ئەو هەفتەیەی حەوت ڕۆژ و شەوێكە … دڵشاد مەریوانی

ڕۆژی یەكەم:
تۆ لە دڵمایت
كە نەتوانم بتبینم و بۆنت بكەم
كە نەتوانم تامت بكەم و بتگرم
كە نەتوانم گوێت لێ‌ بگرم.

---

تۆ لە دڵمایت و زۆر دووری
ئای كە دووری میوانی دڵ.

---

من لە دڵتام
كە نەتوانی بمبینیت و بۆنم بكەی
كە نەتوانی بمگریت و تامم بكەی
كە نەتوانی گوێم لێ‌ بگری.

---

من لە دڵتام و زۆر دوورم
خانەخوێكەم.. ئای كە دوورم!

ڕۆژی دووەم:
تەڕ دەبم و سەرمام دەبێ‌
لەبەر ئەو شەستەبارانە.. سەما مەكە
هەنسكەبڕكێم تووش دەبێ‌
لەبەر ئەو تۆف و زریانە.. هەڕا مەكە
بۆ وا دەكەی؟
كەی وتومە: هەرچی دەردێ‌
تووشی تۆ بێ‌
تووشی دڵی منیش دەبێ.‌

ڕۆژی سێیەم:
من نێرگسیم،
زۆریش حەزم لە نێرگسە
كەی وتومە تۆ لەو دەچی
وەك (مەولەوی)
وتم نێرگس لە تۆ دەچێ‌!

---

من زەردم و ئەتۆش سپی!
زوویر مەبە
بڕوا بكە
بە (خۆم)م وت.. لەگەڵ (ئەو)دا
تۆش لەو دەچی!

ڕۆژی چوارەم
ڕاستت دەوێ‌
ئەو ژیانە بێهوودەیە و هوودەی من تۆی!
درۆت دەوێ‌
ئەو ژیانە بێهوودەیە و هوودەی من تۆی
هوودەیی بێ‌
یان بێهوودە
ئەو ژیانە
هەردوو هەر تۆی!
ئاشنا
یان دڵ پڕ غوربەت
بەم ژیانە
هەردوو هەر تۆی!
تەنیا خۆم بم
یان تەنیا تۆ
لەم ژیانە
هەردوو هەر تۆی.

ڕۆژی پێنجەم:
ئەم جیهانە دووكانێكە
سەودام بكەی
سەودات دەكەم
كڕیار و فرۆشەر، خۆتی.

---

ئەم ژیانە پەرستگایە
بتپەرستم
بمپەرستی
ژیاو و ژیێنەر خۆتی.

---

بیانوو مەگرە
كام كامتری زۆر خۆشدەوێ‌
ئەوەی دڵی من دەیەوێ‌
تۆش دەتەوێ‌.

ڕۆژی شەشەم
دوێنێ‌ لای تۆ
نامەیەك هات
ئەمڕۆ لای من
بووە شیعر
ئەمڕۆ لای من
نامەیەك چوو
سبەی لای تۆ
دەبێتە سیحر.

---

نامە
شیعرە!
شیعر
سیحرە!

ڕۆژی حەوتەم:
(ئەمڕۆ) (سبەینێ‌)ی (دوێنێ‌)یە
هەفتە هەر (حەوت) ڕۆژی پێیە
كێ‌ دەڵێ‌ (شەوی هەشتەم)ی هەفتە نییە؟
من دڵنیام (خۆر) ڕووی نایەت سەر دەربێنێ‌
تا شەوی (هەشتەم)ی هەفتەم بۆ نەهێنێ‌.

شەوی هەشتەم:
ڕووت و تەنیای
ڕووت و تەنیام
وەرە باخەڵمەوە بنوو
كەی لە (من) جیای
كەی لە (تۆ) جیام
ئەی حەقیقەت!

    7\1\1988
 دڵشاد مەریوانی

• سه‌رچاوه‌:
گۆڤاری به‌یان، ژماره‌ (143) مایسی 1988. ل:41 – 42.