لە پەراوێزی زیندانێکی نهێنیدا.. شیعری نەوزاد بەندی
نەڕۆیشتین، هەتا هات سوپای خەم
پەنجەرەیەک کردتەوە ئەبێ دایخەم …
خەتای هۆزی بەربەریی بوو فەوتاندی،
نەگرن خەتای چارەنوس و خەتای خەم ..
لەلای تۆیە بەهای ملیار و مایباخ
بۆ میللەتیش دەردی ڕەها و بەهای خەم ..
لە پای چیدا ..له پای چیدا .. لە پای چی ؟
لە پای هیچدا .. لە پای هیچ، ڕەشەبای خەم!
لە چیت کەمە ، لە دوای چی تر ئەگەڕێی؟
شار بستێکی نەماوە ئەگەر ڕایخەم ..
خاکێ گۆڕی خۆتی تیابێ، چی ئەدزی؟
هەی داڕزێی، گڵۆڵەت کا پەتای خەم ..
بەناو خوێنی پاکی خەڵکا هەڵکشای ،
جا میللەتت دایە دەس دەسکەلای خەم..
ئەم ڕق و قینەی تۆ لە کوێ هات؟
شار و دێهات بوون بە کاروانسەرای خەم .
چیت دەستکەوت وا نیشتمانت هەڕاج کرد ؟
وا گشتمانت کرد بە پشت و پەنای خەم ؟
ئەمە دیاری و پاداشتت بوو بۆ گەلێ،
بۆ هەلێ وێڵ بوو ڕاکا لە قەڵای خەم ..
خیانەت تاڵە وا ناچێتە سەر بۆت،
بڕوانە دێتە دەر بۆت ئەژدیهای خەم ..
کە هات کۆتایی تەمەن ، دێ لەناکاو ،
مافی میللەت نییە تا بڵێی دوای خەم ..
لە ساتێکا مەرگ دێ و ڕاپێچت ئەکا
دەرچەت نامێنێ بێجگە لە دەرگای خەم
نەوزاد بەندی
