بیرەوەریيەکانی فەقێیەکی گومڕا-(51)- شەماڵ بارەوانی
بەشی 51
ئیسرائیل ٢٠٢٢ی دەڕووخێت!
بیرمە مانگی ڕەمەزانێ بوو، لە دێی چل هەوێزە مەلابووم، وتاری ئێوارانی ڕەمەزانێم بۆ دەدان. باسی فەڵەستین و قودسم بۆ خەڵکەکە دەکرد و یەک حەماسەت و عاتیفەی دینی منی گرتبوو، هەر مەپرسن !
دەمگوت: سەبرەن سەبرەن، یا یەهود، جەیشو موحەمەد سەوفە یەعود.
خوشک و برایانم: ئەمڕۆ، یان سبەی، زوو، یان درەنگ، دەوڵەتی سەهیونییەت(مەبەستم ئیسرائیل)بوو، لەناودەچێت و لەسەر دەستی ڕۆڵەکانی سەلاحەدینی ئەیوبی، دڵنیابن، دووبارە قودسی بریندار و داگیرکراو، لە ژێر چنکی جووی خەبیس ڕزگار دەکەین.
موسڵمانان وەک لە ڕیوایەتێک هاتووە، پەیامبەرمان دەفەرموێت، کە دار و بەردیش لە دژی ئەو جووڵەکە ترسنۆک و پیسانە دێتە گۆ، پەیامبەر دەڵێت:(ڕۆژی دوایی نایەت، تاکو موسوڵمانان جوولەکەکان دەکوژن، کاتێک موسوڵمانێک دەیەوێت جوولەکەیەک بکوژێت، جوولەکەکە ڕا دەکات بۆ پشت هەر درەختێک و بەردێک، خۆی بشارێتەوە، درەخت و بەردەکە، دێنە گۆ و دەڵێن: ئەی موسوڵمان، ئەی بەندەی خودا، وەرە ئەوە جوولەکەیەکە لەپشتەمن خۆی حەشارداوە، بیکوژە! تەنها درەختێک نەبێت، کە ناوی غەرقەدە، درەختی جوولەکەیە)٭
ئامادەبوانی مزگەوت، هەموو دەیانگوت: ئەلڵاهو ئەکبەر.
جا درۆیەکیشم دەکرد و دەمگوت: ئێستا جوولەکە لە ئیسرائیل هەمووی خەریکی ڕواندنی ئەو درەختەیە، تەنانەت هەرچوار لای ئیسرائیلیان بەو درەختی غەرقەدە تەنیوە و هەموو ماڵێک غەرقەد دەڕوێنێت و لە ئێمەی موسوڵمان زیاتر باوەڕیان بەو فەرمودەی پەیامبەرمان هەیه، کەوام گوت. ئەوجارە هەمووی پێکەوە گوتیان (اللهم صلي علی سیدنا محمد)هاهاها.
موسوڵمانان، دەزانن لەمێژە جوولەکەی کۆڵکە مار، دەستیان کردووە بە بڕینەوەی دارزەیتونی خوشک و برا فەلەستینییەکانمان و لە شوێنیدا ئەو غەرقەدە کافر بابە دەڕوێنن؟
خوشک و برایانی ئیماندارم، هێندەی نەماوە و بەڵێنی اللەی تەعالایە و هیچ قسە لەسەرکردنێک و گومانێکی تێدانییە و دێتەجێ و دەوڵەتی داگیرکەری جوولەکەی پیلانگێڕ، لە ساڵی(٢٠٢۲) دەڕووخێت٭.
ئـەوجارە هەرخۆم: سوبحان اللە لە گەورەییت خودایە! قادر هەرخۆتی خودایه، بەهێز و دەسەڵاتدار هەرخۆتی یا اللە.
له ڕاستیدا من ئەو مەسەلەی دەرەخت ڕواندنەی غەرقەدم لە نامیلکەی نووسەر و بانگخوازێکی ئیسلامی خوێندبووەوە، درۆیەک دوو مەتر بوو، من دوو مەتری تریشم بۆ زیاد کرد و گوتم گرنگ کاریگەری دروست کەم و حەماسەت و عاتیفەی دینی خەڵکی پێی فول کەم و هەستی دژە جولەکەییان بوروژێنم.
ئیمامی حەنەفی دەیگوت: ڕیوایەت لە مەککە بستێک بێت، تا دەگات بە عێراق دەبێت بە مەترێک !
منیش ئەوڕۆژە، مەترێک بوایە، دوو مەتریترم پێوە دەنا.
لەپڕ، پیاوەک مام(ک…) گوتی: ئائا بەڕیشی عەلی باپیری، کاکە مەلا ئیسرائیلمان بۆ دەروخێنێت و قودس ئازاد دەکات.
مام(ک…) کەسێکی زۆر کۆمێدی و قسە لە ڕوو و ناخ پاک بوو و زۆریش کەیفی بە من دەهات و زۆر لەماڵی ئەوان نانم دەخوارد و ئەو کەسێکی یەکێتی بوو وەک حیزب، ئەوکات تازە بزووتنەوەی گۆڕان دروست ببوو.
هاشوهووشی ئەو بزووتنەوەیه هەموو وڵاتی تەنی بوو. خەڵکێکی زۆر وەک فریادڕەس و تەنانەت هەبوو وەک گیڤارا و غاندی و ماندێلایەکی کوردی سەیری( نەوشێروان مستەفا)یان دەکرد و ئومێدی زۆر و خەونی بێشوماریان لەسەر بزووتنەوەکە هەڵچنیبوو.
مام کەریمیش مەیلی بۆ گۆڕان هەبوو و هەر مەدحی نەوشێروان و گۆڕانی دەکرد و سەری زمان و بنی زمانی نەوشێروان بوو لای من، گوتم با منیش جەوی بگرم و لە میزاجی بدەم و تۆڵەی خۆمی لێ بکەمەوە، بەرپەرچم دایەوە و گوتم: نانا، نەوشیروانە چەپ، بە ماچکردنی کتێبەکەی دەستی یا شێخ، قودس ئازاد دەکات.
ئامادەبووان هەموان دەستیان کرد به پێکەنین.
…..
٭في صحيح البخاري، عن أبي هريرة أن النبي قال: (لا تقوم الساعة حتى يقاتل المسلمون اليهود، فيقتلهم المسلمون حتى يختبئ اليهودي من وراء الحجر والشجر، فيقول الحجر أو الشجر: يا مسلم يا عبد الله هذا يهودي خلفي، فتعال فاقتله). وزاد فيها (إلا الغرقد، فإنه من شجر اليهود).
٭ئەو ڕووخانەی(دەوڵەتی ئیسرائیل)یشم پێشووتر، لە وتاری مەلایەک گوێ لێ ببوو !
