ده‌سته‌چیله‌یێك شیعری ئه‌رمه‌نی … و : نه‌ژاد عزیز سورمێ
كه‌وانه‌ی مانگ
ئا : ئاسڵان
بێ هه‌ست و خوست پێك گه‌یشتین ..
ده‌رگای سێبووریمان لێ به‌سترا
كزه‌ڕۆشنایی سه‌فه‌ر
كه‌وانه‌ی مانگی گۆشه‌ی خه‌ڵوه‌ت ،
له ئاسمانا ..
تینوو بوو ، یادگاره‌كانی ده‌نووسییه‌وه ..
دووچاوی گه‌وره
ڕووبه‌ڕووی چاوه‌كانم ،
بۆچی كزبوون و له‌ناكاو
پێكه‌نین و گڕژینه‌وه ؟
دوو پیاڵه‌ی سپی له سه‌رخۆ شكان
ئه‌ستێره‌ی سه‌حه‌ر
جوانه‌ئه‌سپی سپی خۆی تاودا ..
كه گوڵی لێوه‌كانی پشكووت
له ئاسمانه‌وه
ئه‌ستیره‌یێ
به‌سه‌رسامییه‌وه داڕژا ..
———————————————————
ده‌نگی خوێن
ئا: ئاسڵان
نه ئه‌ستێره‌ی به‌ربه‌یان بوو
نه مانگ
چاوی تۆ بوون
به چاوه‌كانم پێكه‌نین ..
نه شایی بوو ، نه ئاهه‌نگ
ده‌نگ و ئاوازی خوێنی من بوو
له‌ژێر پێی تۆدا
ئاوزنگی ده‌دا ..
نه باڵدارێ بوو
نه خه‌ون
سێبه‌ری تۆ بوو ڕۆیی
تا جارێكی دی دڵم
هه‌لا هه‌لاكا .
——————————————–
مۆته‌كه
زۆرایر میرزاییان
ئاسمان مووه‌كانم ڕاده‌كێشێ
زه‌مین خۆی به له‌شم هه‌ڵواسیوه
منیش په‌نا ده‌به‌مه به‌ر دڵی شه‌و ، له هانام بێ
هاواری من ،
كه وه‌ك گڕی ئاگر كڵپه ده‌كا
یه‌كه‌م قرچه‌ی سووتان
له هه‌نییه‌ی سڕم ده‌چه‌قێ و
زمانی مه‌شخه‌ڵداری شه‌و
ڕێڕه‌وه ڕۆشنه‌كان ده‌لێسێته‌وه ..
به‌ڵام من خلۆر ده‌بمه‌وه
له ناو پێچی گه‌رده‌لوولدا خلۆر ده‌بمه‌وه
ده‌سته قوڕاویه‌كانیشم به ده‌م و چاومه‌وه گرتووه .
—————————————-
پاسه‌وان
ئارشاویر مه‌گردیچ
دێرزه‌مانێكه هه‌تاو
به چه‌كووشی په‌لكه‌زێڕینه‌ی ڕه‌نگینی
ئه‌شكه‌وتێكی بۆ هه‌ڵناوم
هه‌موو ماڵ وده‌وڵه‌تی من ، به دیواری ئه‌شكه‌وته‌وه
چوار وێنه‌یه
چوار وێنه‌ی پارچه پارچه ..
خاك : برسی و گۆشه‌گیر
ئاو : به لێوی وشكهه‌ڵاتوو
ئاگر : به چاوی بێ ڕووناهی
(با)ی بریندار
له‌سه‌ر پێخه‌فدا كه‌وتوون ..
له ده‌روازه‌ی ئه‌شكه‌وته‌كه‌م
گوڵبه‌ڕۆژێ پاسه‌وانه و
له به‌رابه‌ر
هێرشی خۆر وه‌ستاوه .
- له ژماره 11 ی ئۆردیبه‌هه‌شتی 1349 ی
ئێرانی گۆڤاری ( سخن ) كراون به كوردی
