شەڕی كەلتوور دەكەم.. سەلام عومەر

(ترێ بەگەنم، نەوت بەرامبەر خۆراك، وەك داهات بەرامبەر موچە و چەك بەرامبەر ئاشتی).
بێزار بووم لەو شەڕەی چل ساڵی تەمەنم لەسەردانا، شەڕێك لە شەقامەكانەوە دەستی پێكردو لەنێو سەنگەرەكاندا گەرمبۆوە، لە چیاكانەوە هات و لەنێو باڵەخانەكاندا گیرسایەوە، شەڕێك منی كردە دووژمنی چینایەتی و كەچی لەنێو جیاوازیكاندا توامەوە، خەونەكانی منداڵیمی زیندان كرد، لاویەتیمی بزر كردو چەندی لێی دەگەڕێم نایدۆزمەوە، كاتێك لەداهاتوو دەڕوانم كەلتوورە بەجێماوەكانی مندڵی پرچم دەگرێ و ئاوڕم پێ لەدواوە دەداتەوە.
ئیدی ماندوو بووم دەمەوێ شەڕی كەلتوور بكەم.
بۆیە شەڕی كەلتوور بە ئی خۆم دەزانم چونكە خەریكە زۆر شت لەبیر دەكەین و گۆڕیومانەتەوە بە كاڵا بێبەهاكان، بۆ نموونە ئۆتۆمێلە تێلەكان كە بەمنداڵی درووستمان دەكرد و بەرهەمی بیركردنەوەی خۆمان بوو، گۆڕیمانەوە بە نایلۆنە بێگیانەكان و دواتر لەسەر پشتی كەرەوە سواری لاندگرۆزە میچ بەزەكان بووین، ئەوانەی بەرهەمی بیركردنەوەی ئەوانیدیە.
كۆلارەكاغەزینەكان كە لە ئاسمان لەنگەری دەگرت و نامەمان بۆ دەنارد، ئێستا بەنامەیەكی ویپچاد ملیۆنان كۆلارەی چینی بێگیان دێتە نێو دەستمان، سەدان درۆنی مەترسیدار لە بانەكان دەكەون.
قولابی راوە ماسی و دارلاستیكەكانی خۆمان كەڕاومان پێدەكرد، گۆڕیوەتەوە بە شمەكە لێزەریەكان، كە توانای داهێنان و دەستڕاستیمانی لەگەڵ خۆی برد و تا ئاوڕماندایەوە دیتمان نیشانەیان لە ئێمە گرتوەو راودەكرێین و لەنێو تۆڕی یاساكاندا عاسێ و بەقولابی ئابووریەوە گیر بووین.
خەریكە زیرەكی دەستكرد، تەواوی دەسكردەكانی خۆمان قوتبدا، قەڵەم و دەفتەری فڕێدا، نامەی نێو شقارتەی نەهێشت، تەنانەت شیعر و چیرۆكی سادەو بێتامیش دەنووسێ، گۆرانی و موزیك و شێوەكاریشە، خەریكە بێئاگا هەموومان بەدەست تەكنەلۆژیاوە دەبینە رۆبۆت، هزرمان سڕ دەبێ و چاومان وەك لیدەكان رەشكەوپێشكە دەكا، دڵمان لەترسی شەڕی براكان دەڵێ: چك چك چك.
بۆیە شەڕی كەلتوور دەكەم، چونكە بۆنی مێخەكی سینگی دایكمان بۆتە ئەوجۆرە عەترانەی زەهرن، رەنگی خەنەو وەسمەی بسكی داپیرەمان بۆتە سوبغی كیمیایی، باول و جلەكوردیە بوكێنیەكانمان بۆتە بەدلەفشەكان و شەكراو خواردنەوە و دەهۆڵ و زوڕنا چۆتە ئەو هۆڵانەی كە دەنگ لەوێدا دیجەیەو هەر لە شەڕی ناوفیلمی سینەماكان دەچێ و خۆ هۆڵی پەرلەمانیش هەر لە بێدەنگی شەقام دەچێ، بێدەنگیەك خەریكە كاسمان دەكا.
شەڕی كەلتوور دەكەم و بەردەوام دەڕژێمە منداڵیمەوە، تا لەسەربانەكان پەردەوكوللە دەبینمەوەو شەوان ئەستێرەكان دەژمێرم، ناوەستم و حەزم لە ئاوی گۆزەكانە، ئەو ئاوەی بەدەستی خوشكەكانمان لە كانیەوە دەیانهێنا، بێزم لە ئاوی نێو نایلۆنان دەبێتەوە، ئەو ئاوانەی لەسەر مێزە بازنەییەكان دادەنرێن و دوای یەكەمین قوم بەساویلكەیمان پێدەكەنن.
حەزم لە چیرۆكی مەڕۆكە و بزنۆكەیە، كە لەتەنیشت سینگی دایكمەوە تا خەوتن گوێم لێدەبوو، بۆیە ئەوكات خەونەكانیشمان خۆش بوون، ئیشتیام چۆتە بەركوڵەكەی بەر ئاگردان و یاری ئەو كەلاشوشانەی بەدزی بابمان دەمانكڕین، لەو تۆپەی تۆپانێمان پێدەكرد و وەك ئێستا كەس نەبوو كەلایەن و تۆپانێمان پێبكا.
دەمەوێ بچمە ژێر كەوایەكەی دایكم تا بۆنی مرادخانیەكەی بابم بكەم، بەدزی پێڵاوە گەورەكانی خوشكم لەپێ دەكەم هەتا بەدووم كەوێ و منیش لەو لاژەلاژە فێرە هاوسەنگی ژیان بم، پێچەوانەی ئەو ناهاوسەنگیەی بەئاشكرا لە پێڵاوە گەورەكاندا بەدیدەكرێت و رەنگدانەوە خستۆتە سەر كادیرەكان، ناهاوسەنگیەك منداڵی قوتداین و لاویەتیمانی رەزیل كرد، كامڵیمانی كردە پتڕۆڵ دایانە ئەو كۆمپانیایانەی خەریكە دەمانبەنەوە سەردەمی( ترێ بەگەنم و نەوت بەرامبەر خۆراك).

سەلام عومەر

Salam Omar

ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.