فلاشباک- لە دەفتەری بیرەوەریی رۆژانەوە..2.. نووسینی: ستیڤان شەمزینی
بەشی دووەم
چەند هەفتە پێش ئەمڕۆ، کاتێک چوومە پێشانگایەکی تایبەتی هونەرمەندی شێوەکار “محەمەد عارف” لە هۆڵی مۆزەخانە، کۆمەڵێک تابلۆی هونەریی ئاست بەرز سەرنجیان راکێشام، یەکێک لە تابلۆکان بووە ئیلهامبەخشی چیرۆکێک، هەنووکە دەمەوێت چیرۆکەکە بنووسم. ناوەڕۆکەکەی باس لەوە دەکات وێنەکێشێک تابلۆی ئافرەتێک دەکێشێت بە جوانترین شێوە و رووخسارەوە، بەڵام پاش ماوەیەک لە قاڵبوونەوە و تێڕامان لە خودی تابلۆکە، هونەرمەندی وێنەکێش بڕیار دەدات بە دوای ئەو ژنەی ناو تابلۆکەدا بگەڕێ لە زەمینی واقیعدا و ئەو کەسە بدۆزێتەوە لە ئەندێشەیدا سکێجی کردووە، هەرچەند دەگەڕێ ناگات بەو کەسەی لە پۆرترێتەکەیدا وێنەی کێشاوە، بۆیە نائومێد دەبێت. مەبەستی من لەم چیرۆکە ئەوەیە هەرگیز مرۆڤ ناگاتە ئەو وێنە خەیاڵییەی خۆی لە مێشکیدا بۆ ئافرەتێک کێشاویەتی کە بڕیارە ببێتە عاشقی یان هاوسەری یان نیوەکەی تری. خەسڵەتی منیش لە چیرۆکدا وایە، بەردەوام حەزم بە کۆتایی تراجیدیی و پڕ نائومێدیی هەیە.
کاتێک بیرم لە نووسینی ئەم چیرۆکە دەکردەوە و هێڵکارییەکانیم لە مێشکی خۆمدا دەکێشا، نقومی ناو دنیای “کاروان عوسمان” ببووم، چەند گۆرانییەکم بۆ چەندین جار دووبارە کردەوە، بەڵام گۆرانی “بهێنە بەرچاو موڵک نەبێت” زۆر دڵگیرە لای من، بەتایبەت گۆرانییەکە ناوەڕۆکێکی سۆسیالیستی هەیە و بەمشێوەیە دەستپێدەکات:
بهێنە پێش چاو موڵک نەبێ
ئاسانە ئەگەر تێفکری
هیچی موڵکی هیچ کەس نەبێ
سەر سەریشمان تا چاو بڕێ
غەیری ئاسمان چیدی نەبێ
رەنگە بڵێی خەیاڵات ئەکەم
بەڵام هەر من نیم وا ئەڵێم….
من تازە زانیومە، “کاروان عوسمان” سەرباری خڵتەی بیروڕای ناسیۆنالیستی، کەسێکی سۆسیالیست و چەپ بووە، ئەمە هێندەی تر وابەستەی کردم بە دنیای هونەریی ئەو هونەرمەندەوە، هەرچەندە دەسڵەمێمەوە لەوەی ئایا بە راستی ئەو هونەرمەندە پیاوکوژ بوو؟، بەڵام ئەو تۆمەتەش هیچ لەوە کەم ناکاتەوە کە دنیایەکی هونەریی تایبەتی هەیە، لەم رووەوە تێزی “رۆلان بارت” کە بەرهەم و ژیانی تایبەتی خاوەن بەرهەم جودا دەکاتەوە، لای من زۆر گرنکی هەیە. ئەوەی بۆ من گرنگە هونەرە نەک ژیانی تایبەتی هونەرمەند.
بەهەرحاڵ، ئەمڕۆ دەمەوێ پەلە بکەم، لە نووسینی ئەو چیرۆکە، بەڵام کتێبێکی “کرباسی” بە ناوی “تەورات و ئیمپریالیەت” لە بەردەستمە و دەمەوێ زۆر بە زوویی تەواوی بکەم. ئەمەش دوای ئەوە هات کتێبە نایابەکەی “ئیدوار سەعید”م بە ناونیشانی “الصور المثقف” دوو جار خوێندەوە. دەبێت ئێستا کاتەکە بدەم بە نووسینی چیرۆکەکە، چوونکە وا بڕیارە هاوڕێیەکی حزبی شیوعی لە دیمەشقەوە هەموو بەرگەکانی “احیاء علوم الدین”ی “غەزالی”م بۆ پەیدا بکات و بۆم بنێرێ، ئەوسا بواری نووسینم کەم دەبێتەوە، چوونکە ئەو کتێبە چەند بەرگێکە و بابەتەکانی پەیوەستە بە بنەماکانی شەریعەتی ئیسلامەوە، ئەوەش تموحی منە کە دەمەوێ لە ئیسلام شارەزا بم، چوونکە لانیکەم بۆ ئەمڕۆ زانیارییە ئاینییەکان بۆ کەسانی وەک ئێمەی چەپڕەو گرنگی خۆی هەیە.
نووسینی: ستیڤان شەمزینی
25-8-1997
تێبینی: ئەم بەشە لە لاپەڕە 12-15 کتێبی “فلاشباک”چاپ و بڵاوکراوەتەوە. کتێبەکەش لە سەرەتای ساڵی 2017 چاپ بووە.
