دوو ڕۆژ … سه‌ردار جاف
ئه‌ڵمانیا
له به‌رده‌می داڵانی نیشتیمانه‌وه‌م
له بۆن و به‌رامه‌ی شارم
هه‌ر به سوره‌تی دابڕان
سوێندی ته‌نیایی دراوم
گێژه‌ڵوكه هه‌ڵیكرد و حاڵی نه‌بووم
نه له خۆم و نه له‌و دیوم
له‌م زه‌مه‌نی مه‌جمه‌ره‌دا ئاوا نابێ و
زۆر شێواوم
له كام گێژه‌نی ئیشقه‌وه
په‌ڕه په‌ڕی دڵ دڕاوم
له به‌ر ده‌رگای
شاره فڕیوه‌كه‌ی ئاگر
چاوه‌نواڕم
پیاڵه‌ی شه‌رابی هه‌نگوینیم بگاته ده‌ست
ئه‌و شاد خوده
حه‌سره‌تی ژاری كوشنده‌ی به باڵای دووریما بڕی
له ژوانی پڕ تاسه‌دا
هه‌ڵدێراوی نهومی حه‌وته‌می وشه‌م
دوور له باڵای
تووڕ دراوی نێو دووكه‌ڵ و كوێره ڕێگام
مه‌رگی به قامه‌تی حه‌ز و ویستم سڕی
له په‌نجه‌ره‌ی
باڵه‌خانه‌ی پڕ شنه‌وه
ده‌ڕوانمه
بانێژه‌ی ڕووته‌ن و گه‌رما
له ئاست ساباتی بێ گه‌ڵا
منی كزۆڵ ….. چاو به ئه‌سرین
له مه‌رقه‌دی زه‌ندخانه‌ی دا
به ئاودامانی خاك ده‌كرێم
له میحرابی گله‌ییدا
نوێژێ بۆ پاڕانه‌وه و تكا كردن داده‌به‌ستم
تا پێڵوی چاوی هه‌ڵێنێ
ئیتر به‌س بێ
به‌ره‌و په‌تی قه‌ناره‌ی دابڕان نه‌برێم
4 / 10 / 2020
