Skip to Content

لە سەرەمەرگ بانگت دەكەم چاوەكانم دابپۆشیت.. سه‌باح ڕه‌نجده‌ر

لە سەرەمەرگ بانگت دەكەم چاوەكانم دابپۆشیت.. سه‌باح ڕه‌نجده‌ر

Closed
by March 5, 2021 General, Poems

لە قوتابخانە لە هۆبەیەك
دەمانخوێند و لە ئاوێكی تەنك و بە بوار دەپەڕینەوە
دوای سی و یەك ساڵ تەلیسم و تاریكی شكا
لە ساردترین شەودا ژمارەیەك
هاتە سەر شاشەی مۆبایلەكەم و زمانی گەڕا
هەلاو
ڕۆشنایی خودا دوورنییە و دەنگت
خوداوەندیی و پاك و ڕوونە
جیهانی لێوەدێ
فەرموو گیانی من بە
بەڕێزت كێی
تۆ حەسرەتی ئەبەدیی و بكوژمی و هێزی دڵدانەوەش
هەموو شتێكت لەبارەوە دەزانم
پیاوێكی حەز لە كراس و پانتۆڵ و پێڵاوی ڕەش ناكەیت
جلوبەرگی سادە و ماتیش لەبەردەكەی
لەتاو شەڕ لە گەڕەكی زۆربڵێ و هەواڵ ناخۆش
بەدەم خورپەی ڕۆشنایییەوە بارتكرد
ئەم ساتە پەردەی شادیتە
بەرز بەرز ڕایدەگریت و ڕێزی دەگری
بە درێژایی شەڕ تفەنگچییە قەڵب و چرووك و فیتنەچییەكان
نەخشەی هێرشەكانیان لەبەر شەوقی تفەنگەكانیان دەكێشا
ئەم شەوقە چییە
بەردەوام پێشوازییان لێدەكات و باش دەنوون
هەنگاوە یەكەمەكان ئێوە لە كوێن
باڵندە بە باڵەكانیان ڕووناكییان بۆ گواستوونەتەوە
بڕواننە باڵەكانیان پەلوپۆتان بەهێز دەكا و گۆرانی ئاكامن
دوژمن فێری كردن چی پێویستە بیكەن
چاویان ساغە و لە ئاسمان خۆیان
لە بەرد و گوللە و كڵاو دەپارێزن
ئاژاوەی زەویشیان بژار كردووە
دەتوانن لەبەرپێ لایدەن و دەنگی ئومێد هەڵبڕن
بەرانبەر ئومێد ئاوێنە هەیە
ئومێد مانگی بێ سەروشوێن دەهێنێتەوە حەوزی
حەوشە و ڕۆح ئاو دەدا
لە ڕێگاشدا ڕێبوار دەگەڕێتەوە
گەڕانەوە جۆرێكە لە سێبووری
باڵت پێ دەگرێ و لە ئێستای پڕ گرێوگوڵ لەگەڵ خۆتدا هەڵدەكەی

حوزەیرانی 2019 هەولێر

Previous
Next