Skip to Content

گەڕانێکی درەنگ وەخت … نەوزاد بەندی

گەڕانێکی درەنگ وەخت … نەوزاد بەندی

Closed
by تشرینی یه‌كه‌م 1, 2019 General, Poems

دڵت خۆش نەبێ لە کۆمەڵگادای ..
زۆربەی ئەو خەڵکە بۆ ئەوە لای تۆن ،
ھەتا لە سەرەی سەموندا سەعاتێ ڕاوەستی ..
ھەتا بە دوو ترافیکلایت فولکەیەک نەبڕی ..
ھەتا دوکەڵی جگەرە و ئەگزۆز بکەن بە قوڕگتا..
ھەتا خۆڵەکانیان ھەڵدەنە بەردەرگاکەت ..
ھەتا سەعات دووی شەو لە گۆرانی و قاقا و قڕەقڕیان لە خەو ڕاچڵەکی..
ئەو خەڵکە بۆ ئەوە لە چواردەورت کۆبوونەتەوە،
ھەتا کە چوویتە بەر دەرگاکانیان بڵێن لێرە نیە ،سبەینێ وەرەوە ..
پێت ڕابوێرن و بڵێن ژمارەی مۆبایلەکەت جێ بێڵە خۆمان پەیوەندیت پێوە دەکەین
و
پەیوەندیشت پێوە ناکەن ..
ھەتا لە شەودا فول لایت بەن لەچاوت
لە سایدی ئەوبەری شەقامەکەوە بە خۆیان و ئوتومبیلەکانیانەوە بێنە سایدی ئەمبەر بۆ سەر سەرت ..
ھەتا کارێ بکەن بازاڕ بوەستێ ..
ھاتون ھەتا تۆ بکەن بە سەنگەر
لە شەڕی نەوت و گازی سروشتی ..
ئەو خەڵکە لە چوار دەورت کۆ بوونەتەوە ھەتا فێرت بکەن کە وەزعەکە ھەروایە و خراپتریش ..
ھەتا فێرت بکەن کە دنیا ئەوە ناھێنێ ..

لە چۆڵەوانییەک بگەڕێ برادەر ..
چۆڵەوانییەک
دوور بێ لە قنگە جگەرە و
جڕت و
دروشم و
عیبادەت و
بۆنی گۆرەوییەکانیان..
چۆڵەوانییەک
دووربێ لە لەگەنە برنج و
سەرەی بەردەم ئاودەستخانەکانیان ..

لە چۆڵەوانییەک بگەڕێ ھاوڕێ ..
دوور بێ ..
دوورتر لە دووریی
لەو ھەموو داستان و
سەرکەوتنە وەھمیانە ..
لەو ھەموو پیاوچاکەی نەیانتوانی
ڕێگایەک بدۆزنەوە ..
لەو ھەموو پڕۆفیسۆرە نەخوێندەوارە ..
لەو ھەموو چاوەڕوانییە ..

Previous
Next
Kurdish