قەومێک بۆ ناو کتێبی گینز.. شیعری نەوزاد بەندی
ماشێن بێ بەنزین ئیش ناکا ..
درەخت بێ ئاو وشک ئەبێ ..
ئاژەڵ بە بێ ئاڵف ئەمرێ ،
چرا بێ نەوت ئەکوژێتەوە ..
پێڵاو بە بێ بۆیاخ ئەدڕێ ..
مشک بێ ناخونەک ناژی..
زەوی بێ باران شەق ئەبا ..
لەناو خوێنا،
نیوترۆفیل میکرۆب قوت ئەدا ..
لیمفۆسایت ڤایرۆس نۆش ئەکا ..
سەگ برسی بکەی، ئەوەڕێ،
هەڵمەت ئەبا ..
پشیلەکان ئەمیاوێنن ..
مریشک بێ دان ، ئەگارێنێ ..
حوشتر بێ ووشتراڵوک ئەمرێ ..
چۆلەکە ئەیکا بە هەرا ..
گورگ بێ نێچیر ئەلورێنێ
کەر بێ وێنجە ئەزەڕێنێ
ئەسپ برسی بێ ئەحیلێنێ ..
قەلەڕەشکەکان ئەقڕێنن ..
هەور بێ باران ، ئەگرمێنێ ..
ماسی ئۆکسجینی ببڕێ ،
باز ئەدا ، خۆی ئەخنکێنێ ..
وورگ خواردنی باشی نەبێ ،
با ئەکات و ئەیقەومێنێ ..
لەش خزمەتی نەبێ و نەیشۆی ،
بۆگەن ئەکا ..
مێشک بێ خەوبێ ،
ئەبزڕکێنێ ..
درایڤ شەفت گریسی نەکەی ،
ئەقیڕێنێ ..
چیمەنتۆ ئاو نەخواتەوە ،
درز ئەبا ، ماڵ ئەڕوخێنێ ..
باراناو گەر فەرشی سووری
مەنهۆڵێکی بۆ ڕانەخەی،
ئەبێ بە لافاو ،
سەیداوا نوقم ئەکا ،
ئەیخوسێنێ ..
قژ نەیتاشی،
ئەتباتەوە چاخی بەردین ..
گەرم و ساردی ماڵ ڕێک نەخەی،
شێ و کەڕوو دایدەنێن کەمین ..
ئەنجامەی دەرگا چەور نەکرێ،
شێتت ئەکا بە جیڕە جیڕ ..
هایدرۆلیکی گێڕ نەگۆڕی ،
دەست پێ ئەکا بە قیڕە قیڕ ..
چاو کز بوو ، چاویلکە نەکڕی،
هەزار ڕووداوت توش ئەکا ..
بنمیچەکەت دار و قوڕ بێ ،
یەکسەر داوای بانگوش ئەکا ..
ساردکەرەوە بێ کارەبا ،
خواردنەکانت خراپ ئەکا ..
هەینی مناڵ ،
داوای پیتزا و کەباب ئەکا ..
٭ ٭ ٭
تەنها کوردی
باشور نەبێ ،
بە بێ نان و ئاو هەر نامرێ ..
سێ چوار مانگ موچەی نەدەیتێ ،
بێ خەمە و دڵی گەرد ناگرێ ..
( زاریشی هەیە و ناقڕێ
باڵیشی هەیە و نافڕێ )
بە مانگ .. بە ساڵ ،
بێ حەقدەست کارت بۆ ئەکا..
هیچ دەنگێکی لێوە نایە و
لە هەموو شتێکی کەمە ..
مات و ڕەزامەند و تەبا ..
دۆش داماوە وەک مقەبا ..
هەر دەمیشی بکاتەوە ،
نوکتە و گۆرانی دێتە دەر ..
چاوەڕوانن خوا چاکی کا ..
یان ئەمریکا ،
بەردیان بۆ بهێنێتە بەر ..
لەسەر دەریایەک نەوتن و
ملیاران دۆلار قەرزارن ..
بە بێ ئیش ئەسوڕێنەوە و
بە هەزار دەرد دەردەدارن ..
کەچی بێخەم و دڵخۆشن ..
خەریکن یەکتر ئەدۆشن ..
سەرقاڵی زاوزێ و ژنخوازین
ئەوەیش بەڵگەیە کە ڕازین ..
هەتا برسی تر بن ، زیاتر
مناڵ ئەخەنەوە ، سەیرە !
لە بەر مناڵ نەخستنەوە ،
خەم زۆر ئەخۆن کچی قەیرە .!
نوێژکەر و خواناس و مەردن ..
عەیبە لە لایان باسی کەن ،
بەس خوا ئەزانێ دووچاری
چەندێ سوکایەتیی و دەردن ..
ژێر و سەریان زۆر جیاوازە ،
لە سەرەوە ئەڵێن خوایە فریا کەوە ..
لە ژێرەوە پێیان وایە
نانەکەیان وا لای پاسدار و جەندرمە و بی دووی مارینز ..
دە هیچ نەبێ بیانخەنە
کتێبی گینز ..
با بچنە ناو مێژووەوە ..
بچنە پۆڵێنی کۆمەڵێ مێرووەوە ..
لە بیابانی وشکا ئەژین ..
وەک هەندێ جۆری مێروولە ..
ئەژین بێ ئاو
بێ دانولە ..
ئەوەی گرنگه لە لایان ،
ڕازاندنەوەی دەم وفڵقیان ،
بە بۆیاخ و نەشتەرگەریی ،
بەڵکو ببن بە پەپولە
