Skip to Content

قەسیدەی دەستنووسێکی کۆنی عەشق.. ستیڤان شەمزینی

قەسیدەی دەستنووسێکی کۆنی عەشق.. ستیڤان شەمزینی

Closed
by April 16, 2021 General, Poems

لە دەستنووسێکی کۆنی عەشقدا
چەند سروود و
غەزەلێکی ئەوینێکی پڕ جۆشم دۆزییەوە
لەو دەستنووسەدا، بینیم نووسیبووت
ئەی پادشای خەمبارم
قولابی عەشقت چەقیوە لە دڵم
ئاوازی کپ و بێدەنگت
هاتۆتە ناو هاوار و ناڵەناڵمەوە
مەتەڵەکانی دڵمت
هەمووی هەڵهێنا و شی کردەوە
جەرگی تاریکی
شەوە ئەنگوستەچاوەکانمت شەق کردووە
لەو دەستنووسەدا، بینیم نووسیبووت
ئەی ئیمپراتۆری ئەسرین
خوێنی گەرمت لە منا دێت و دەچێ
لە دووریی دوورە و تا چاو بڕ ئەکا
شەبەنگی باڵاتم لێ دیارە
زریانێک لە فرمێسک و خەندە
لە پێنووسەکەتەوە هەڵیکردووە
پیت بە پیت
چیرۆکی ژانە خۆڕسکەکانت ئەنووسێتەوە
لەو دەستنووسەدا، بینیم نووسیبووت
ئەی گەڕیدەی ناکام
تۆ بوویت منت لەناو ئازارەکانتا ناسییەوە
وێنەی منت خستە
نێو توێی ئەلبوومی چامە نەمرەکانتەوە
بە بەرچاوی درۆوە
ژانی هەقیقەتێکی تاڵ تۆی کوشت
لە پەنا گۆڕی منەوە
لە سارای فیراقدا تەرمی تۆشیان ناشت
لەو دەستنووسەدا، بینیم نووسیبووت
ئەی تاقانە یارەکەم
تۆ بوویت مزگێنی رووناکیت ئەدا بەشەو
مەلێکی پەڕاگەندەی گەرمەسێر بووی
بەرەو کوێستانی من هاتی
لە زەماوەندی مردندا
سەرچۆپیکێشی ژیان بوویت
لە دوورەوە ئەهریمەنی مەرگ
نیشانەی لێ گرتییەوە
لەو دەستنووسەدا، بینیم نووسیبووت
ئەی شازادەی دڵداری
تۆ بوویت ئاگری شادیت بۆ کردمەوە
پێشتر ئەمبینیت
گووڵاڵە سوورەی باخچەی فیردەوس بوویت
بە یەک چرکە و لە ناکاو
بوویتە دارئەرخەوانی سەر گۆڕستان و
وەک دارگوێزێ
دەستیانکرد بە رنینەوەی پرچی پێکەنینەکانت
لەو دەستنووسەدا، بینیم نووسیبووت
ئەی پاسەوانی جوانی
تۆ بوویت شمشاڵی غەریبیت بۆ ئەژەنیم
لە دوورەوە ئەمبینیت
جوانترین سەراب و ناوازەترین خەیاڵ بووی
لە تەنیشتمەوە بووی
ئەو ساتانەی پەپولەی خۆزگەم هەڵدەفڕین
لە تەنیشتەوە بووم
لەو کاتەی هەردووکمان بووینە بیرەوەریی
لەو دەستنووسەدا، بینیم نووسیبووت
ئەی میری ئاشقان
تۆ بوویت جۆگەلەی پێکەنینت رژاوەتە گوێم
لە نزیکت بووم
ئەو دەمەی کارێزی شیعرت بە رووما تەقی
لە دوورەوە بە نیگایەکت
وەک مەشخەڵی گڕ داتدەگیرسانم
بە هێزی وشەکانت
دەریای مردووی دڵمت ئەخستە شەپۆلدان
لەو دەستنووسەدا، بینیم نووسیبووت
ئەی میهرەبانترین پیاو
ئەوە تۆ بوویت ژنێتی منت ژیاندەوە
ئەسپی دڵی تەڕی خۆت
لە عەشقی مندا سەرمەدانە زین کرد
چەند سەرسامت ئەکردم
وەختێ بە بێدەنگی ئەتدواندم
لە فنجانی خەیاڵێکی سپییەوە
بەختی رەشی منت ئەخوێندەوە
لەو دەستنووسەدا،ـ بینیم نووسیبووت
ئەی سوارچاکەکەم
ئەوە تۆ بوویت ئەشکەوتی بیرت رۆشن کردمەوە
وەک پیری ئاتەشگا
ئاگری عەشقت لەسەر رۆحم کردەوە
لە ئاسمانی تۆدا
تەنێ شوێنی فڕینی مەلە ئەویندارەکان دەبووەوە
ئیدی چۆن جەستەت
لە گۆڕی تەنگدا ئەسرەوێ و جێی دەبێتەوە؟
لەو دەستنووسەدا، بینیم نووسیبووت
ئەی تاقانەترین ئاشق
ئەوە تۆ بوویت گەمە مەحاڵەکانت ئەکرد
لەسەر هەسارەی نەزۆکی زەوی
تۆوی ئەوینت ئەچاند
رووی گوناهەکانت
بە ئاوی پیرۆزی عەشق دەشووشتەوە
مرۆڤت رائەهێنا،ـ لە بری خوێن
مەی دڵداریی بخۆنەوە
لەو دەستنووسەدا، بینیم نووسیبووت
ئەی جوانترین مەخلوق
ئەوە تۆ بوویت رەنگەکانت پێ ناساندم
رەنگی عەشق و
رەنگی خۆشەویستی و رەنگی جوانی
هەرچەند بینایم تار بووە و
نازانم رەنگی تۆ لە کوێ بدۆزمەوە؟
لە کابووسی ژیندا، جێت نەبووەوە
باهۆزی مەرگ بردیتییەوە

Previous
Next