بەرخودان، ئومێد، ئاشتی، ژیان.. ڕزگار شێروانی

بە کێڵانی
کێلگەی ناسۆرێکانی ژیانم
هێزم لێ ڕوواوە
کە ئەچنم میوەی
درەختی باخی کۆشانم
ئەڕۆم و
ئیتر ناگەڕێمەوە دواوە
…
لە تاریکستانی
خەمی قووڵ و
جەوری زەمانە
دڵم ڕۆنە
لە زیندانی تەنگ و تارا
ئاسۆی ڕوونم لێ بەیانە

کە (بە خشپەی ماری ڕەش) لە کشانە
ڕۆژ دێ و دەزانم
ماری شەو (بەسەر) چووە
بەیانە
….
دوای مەینەتێکان
شادیم دیوە
لە کونجی ترس و ئازارا
سوکنایی هەرچوارلای منی تەنیوە
لە عانی دەستەویەخە لەگەڵ زۆردارا
دەزانم ئاشتی هەیە و لەو دیوە
…
ئەگەرچی
هەر ناڕەحەتییە بەشی من دایم
بەو ئارامییە دەژیم
کە بە تەمایم
..
کۆلەمەرگیم دیت
نەڕووخام
بەرگەم گرت
زیندوو مام
ئەوەی زوڵمی کرد،
مەرگیم دیت
…
ئەوەندە ناهەقیی ژیانم دیتن
بووم بە پیتۆڵ
پاش بڕینی ئەستەنگەکانی سەر ڕێگام
بوومە شێری جەنگەڵ و دۆڵ
کوردم
لکوچڵم ببڕنەوە
قەدم دە هێندە هەڵدەچێ
ڕیشەم ڕۆچووە لەنێو خۆڵ
ئەوەی من دەسڕێتەوە زۆڵە زۆڵ!
ڕۆژێ دادێ
دەبێتە ئەسکەندەری جیهان
کوردی کڵۆڵ
ئەوجا لە دوندی شاخێکا
بە نەغمەی ئاشتی دەگمێنێ
کۆتری سپیی سەربڵندی
سەر بە کاکۆڵ

(ڕزگار شێروانی)

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.