چۆن بیرێکت لێ بکەمەوە.. نەوزاد بەندی
هەندێ شەو ،
بڕیار ئەدەم
بەیانی بیرێکت لێ بکەمەوە ،
بەفرەکەی نێوانمان چەند زۆر بێ ،
هەوڵ بدەم هەر چۆنێ بێ ،
بە تولە ڕێیەک ،
یەک دوو جێ پێ بکەمەوە ..
دوای ئەوەی بینینت بوو بە مەحاڵ ..
تێپەڕی هەفتە ..
مانگ ..ساڵ ..
ئەڵێم جارێ نا ..
با بڕۆمەوە بۆ ماڵ ..
دوای نیوەشەو لە خەو هەڵئەستم ،
ئەڵێن دەردی پیرییە ..
بەڵام من ئەزانم دەردی تۆیە ..
ئەڵێم پیریی هەمووی درۆیە ..
وەک نەخۆشێکی بێ عار ،
بە کاوەخۆ هەڵئەستم و
ڕۆژەکان ئەپشکنم ..
بە ئازارەوە خۆم کێش ئەکەم ،
بە خولەکەکانا خۆم هەڵئەواسم ،
شەڕ ئەکەم لەگەڵ کەوتنم ..
ڕێژەی شەکرەکەم ناپێوم ..
پەستانی خوێنەکەم پەڕاوێز ئەخەم ..
ئەڵێم بەرچاو ڕەشبوونەکەم هی ووشکە ساڵییە ..
بەو حاڵە چاو هەڵدێنم ..
جگەرەیەکی تریش دائەگیرسێنم ..
سەیری ئاوێنەکە ئەکەم ،
ئەڵێم پیریی درۆیە ..
خەتاکە هەمووی هی تۆیە ..
هەوڵ ئەدەم بیرێکت لێ بکەمەوە ،
ئەوەندە بەرزە ،
ناتوانم سەرکەوم ..
ئەوەندە قوڵە ،
ئەوەندە قورسە ،
ئەوەندە ووشکە ..
ئەوەندە دڕکاوییە
ناتوانم لە هیچ شوێنێکتەوە دەرکەوم ..
هەورێ دێت و ..
بارانێ شەقامەکان تەڕ ئەکا و
من بیابانترم بێ تۆ ..
ئەڵێم عەسر ،
لە پارکێک بیرێکت لێ ئەکەمەوە ..
عەسر دێت و ..
بە ڕیشی هەفتەیەکەوە ،
لە باخێکا ..
تەماشای ئاوێنە ئەکەم ..
ئەڵێم پیریی نییە ،
پیریی درۆیە ..
هەموو خەتاکە هی تۆیە ..
٭ ٭ ٭
وەک تاوانبارێ بۆ خۆم ئەڕوانم ..
کە لە وون بوونت ناپرسم ..
کە لە وون بوونت ناترسم ..
کە بە دواتا ناگەڕێم ..
کە بە مجەورێک ناڵێم ،
جاڕێکت بۆ با ..
ماڵی باپیرت نادۆزمەوە ..
ئەڵێم لە جەژنەوە لە ئەوروپایه ..
بۆیه لە هیچ شوێنێکەوە دەنگی نایه ..
خەمساردانە ئەڵێم هاکا سەعات یانزەی شەوێ ،
نامەیەکی نارد ،
وەک جاران ئەڵێ له سۆشیاڵ میدیا بێزار بووم ، پاشاکەم !
هەتا کەی وەک فیلمێکی دووبارە ،
وەک بینەرێکی ناقۆڵا ،
هەر تەماشا کەم ؟
تاوانبار خۆم ئەبینم ،
کە دەستەوسان دانیشتووم ،
وەک ڕۆبوتێ ، چاوەڕێم ..
تۆڕی مەسنجەر بتهێنێتەوە ..
تۆڕی ڤایبەر ،
وەک چاوبازە ،
بەیانییەک له بەردەرگا
بتڕوێنێتەوە ..
ئەوان و
تێلیگرام و ئینیستگرام و
وەتس ئەپ ، خاڵین لە تۆ ..
بێ قابیلەت خۆم ئەبینم ..
بێ وەفا ..خوێڕیی ..
دەست سپی .. کەمئاوەز ،
بۆ خۆم ئەڕوانم ..
لە نێوان جگەرەیەک و
جگەرەیەکی ترا ،
ئەڵێم سەعات هەشتی ئێوارە ،
بیرێکی لێ ئەکەمەوە ..
شیعر پێم ئەڵێ :
بۆچی شتێکی بۆ نانوسی ؟
ئەڵێم مەجالی تیا نییە ،
ئەبێ شتێکی بۆ بنووسم ..
نازانم کوێت بۆ بگەڕێم ..
بێ نمرە ..
بێ ناونیشان ..
بێ شوێن پێ ..
سەعات هەشت ئەڕوات و
بە دیار خۆمەوە دانیشتووم ..
ئەڵێم ئەرێ ناوی قوتابخانەکەی چی بوو ؟
ئەپرسم نمرەی دەرگاکەیان چەند بوو ؟
قاوەخانەی ڕەیحانە کەوتۆتە کوێوە ؟
غەزەلنوس تۆ بڵێی باری کردبێ ؟
ئەپرسم بە تەمای کەی بیرێکی لێ بکەیتەوە ؟
ترسێک هەموو گیانم دائەگرێ ..
ئەڵێم تۆ بڵێی مردبێ ..؟
خۆڵێکی وشک ،
ئەو هەموو ئینجانە شیعرەی
لە ئامێز گرتبێ ؟
ترسێک ڕۆحم پڕ ئەکا لە خورپە ..
کابوسێ
گیانم پڕ ئەکا لە ترپە ..
ئەڵێم تۆ بڵێی نەخۆش نەکەوتبێ ؟
لە بینین و
لە بیستن و
لە کی بۆرد نەکەوتبێ ؟
لە نەخۆشخانەیەکی ئەوروپا نەخەوتبێ ؟
ئەڵێم سبەینێ زووتر نییە ،
بیرێکی لێ ئەکەمەوە ..
لە ئاوێنەکەدا خۆم ئەبینم ..
ترس یەکپارچە دایگرتووم ..
پیریی هەمووی درۆیه ..
ئەو پەیکەرە تێکشکاوە ،
هی من نییە ..
تازەترین بەرهەمی تۆیە ..
ئەڵێم تۆ بڵێی تێک نەچووبێ ؟
لە ژێر دەرمانا ،
لەو کاتەوە نەخەوێنرابێ ؟
هەموو یادەوەرییەکانم
نەشێوێنرابێ ..؟
شیعرەکانم نەخوسابنەوە ،
پیتەکانی هەڵنەوەریبن ؟
هەر‌چەند بکا ،
نەڕواتەوە سەر ڕێگا
خەمگینەکانی من ..؟
ئەڵێم ئێوارە بیرێک لە خۆم ئەکەمەوە ..
بزانم ئەو هەموو ترسە چییە دایگرتووم ؟
بزانم ئەو هەموو خورپەیە ،
چییە داگیریان کردووم ..؟
بزانم ئەو هەموو خەمە چییە ،
هەموو بیر کردنەوەیەکیان بردووم ؟ ..
ئێواره دێت و ..
ئاوێنەکە پێم ئەڵێ : خۆت مردوویت
ئەویش نە بە پرسەکەتا ڕەت بوو ..
نە جلی ڕەشی پۆشی ..
نە قاوەیەکی تاڵی نۆشی ..
نە ئاخێکی لە زار هاتە دەر ..
نە فرمێسکێ تێکەڵا بوو لەگەڵ کل و بۆیە ..
ئەڵێم وا نییە پیر نەبووم ..
پیر بوونی من درۆیه ..
ئەوەی پەڕاوێزی خستووم ،
ئامێزە داڕوخاوەکەی تۆیە ..
دیپۆرتت کردوومەتەوە ..
ناتوانم دیسان ڕووت تێ بکەمەوە ..
ئەڵێم سبەینێ دوا وادەیە ..
ئەبێ بیرێکت لێ بکەمەوە ..
نەوزاد بەندی
