڤدا.
دەگەڕێمەوە سەرمەزاری پیرۆزی تۆ،بێدەنگی خاکی گۆڕەکەت، میهرەبانەو دەمدوێنێ.
بە چاوە داخراوەکانم، هە موو دونیام لە یەک چرکە پیشان دەدەی،
دەگەرێمەوە و دووبارە، جیهانێک بۆ تاریکی لە دڵمدا بنیات دەنێی،
جیهان کارگەو، کەرەستەی خاوە تاریکی، رۆشنایی بەرهەم دەهەنێێت.
لێرەدا من لەگەڵ خۆمدا ئاشت دەبمەوە.
لێرەوە خۆشەویستی دەستم دەگرێت،
هەتاو دێت و وەک منداڵێک بە هێوری دەچرپێنێ،
هەتاو دەڵێ، لەبوونەوەرەکانی خودا جوانی هەیە.
دووبارە، بەهەتاو دەڵێم: “لەروحی ماندووی مرۆڤدا، تۆدەبینم
لە لەگیانی بێئومێدیدا، خەم وکینە”
بێزاربووم من، لە دڵرەنجان لە بوونەوەرە دڵشکاو و توڕەکاندا،
جێگای بەزەییە مرۆڤ لەتاریکی.
بەختەوەری لە ئێستادا لە ژێر ڕۆشنایی بەسەرچوون ،
من دەگەیەنێ بەژوانێک لە گەڵ عەشقی داهاتوومدا .

01.2025

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.