![تۆ.. شیعری: ستیڤان شەمزینی تۆ.. شیعری: ستیڤان شەمزینی](https://dengekan.info/wp-content/uploads/2021/02/Stivan.jpg)
تۆ.. شیعری: ستیڤان شەمزینی
لە ئاسماندا تۆ بەدی ئەکەم
لەگەڵ دڵۆپە بارانەکان ئەڕژێیتە سەر جەستەم
باران فرمێسکی ئەشقی تۆیە
دەروونی ژەنگگرتووی پیاوێکی رۆژهەڵاتی ئەشواتەوە
ئاسمان نیشتمانی جاویدانی تۆیە
دەروازەی بۆ سەرکێشی و فڕینەکانم کردۆتەوە
ئەشق گۆرانی سەرمەدیی تۆیە
کە رۆحی من ئەلەرێنێتەوە
تۆ دەستت گرتم بۆ ناو باخچەکانی ئەوین
بە ماڵی فریشتەکانت ناساندم
تۆ منت لەگەڵ رووناکی ئاشت کردەوە
بە ئیرۆست ئاشنا کردم
تۆ فێری فڕینت کردم
هەر خۆت دوو باڵی زیویت پێبەخشیم
تۆ تامی میوەکانی بەهەشتت پێ چەشتم
تنۆک تنۆک ئاوی ئومێدت پێدام
تۆ منت بردە سەر زنەی روون و
مۆمێکت لە تاریکی دڵما داگیرساند
تۆ سەهۆڵبەندانی ناخمت تواندەوە
ئاگری ئەشقێکی بەتینت چێ کرد
تۆ بەدەستە میهرەبانەکەت لەدۆزەخ قوتارت کردم
شەوەزەنگ کردم بە رۆژی رووناک
تۆ لە کەناری مەرگ منت دەرهێنا
شاڕێی روونی ژیانت بۆ کردمەوە
تۆ واتکرد سەرلەنوێ لە دایکبمەوە
تۆ واتکرد سەرلەنوێ بڕسکێمەوە
تۆ واتکرد جارێکی دی لەگەڵ گوڵا بپشکوێم
تۆ واتکرد زمانم بۆ ئەشق بپژێ
تۆ واتکرد ببمە سترانێکی تەواو نەبوو
واتکرد جارێکی دی لە تۆدا خۆم بدۆزمەوە
ئای لەو میهرەبانییەی تۆ
کە منی سەرلەنوێ ژیاندەوە
ئای لە دڵناسکی تۆ
پۆڵای رۆحی کردم بە ئاوریشم
ئای لە تۆ
ئای لە تۆ
وای لە تۆ
دیسەمبەری 2014
هۆڵەندا – ئارنهێم