بۆ غەزال.. شیعر: سەلام عومەر
من تەنیا میوانی خەم نیم
قەدی ئەو درەختە پیرەم تەور برینداری کردووە!
تاشەیەکی کوێستانیم و لافاو هەڵیداومەتە بیابان،
زامی غەزالی زاگرۆسیم
کاتێک لەو سەری دونیا دڵی شوشەی کوردێک دەشکێ،
لێرە لەناو خوێنمدا شیشۆق
لە دەمارم دەچەقێ
من چیتر خۆم لە خەم جیا ناکەمەوە؛
من نەڕەی پڵنگێکی بریندارم لە گوێچکەی مێژوودا
دەنگی قڵیشانی درەختێکی زاگرۆسم و
غەزال ئاویدەدا
بێدەنگی ئەو باوکەم نانێکی دەستناکەوێ
لە هەژاریدا پلانەکانی ئاڵۆز بوون و
لەبەردەم ماڵی خودادا
جەمەدانیەکەشی راخستووە.
من، تاریکیی زیندانییەکم کە لەو دیو دیوارەکانەوە
خەم بەسەر زاگرۆسیەکاندا دابەش دەکاو
زامەکانیان تیمار ناکا
تەنیا تەنیایی نییە،
ئەوە چاوەکانمە بوونەتە روبار و خوێنی جەنگاوەڕەکانمان دەڕێژێ
ئەوە منم گەردوون کێش دەکەم
تا هەموو ئازارەکان لە کونە ڕەشەکانەوە ڕاکێشم و
ببمە تەقینەوەی خەم،
خۆرهەڵات و خۆرئاوا
بۆ من تەنیا دوو گوللەی خەمن،
ئاراستەی من کراون و
دەمپێکن
خەمێک بۆ ئەوانیدی لە خەودایە و
کەچی بۆ من هەمیشە بەپێوەیە،
پیرە درەختێکی زاگرۆسم و
هەر کەسێک لە بنارم شکۆی بڕوشێ
لێرە چڵەکانم هەڵدەوەرن،
هەر شارێک لە جەنگدا بسووتێت،
لێرە دووکەڵی خەم دەمخنکێنێ
دەبمە خەڵوز و ناخم رەش دەنوێنێ
من تەنیا مرۆڤ نیم؛
من ئەو جەستە ماندووەم کە هەموو ئەو غەدرانە هەڵدەگرێت
کە خودا نەیبینیون،
من ئەو کێوە تاقانەیەم
کە لە جەستەی هەمووتاندا هەم و نەرمی دەنوێنم
وەلێ لەنێو نوێنی خەمدا هەر بەقەستی خۆم دەنوێنم
من خەمم و خەمیش من
بۆیە نیشتمان بەخۆم و
خۆشم بە نیشتمان دەچوێنم.
Salam Omar
ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.
