شیعر/ گەڕان بە دوای دەرەوەی بازنەی کاربەدەستدا.. نەوزاد بەندی
ئەرێ له کوێ
ئاواییەک دەست ئەکەوێ ،
کاربەدەستەکانی ساڵ چوار فەسڵە ،
باسیان باسی موچە نەبێ ؟
( نامەوێ کاربەدەست ببینم
نامەوێ گوێم لە دەنگی کاربەدەست بێ ..
نامەوێ ڤێلا و کۆمپانیا و تاوەر و مۆڵ و
ئوتومبیلی زرێپۆشی کاربەدەست ببینم ..
نامەوێ هەواڵە جەرگبڕەکانی کاربەدەست ببیستم ..
نامەوێ ….
نامەوێ زەماوەندی دووەم و سێیەم و چوارەمی کاربەدەست ببینم ..
نامەوێ بوتڵێ ویسکی سکۆتلەندی کاربەدەست تەماشاکەم
نامەوێ چاوم بینەری
بڕوانامە بە چەقەنەیەک وەرگیراوەکانی ، کاربەدەست بێ ..
نامەوێ نەیارەکانی کاربەدەست ، ساڵ چوار فەسڵە ،
باسی ملیارەکانی کاربەدەستم بۆ بکەن )
لە کوێ دێیەک بدۆزینەوە ،
هەواڵی بە پەلەی کاربەدەستی تیا نەبێ ؟
لە کوێ ئەشکەوتێ دەست ئەکەوێ ،
شوێن پێ و
بەبەردبووی کاربەدەستی لێ نەبێ ؟
من ئەمەوێ هەڵفڕم ..
لەکام ئاسمان ،
شیناییەک هەیە ، مەقەستی کاربەدەستی لێ نەبێ ؟
( نامەوێ سەیری دەمی داپچڕاوی خەڵکانێک بکەم ،
لە جوانی کۆشکی کاربەدەست ، داپچڕا بێ ..
لە گەنجی و قۆزیی کاربەدەست ، داپچڕا بێ ..
لە زیرەکی وفەساحەت و بەلاغەتی کاربەدەست ، داپچڕا بێ ..
له دەسکەوتەکانی کاربەدەست لە هەر دەقیقەیەکدا ، داپچڕابێ …)
ئەرێ لە کوێ گۆڕێ شک ئەبەن ،
دروشم و سروودی کاربەدەستی تیا نەبێ ؟
چرایەک تۆ بڵێی شک نەبەن ،
کە نەوت و .. فتیلە و ..منەتی
کاربەدەستی تیا نەبێ ؟
