Skip to Content

دیدار لەگەل ئێدی هوپشمید بەرهەم هێنەری فلیمی یۆڵی یەلماز گۆنای

دیدار لەگەل ئێدی هوپشمید بەرهەم هێنەری فلیمی یۆڵی یەلماز گۆنای

Closed
by تشرینی دووه‌م 24, 2016 Cinema, General

دیدار لەگەل بەرهەم هێنەری فلیمی یۆلی یەڵماز گۆنای براوەی خەڵاتی کان ئێدی هوپشمید
یۆڵ رێگەیەک بەرەو تەراوگە.!

سەرەتای ناسینی بەڕێز ئێدی هوپشمید

کات نزیک بە دووی دوای نیوەڕۆیە ڕێککەوتی- ٢٠- ١٠-٢٠١٦- ڕۆژی پێنج شەم، شوێن ستاندی کوردستان، پیاوێکی بەتەمەن تورەگەیەکی لەبن هەنگڵی بوو، گووتی: دەمەوێ شتێکت پێ نیشان بدەم.
فەرمووم لێکردوو دام نیشاند، کتێبێکی لە تورەگەکەی دەرهێناو خۆی ناساند کە ئەوە بەرهەم هێنەری فلیمی یۆلی یەلماز گۆنایە و باسی خۆی پەیوەندییەکانی خۆی و کاری هونەری کرد.
منیش بانگی هاورێیانم کردوو پێم ناساندن
گووتی: دەمەوێ ئەو کتێبە بە کوردی چاپ بکرێت.
قسە وباسێکی زۆرمان کرد، تێم گەیاند کە وەزعی سیاسی و ئابووری کوردستان زۆر خراپە، شەڕێکی سەخت وماڵ ویرانکەر یەخەی گرتووین، دواتر پێم گووت دەتوانێ لای کێ لە ئەورووپا کتێبەکەی چاپ بکات بەکوردی و هاوکاری بکات.

یەکێک لەم بەرێزانەی ئامادەی دانیشتن و گفتو گۆکە بوو ئەندامی شاندی کوردستان بوو، بەڕێز کامەران سوبحان گووتی: کاک یووسف بزانە دەکری دیدارێکی لەگەڵدا بکەین؟
منیش قسەم لەگەلی کرد گووتم ئەگەر کاتت هەبێت ئەو بەڕیزە دەیەوی دیدارێکت لەگەڵدا بکات؟
ئیدی هوپشمید گووتی : دەبێ ئێستا بڕۆم ، بۆ بەیانی کاتێک دیاری بکەین.

منیش گووتم بەیانی سەعات دووازدە چۆنە؟
ڕەزامەندی پیشاندا، ئەوەبوو بەیانی کاتژمێر دووازدە لەیەکێک لەکافتریاکانی بوخ مێسە دانیشتین، من سێ قاوەم هێناو دانیشتین بەدەم قاوە خواردنەوە قسەو باسمان کرد.
من وەکو وەرگێرو هەمیش لە ڕێکخستنی پرسیارەکان و فۆرمولە کردنی وەلامەکانیش بەشدار بووم، بە کامێراکەی خۆشم چەندین وێنەمان گرت، ڕۆژی پێشووش هەر بەکامێراکەی خۆم چەندین وێنەمان گرت.
ئیدی هوپشمید لەم دوو ڕۆژەدا لەستاندی کوردستان زۆر کەیف خۆش بوو، لەکۆتاییدا چەند کتیبێکمان بەدیاری پێدا.
ئەم نووسینەو وێنەیەکم لەهەمان ڕۆژ لە پەیجی فەیسبووکی خۆم بڵاوکردەوە:
(بەرهەم هێنەری فلیمی یۆل ـ ڕێگای ـ یەلماز گۆنای بۆ یەکەم جار دەردەکەوێت
بەرهەم هێنەرئێدی هوبشمید
لەسەردانیدا ئیمڕۆ بۆ ستاندی کوردستان ، لەهگەبەکەیدا کتێبێکی پێشانداین، سەبارەت بە ژیانی هونەرمەندی کورد یەلمازگۆنای ، چۆنییەتی دەرهێنانی فلیمی یۆل، سەرەتای دیداری لە زیندان، کاری دەرهێنانی فلیم، ئەکتەرەکان، نمایشکردنی، وەرگرتنی خەلاتی کان ، بەرهەمەکانی یەلماز گۆنای، تا مەرگ و مەراسیمی ناشتنی هونەرمەند یەلماز گۆنای لە گۆڕستانی پێر لاشێ ی پاریس.
ئەو بەڕێزە دەزگایەکی چاپەمەنی کوردی دەوێت ئەم کتابە بە کوردی چاپ بکات، لەمانگی یانوەری داهاتوو بە ئەلمانی چاپ دەبێت).
ماوەیەک بەر لە ئێستا کاک کامەران دیدارەکەی بۆ ناردم، منیش پێدا چوونەوەیەکم کرد و هێندەک زانیاری کە نەنووسرابوو زیادم کردو بە خەتی سۆر بۆم ناردەوە بە ڕێزەوە.
دیدارەکە ئەوەی خوارەوەی لێ بەرهەم هات ، دوا پرسیار سەبارەت بە ستاندی کوردستان و چاپکردنی کتێبەکە، زیادە، چوونکە ئێمە پێشتر ئاماژەمان بەخراپی وەزعی کوردستان کرد، بەرێز ئیدیش تێ گەیشت بۆیە ئەو بەدووای ڕێگەی تردا دەگەڕێت، موراعاتی وەزی کوردستانی لەبەر چاو بوو، :

دیدار- کامەران سوبحان
وەرگێرو فۆتۆ- یووسف منتک

* چۆن بوو پاش چەندین ساڵ لە کۆچی دوایی (یەڵماز گوینای) بیرت کردەوە جاریکی تر بگەڕێیتەوە بۆ لای وێنە و یادەوەرییەکانی ئەو فیلمساز کوردە و کاریکی دیکۆمێنتەریی لەسەر بکەیت؟
– ئەوە بەسەرهات و مێژوویەکی دورودریژە، بەڵام لەوێوە دەست پیدەکەم کە ساڵی ڕابردوو هەمو وێنە و دیکۆمێنتەکانم کۆکردەوە کە پەیوەندی بە (یەڵماز گیونای) هەبوو، بە پێی کات و شوێن و بەرواری وێنەکان هەمویانم ڕێکخست. لە کۆمپانیاکەم لەگەڵ نووسەرو سیناریستێکی ئینگلیز کارم دەکرد ناوی (پیتەر پالینسن) بوو. پێکەوە دانیشتین بۆ ماوەی سێ ڕۆژ باسی یەڵماز گوینایم بۆ کرد. چۆن بوو؟ چۆن کاری دەکرد؟ ستایلی فیلەمەکانی چۆن بەرهەم دەهێنا؟ ژیانی من چۆن بوو لەگەڵی؟ ئەوە بۆ دووەم جار بوو لەگەڵ دانیشم، پێشتریش لە ساڵی ٢٠٠١ بیرۆکەی ئەوەم بۆ باسکرد کە فیلمێکی دیکۆمێنتی لەسەر ژیان و کارکردنی خۆم لەگەڵ (یەڵماز گوینا)ی پێکەوە درووست بکەین. ئەو نووسەر و سیناریستە بیرۆکەکەی زۆر بەدڵ بوو، لەبەر ئەوەی (یەڵماز گوینای) سینەماکارێکی بەناوبانگی جیهانییە. بۆیە بۆ دەستپێکی ئەو فیلمە من ڕۆژانە چیرۆکە جیاوازەکانی خۆم لەگەڵ ئەو فیلمسازە کوردە بۆ ئەو دەگێڕایەوە، ئەویش هەمو قسەکانی منی تۆمار کرد. بۆ ئەوەی بتوانین پێکەوە فیلێمێکی دیکۆمێنتاری گرنگ درووست بکەین. پاشتر من گەڕامەوە بۆ (زیوریخ) بۆ ئەوەی دەرفەت بدەم بە (پیتەر پالینسن) دەست بە نووسینی سیناریۆی دیکۆمێنتەرییەکە بکات. دوای ماوەیەک بۆی باسکردم لە کوێوە و چۆن دەست بە دەستپێکی فیلەکەمان دەکەین و بیرۆکەکە گەیشتە سەر پەڕە و دەست بکەین بەکاری جێبەجیکردن. کۆمپانیای فیلم (C. Film)بڕیاریدا بەرهەمهێنەری فیلمەکە بێت.

*لە کوێی ژیانی خۆت و یەڵماز گوینای، دەستان بە فیلمە دیکۆمێنتییەکە دەکرد؟ واتە فیلمەکە چۆن دەست پێدەکات و بە چی کۆتایی دێت؟

– بەپێی سیناریۆیەکەی ئێمە، ئەو دەرهێنەرە مەزنەی کورد لە زیندانی (ئەنقەرە) لە ساڵی ١٩٧٦ دەست پێدەکات. کە دادوەرەکە بڕیاری دادگا لە هۆڵی دادگا دەخوێنیتەوە، بڕیاری ١٩ ساڵ زیندانی بۆ (یەڵماز گوینای)دەرچووە.! دوای ئەوەی بە فیلمی (یۆڵ) لەساڵی ١٩٨٢ خەڵاتی (کان)ی سینەمایی وەرگرت، من وەک بەرهەمهێنەر و ستافی فیلمەکەش هەرگیز باوەڕمان نەدەکرد ئەو خەڵاتە گەورەیە وەربگرین. پاش خەڵاتەکە من گەڕامەوە بۆ زیوریخ و ئەو گەڕایەوە بۆ پاریس. ئەو ڕۆژە بۆ سەرجەم بەشداربووان ڕۆژێکی مێژووییە، چونکە سەرجەمیان کەرەستە و فیلمەکانیان دەپێچنەوەو پاش چەندین ڕۆژ نمایشی فیلم و پێکەوە بوون و دیالۆگ هەر کەس بەرەو شار و وڵاتی خۆی دەگەڕێتەوە. ئەمەش کۆتایی فیلمە دیکۆمێنتییەکەی من و (پیتەر پالینسن) بوو.

*تۆ چۆن یەکەمجار (یەڵماز گوینای)ت بینی و لە کوێ بینیت؟

– ساڵی ١٩٧٩ بۆ یەکەمینجار، فلیمی مێگەڵیی (یەڵماز گوینای)م بینی لە ڤیستیڤاڵی کان. ئەو ساڵە لەگەل شەریکەکانم لە کۆمپانیاکەمان پێکەوە چووینە ڤیستیڤاڵی (کان) و فیلمی (مێگەل)مان بینی. دوای کە گەراینەوە ویستمان ئەو فیلمەی یەڵماز میوانداری بکەین بێتە سویسرا و لەوێ نمایش بکرێت، برادەرێکم لەگەڵ بوو، بۆ ئەو مەبەستە ڕۆیشت بۆ شاری(ئیسپارتە) لە تورکیا و سەردانی (گوینای) کرد و گرێبەستێکی لەگەڵ کرد بۆ هێنانی فیلمەکە بۆ سویسرا. پاشتر لە مانگی ١٠ی ساڵی ١٩٨٠ سەردانی یەڵماز گوینایمان کردەوە لە تورکیا، بەداخەوە ئەو کات ئەو لەناو زیندان بوو.! ماوەیەک لە ژێر چاودێری پۆلیسدا لە زیندان لەگەڵی دانیشتین و باسی ئەوەمان لەگەڵ کرد چۆن پێکەوە بتوانین لە داهاتوودا کاری سینەمایی پێکەوە بکەین؟ ئەو کات ئەو زۆر بێ تاقەت و بێ ئومێد بوو. بەڵام بڕیارەکەی ئێمەی پی خۆش بوو. بەدەر لە فیلمی (یۆڵ و مێگەل) فیلمی (دووشمان) لە تورکیا درووست کردبوو. هەرچەندە یەڵماز گوینای خۆی زۆر دڵی بە فیلمی(دووشمان) خۆش نەبوو، چونکە کارە هونەرییەکانی بە خراپ کرا بوو. بەڵام ئێمە پێمان وت هەمو ماتڕیاڵەکانی ئەم فیلمە بنێرە خۆمان کاری دەنگ و مونتاژ و ڕەنگی بۆ دەکەینەوە. ئەوەبوو ناردی بۆمان و مۆنتێرێکمان هەبوو ناوی (کاترین) بوو، سەرلەنوێ ئەو فیلمەی مونتاژ کردەوەو کارێکی ناوازە دەرچوو.

* قۆناغەکانی کارکردنی خۆت و یەڵماز گوینای چۆن بوو؟

– من بە دیاریکراوی لەساڵی ١٩٨٠ بۆ ١٩٨٤لەگەڵ یەڵماز گوینای کارم کردووە. ئەو ١٠ ساڵ لە من گەورەتر بوو. من ئەو کات گەنجێکی بە گوڕ و تین بووم و جۆش و خرۆشم زۆر بوو بۆ کاری سینەمایی. بێگومان ئەو ئەزمونێکی زۆری لەو بوارەدا هەبوو. کە نزیکەی ١٠٠ فیلمی سینەمایی هەبوو وەک (ئەکتەر و دەر‌هێنەر و سیناریست). بەڵام من ئەو کات تەنها چەند ئەزمونێکی کەمم هەبوو. ئیدی لەم سەرەتایەوە دەستمان کرد بە کاری هاوبەشی هونەریی. لەسەرەتاشدا هەمو کەرەستە و سیناریۆی فیلمی (یۆڵ)مان لە تورکیاوە هێنا بۆ سویسرا. ئەو کاتە فڕۆکەخانە زۆر توند بوو، بەڵام ئێمە توانیمان دەربازی بکەین و بیگەیەنینە سویسرا. هەر لەو سات و قۆناغەشدا بەهۆی ئەوەی زۆر نیگەران بوو، پڵانمان هەبوو خۆی و خێزانەکەی دەرباز بکەین و بگاتە ئەوروپا.! ئەمە لای ئێمە پلانێکی گەورە بوو. زۆرمان بەدڵ بوو. بۆیە بە وردی کار و نەخشەمان بۆ دانا بۆ ئەوەی لە زیندانی تورکیاوە خۆی و خێزانەکەی دەرباز بکەین بۆ ئەوروپا.

*چیرۆکی دەربازکردنی لە تورکیاوە بۆ ئەوروپا چۆن بوو؟ لەکاتێکدا ئەو لە زینداندا بوو ئەو کات؟

– (بە پێکەنینەوە) ئەوەش داستانێکی درێژە.! بڕیارەکەمان پێ خۆش بوو، لە مانگی ئابی ١٩٨٠ کە لە زیندان چەند ڕۆژێک وەک پشوو بەبۆنەی جەژنەوە مۆڵەت درابوو بگەڕێتەوە بۆ ناو خێزانەکەی، ئەمەمان بە دەرفەت زانی توانیمان خۆی و هاوسەر و دوو منداڵەکەی بە شێوازی جیاواز ڕزگاریان بکەین لەیەک ڕۆژدا، خۆی لە ڕێگەی دەریاوە یانی بەحری ئیجە، خێزان وهەردوو مناڵەکەی بە سەیارەی ڕەقەمی سویسری. لەکاتی گەیشتن بە سویسرا، ڕۆژی دووایی کارمان لە فلیمی یۆڵ کرد بەڵام گرفتێکمان هەبوو، ئەویش ئەوە بوو یەڵماز گوینای لە پۆلیسی ئینتەر پوڵ بڕیاری گرتنی هەبوو، دەبوو لەبەر ئەم هۆکارە زۆر بە نهێنی کار بکەین، لە رێگەی ڕۆژنامە نووسانی تورکەوە ئێمەیان دۆزییەوەوە ناچار خۆمان وون کرد و درێژەمان بە کارەکانمان دا .! لێرەدا باسی ناکەم، کە چۆن و بە چ ڕێگەیەک لە تورکیا دەربازمان کرد. لە فیلمەکە دیکۆمێنتییەکەم و لەم کتێبەشدا بە وردی ئەوەم باسکردووە، با تامی گێڕانەوەکە بۆ خوێنەران و بینەران جێ بێڵین.!

*گەیشتە ئەوروپا و لە تورکیا دەربازی بوو، قۆناغی یەکەمی کارکردنتان چۆن دەستی پێکرد؟
-هەر لەو ڕۆژە سەرەتاییانەی گەیشتە سویسرا، دەستمان بە وێنەگرتن و کارکردن لە فیلمی (یۆڵ) کرد. بەڵام بەشێوەیەکی نهێنی و دوور لە چاوی میدیا. بەڵام ڕۆژنامەنووسانی تورک لە ئەوروپا ئێمەیان دۆزییەوە. خۆمان نەدەدا بە دەستەوە و خۆمان لێ دەدزینەوە و بە پچڕ پچڕ کارمان دەکرد. لە مانگی ١٠ی ١٩٨١ بۆ مانگی ٥ی ١٩٨٢ کارە هونەرییەکانی فیلمەکەمان تەواو کرد.

* با بێینەوە بۆ سەر فیلمە دیکۆمێنتەرییەکەت لەسەر (یەڵماز گوینای) چ بەسەرهات و گەیشت بە کوێ؟

-پاش چەندین ساڵ هەوڵ و کۆشش بۆ پەیداکردنی بودجە و کەرەستەی پێویست، لە ڕاستیدا نەتوانرا ئەو فیلمە دیکۆمێنتییە بەرهەم بهێنرێت، لەبەر بڕی پارە و بودجەی پێویست، بۆیە بیرمان لە ڕێگەی تر کردەوە، منیش بڕیارم داوە هەر دەبێت شتێ لەسەر (یەڵماز گوینای) بەکەم. بۆیە بەناچاری بیرۆکەکەم گۆڕی لەبری ئەو فیلمە بە کتێبێک ئەو مێژووە بگێڕمەوە. بۆیە ماوەی زیاتر لە ساڵێکە کتێبەکەم تەواو کردووەو ناوم ناوە (یۆڵ رێگەیەک بەرەو تاراوگە.!)

*بۆ بیرتان لەوە نەکردەوە لەگەڵ کۆمپانیایەکی بازرگانی ئەو فیلمە دیکۆمێنترەییە درووست بکەن، بەتایبەت کۆمەڵێ بازرگانی گەورەی تورک و کۆمەڵیک فیلمسازی بەناوبانگی تورک ئێستا لە ئەوروپا دەژین؟
– لەڕاستیدا هەمو رێگەکانمان تاقی کردەوە، بەڵام هیچمان دەست نەکەوت.! هەمو هەوڵەکانی خۆمان خستە کار لە وڵاتانی (فەڕەنسا و سویسرا و ئەڵمانیا) بەدوای پارە و بودجەدا. لە زۆربەی شوێنەکاندا ڕەفز کراین. چونکە لەگەڵ ناوەرۆکی فیلمەکە نەبوون. بە ناچاری ئێمە بە پێی ئەو گرێبەستەی لە نێوانماندا بوو بڕی(٨٠ هەزار فرانک)مان دا بە (پیتەر) کە سیناریۆی بۆ نووسیبووین. دیسانەوە بە ناچاریی بەهۆی نەخۆشییەکەوە من لە فیلمەکە هاتمە دەرەوەو وازم لێهێنا. بەڵام رۆژێک ئەم بەسەرهاتەی من لەگەڵ ئەو سیناریۆیەی فیلمی (یەڵماز گوینای) لە ڕۆژنامەیەکی ئەڵمانی بڵاوبوویەوە. دەرهێنەرێکی بەڕەگەز تورک بەناوی (فاتیح ئاکین)پەیوەندی پێوە کردم وتی من لەو سیناریۆیە کار دەکەم. منیش بۆم نارد و بڕیار بوو وەڵامم بداتەوە، لەو ڕۆژەوە بۆم ناردووە تا ئێستا بێ دەنگە و هیچ وەڵامێکم دەست نەکەوتووەتەوە.!

*تەواو لێرەدا ئەو چیرۆکەت کۆتایی پێ دێت؟
– نەخێر، پار ساڵ ئەم بیرۆکەیە هەر لە مێشکمدا بوو، بۆیە جارێکی تر گەڕامەوە بۆ ئەو ئەرشیف و یادەوەرییانەی لەگەڵ(یەڵماز گوینای) هەم بوو. لە نێوان ئەوەی فیلمێکی دیکۆمێنتی؟ یان کتێبێکی مێژوویی و وێنەیی لەسەر بڵاو بکەمەوە؟ بۆیە دووەمیان هەڵبژارد و لە ئەرشیفی خۆمدا نزیکەی هەزار وێنەم دیاری کرد هی کاتی وێنەگرت و کارکردن لەگەڵ (یەڵماز گوینای) بۆ ئەوەی کات و مێژووی وێنەکە و چیرۆکەکانی بنووسمەوە. لەو ژمارەیەش جارێکی تر نزیکەی(٨٠) وێنەی زۆر تایبەت و نەبینراوم هەڵبژارد. دەتوانم بڵیم ٨٠ وێنە و ٨٠ چیرۆک و٨٠ بەسەرهات لەو کتێبەدا لەدایک بوو. ڕۆژانە بەردەوام کارم لەم پرۆژەیەدا دەکرد. تا بەڕێکەوت نووسەر و سیناریستێکم لە زیوریخ ناسی کە لە (فلیکس ئەپڵ)وەک ڕاوێژکاری سیناریۆ کار دەکات. باسی ئەو پڕۆژەیەی خۆمم بۆ کرد، پەیمانی دامێ هاوکاریم بکات، منیش هەمو کاتێ کە بەشێکم دەنووسی بۆم دەنارد و سەرنجی خۆی بۆ دەنووسیم و دەسکاری دەکرد و بۆی دەناردمەوە. تا لەمانگی نیسانی ٢٠١٦ هەمو کتێبەکەی پێکەوە بینی. لەمانگی ٩ی ئەمساڵ کتێبەکە تەواو بوو بە هەمو وردەکارییەکانییەوە دەزگای بەناوبانگی چاپەمەنی کتێب لە سویسرا (Publishing Partuers Gw 6 H) بڕیارە لە مانگی ١ی ٢٠١٧ بە زمانی ئەڵمانی بڵاوی بکاتەوە، لە ٢٨- ١- ی ٢٠١٧ لەپاریس لە ئەنیستووتی کوردی لای کەنداڵ نەزان سیمینارێک بۆ کتێبەکەم ئەنجام دەدرێت .

*گۆڕینی سیناریۆی ئەم فیلمە دیکۆمێنتییە بە کتێبێک گرنگی لە چی دایە، ئایا دەتوانێت هەمان ئامانج بپێکێ کە تۆ بیرت لێکردبوویەوە؟

– نەخێر ناتوانێ، بەڵام بە ناچاری ئەم کارەم کرد، بەڵام ئەم کتێبەکە کە (وێنە و نووسینە) دەمەوێت بە هەر سێ زمانی ئەڵمانی و ئینگلیزی و کوردی چاپ بکرێت. بایەخی ئەم کتێبە لەم ڕۆژگارەدا لە سێ لایەنەوەیە:
یەکەم: گەڕانەوەیەکە بۆ ئەو مێژووەی تورکیا، بۆ ئەوەی بڵێم لەو سەردەمەوە بۆ ئێستا لە بارەی ئازادییەوە لە تورکیا چ ڕوودەدات.!
دووەم: ئەو قۆناغەی تورکیا کە یەڵماز گوینای تێدا بووە، لەگەڵ ئەم ڕەشەی ئێستای تورکیا کە ماوەکەی نزیکەی ٣٠ ساڵە هەمان مێژووە بە ڕووخسار و کەرەستەی جیاوازەوە.
سێیەم: ساڵی٢٠١٧ دەبێتە یادی ٨٠ ساڵەی لەدایک بوونی یەڵماز گوینای، کە بڕیارە لە سەرەتای ساڵی داهاتوو کتێبەکە سەرەتا بە زمانی ئەڵمانی بڵاو بێتەوە.
* چۆن بوو هاتی بۆ پێشانگەی کتێبی نێودەوڵەتی کتێبی فرانکفۆرت؟
*کەزانیم پێشانگەی کتێبی نێودەوڵەتی فرانکۆرت هەیە و لەو پێشانگەیەشدا بەشی کتێبی کوردی هەیە، هاتم ویستم بزانم ئایا دەزگایەکی چاپەمەنی کوردی هەیە بتوانێت ئەم کتێبە مێژووییە لەسەر بەشیکی وونبووی مێژووی سینەما و کولتووری نەتەوەکەیانە چاپی بکەن؟

ئەوە زێدەیە
(ئەی هیچ دەزگایەکی چاپەمەنی کتێبی کوردیت بینی، تا ڕێکبکەون و ئەو کتێبە وەر بگێڕن بۆ زمانی کوردی و چاپی بکەن؟
-بەداخەوە کە هاتمە ستاندی کورد، بینینیم بەشیکی زۆر هەژار و چۆڵ و لاوازە. کە قسەم لەگەڵ هەندێ کەس لەو بەشە کرد، وتیان بەهۆی تەنگەژەی ئابورییەوە لە هەرێمەکەمان نەماتوانی لەوە زیاتر بەشداری ئەم چالاکییە جیهانییە بکەین. هیچ دەزگایەکی کوردیش نەبوو، ئامادەبێت ئەم کتێبە ئەڵمانییە بگۆڕێت بۆ کوردی و بڵاوی بکاتەوە.!).

برای خۆم ئەوانەش زیاد بکە :
یەڵماز گۆنای خۆی پۆلیسی ئەنتەر پۆل بە دوایەوەبوو بۆی دەگەڕا. بۆ بەشداریمان لە ڤیستیڤالی کان، بەڕێوەبەری ڤیستیڤاڵ گووتی: من دەتوانم تەنها ڕۆژانی ڤیستیڤاڵ یەڵماز گۆنای بپارێزم ، ئەوەبوو ئەوەشی کرد.
*ئەی باشە دوایی چۆن توانی ژیانی خۆی و خێزانی مسۆگەر بکات؟
– ئەوەبوو دوواتر دۆسییەکەمان گەیاندە فرانسوا مێتران و چەندین سیاسەتمەداری

فرانکفۆرت

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish