بانگەواز … سمکۆ
ئەم بە یانی یە نزیك پارکی ئازادی
لەگەڵ شیعرێکی بەکر عەلی
پیاسەم دەکرد
تەرمێکم دۆزی یەوە
ژنێکی ئێسک سووك بوو
خەڵتانی گوڵ کرابوو
سەیرم لێهات
خوێنەکەی بۆنی نێرگزی
قەراغی لێدەهات
لە باتی کرم گوڵ تێی دابوو
لەباتی شەرم جەستەی ڕووتی
تیشکی پەلکە زێڕینەی لێدەهات
پێ دەچی پیاوێکی بەشەرەفی شارەکەم
دوێ ئێوارە
لەسەر شەرەف کوشتبێتی
ئای شەرەف
دەبێ مانای چی بێ بە کوردی؟
من نازانم تۆ دەزانی؟
ئەم بەیانی یە پەیکەری ڕووتی ڤینۆسم دی
پێ دەچی هانایەکی بێکەسی بۆ گۆڕەکەی
شیرکۆ هێنابێ
یان پارکی ئازادی،
بۆ مشتێ خۆشەویستی و ئازادی گەرابێت!
من حەز دەکەم جەستەکەی
لە باخەکەی دایکم بنێژم
زۆر دەمێکە باخەکەی خەون بە گوڵەوە دەبینێ،
گەر هەستایەوە من مارەی کەم
من مانای شەرەف نازانم
و نایشی کوژم.
ماچی دەکەم
هیودارم ئەم ماچە نەبێتە
خۆڵەمێش لە دەمیا.
ماچی دەکەم تا هەردوکمان دەتوێینەوە
بەس ناوەکەی نازانم
زۆر حەز دەکەم کە بیزانم
گەر هەر کەسێك دەیناسێ
تکایە پێم بڵێ
تکایە ئی مەیڵێك بکەن
با حکومەتیش بزانی
KDPUK@Iraqdead.com
Simko 2018
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
