دەرگاکە دابخەن مەرگ بەڕێوەیە.. ستیڤان شەمزینی
ئەو دەرگایە دابخەن
موغێک ئەڵێ مەرگێک بەڕێوەیە
لە زیڤینگێکەوە*
تەتەرئاسا خۆی بەرەو ئێرە ئەکوتێ
ئەیەوێ چی دارچنارەکانە
بیانکاتە کۆڵەوژی دۆزەخ
دێت رەشگ** و
قینی لە مێژی خۆی بە ژیان ئەڕژێ
ئەو دەرگایە دابخەن
کاهینێک ئەڵێ مەرگێک بەڕێوەیە
چەشنی گێژەڵووکە چی گوڵە ئەیژاکێنێ
هەروەک مڵە نەمامە ناسکەکان
بێ ویژدانانە ئەخوا
تسۆنامییەکە پاپۆڕەکان
لەنیوەی رێدا تێکئەشکێنێ
خەونێکی شیرین
لە چاوی زارۆیەک ئەزڕێنێ
ژووان و دەست لەملان
لەدوو پەروانەی ئاشق تێکدەدا
ناهێڵی ماچێک
بە گەرمی بگاتە لێوێکی تامەزرۆ
ئەو دەرگایە دابخەن
فاڵگرەوەیەک ئەڵێ مەرگێک بەڕێوەیە
هەوەسبازترە لەو پیاوانەی رۆژ
لە باوەشی سۆزانییەکان ئەکەنەوە
بێ بەزەیترە
لەو جەلادانەی ئەشکەنجەی باران ئەدەن
بێ هەستترە
لەو سیخوڕانەی چاودێریی مانگەشەو ئەکەن
تاریکترە
لەو ژیانەی شەمشەمەکوێرەکان بەسەری ئەبەن
بێ شەوقترە لە گەڵا زەردەکان
کە بە فرمێسکەوە ئەوەرێن
لێڵترە لە ئاوی ئەو ئۆقیانووسە دڵ مردووەی
قەت ئاشق نەبووە
ئەو دەرگایە دابخەن
شێتێک ئەیووت مەرگێک بەڕێوەیە
لاسارترە لە شێتەکانی شار
کە بەفر تووڕە ئەکەن
بێ رەنگترە لەو ئەهریمەنانەی چاڵ
بۆ کۆترێ هەڵئەکەنن
دڵڕەقترە لەو رەشەبایەی
داروپەردووی کوخی هەژاران بەیەکا ئەدا
بێ ئەمەکترە لەوەی بۆنی عەترێ بکا و
شووشەکەی نەشکێنێ
بێ شەرمترە لەوەی بەلای باخێکدا بڕوا و
ئاگری دەروونی خۆی پێنەگەیەنێ
بێ رەوشتترە
لەو جەردانەی تاریکی شەوەکان ئەقۆزننەوە
ئەو دەرگایە دابخەن
قەشەیەک ئەڵێ مەرگێک بەڕێوەیە
نوقڵانە لێ مەدەن
هاتووە دارتووە بەردارەکان بوەرێنێ
هاتووە،
دۆستایەتی دێرینی کانی و رووبار تێکبدات
هاتووە گەزۆی ژیان
لە دەمی پاسارییەکان بفڕێنێ
هاتووە چڵی پێکەنین
لە دار سنەوبەری خۆشبەختی جیا بکاتەوە
هاتووە جادووی رەش
لە بووکی یەک شەوەی ئەستێرەیەک بکا
هاتووە شەڕێکی ئەبەدی
لەنێوان رەیحانە و گووڵاو هەڵگیرسێنێ
هاتووە ئاگرێک بکاتەوە
تا جوانی کوڵ و کۆی دامرکێتەوە
هاتووە پەتی سێدارە
بخاتە گەردنی بەرزی شاخەکان
هاتووە ئایدزی خۆی
بگەیەنێت بە تینی مۆمە بێدارەکان
هاتووە کەوە یاخییەکان
لە قەلەڕەشی نەگبەتی مارە ببڕێ
ئەو دەرگایە دابخەن، عارفێک ئەڵێ مەرگێک بەڕێوەیە
باهۆزێکە لە بن عەرشی ئەهریمەنەوە
بۆگەناوی هەناسەی دێ
بیابانێکی کاکی بە کاکییە
سەوزایی دەشت ئەبوغزێنێ
پیرە جرجێکە
چاوی بە فڕینی قازوقوڵنگەکان هەڵنایێ
دارکونکەرەکەیە
لەشی دارپرتەقاڵەکان کون کون ئەکا
زستانێکە، تەنیا وەیشوومە و کابووس
لەگەڵ خۆی دێنێ
پایزێکە
هەر خەزانی لە هەناوی خۆیدا شاردۆتەوە
ئاسمانێکە
بارانی فرمێسک و بەفری گریانی لێوە ئەبارێ
شەمەندەفەرێکی ویڵە
کەس نازانێ ئەتگەیەنێتە کوێ
قامووسێکە
هەزاران زاراوەی ترسناکی لە خۆ گرتووە
باخچەیەکی رەشپۆشە
تەنها گوڵی رەشی تیا ئەڕوێ
ئەو دەرگایە دابخەن
ساحیرێک ئەڵێ مەرگێک بەڕێوەیە
لە ڕەوە کولەیەک ئەچێ
گوڵەگەنمی تەمەن تام ئەکا
لە قرژێ ئەچێ ئاوی شینی دەریا
بە خوێن سوور ئەکا
لە بەرازێکی پیر ئەچێ
گێرەی کەون تێک ئەدا
لە رەشمارێک ئەچێ
دەفری وجوود پڕ ئەکات لە ژار
لە گورگێک ئەچێ
کە پەلاماری مانگی تابان ئەدا
لە دێوێکی سیلاوی ئەچێ
سەرزەمین پڕ ئەکا لە تاعون
ئەو دەرگایە دابخەن
زاهیدێک ئەڵێ مەرگێک بەڕێوە
بەڕێوەیە، کلارنێتەکان خامۆش بکا و
دەرگای بێدەنگی بخاتە سەرپشت
بەڕێوەیە چۆمەکان وشک وشک بکا و
گۆڕستانەکان ئاوەدان بکاتەوە
بەڕێوەیە شارەکان بکاتە سووتوو و
مرۆڤەکانیش بگۆڕێ بۆ خۆڵەمێش
بەڕێوەیە، کۆراڵی ژیان قڕوقەپ پێبکا و
سەگوەڕ بکاتە سمفۆنی
بەڕێوەیە سەما بکا بە ماتەم و
تەلارە رازاوەکان بکاتە کەلاوە
بەڕێوەیە پەڕۆی سەرچۆپی
بکاتە پەتی قەنارەی شایی
بەڕێوەیە بزەی لێوەکان
بکاتە ژەهری ناو شەربەتی خەیاڵ
بەڕێوەیە بە بارێک درۆوە و
ئەیەوێ فریشتەکان رەدووی بکەون
بەڕێوەیە لە ناوەختا پەیکەری تەمەن ئەڕوخێنێ و
کاتژمێرەکان ئەوەستێنێ
ئەو دەرگایە دابخەن
خودا خۆی ئەڵێت مەرگێگ بەڕێوەیە
وەک سوپایەکی خوێنخۆر دێ
تەنیا کاولستان دوای خۆی جێدەهێڵێ
وەک گروپە دایناسۆر دێ
هەموو شتێ لە ژێر پێیدا دەپلیشێتەوە
وەک کەمتیار دێ
دەم ئەخاتە ناو کەلاکی ژیان و
بەخێرایی ئەیجوێ
وەک یاجووج و ماجووج دێ
سەرچاوەکانی رووناکی وشک ئەکا
وەک دەجالێک دێ
ئاوێنە روونەکان ورد و خاش ئەکات
ئەو کاتەی دێ
رێ لە شەپۆل ئەگرێ بگاتەوە ئامێزی دەریا
رێ لە نیگا ئەگرێ
بگاتەوە مەملەکەتی پڕ جۆشی دڵ
رێ لە زێ ئەگرێت
بچێتەوە باوەشی رووبار
رێ لە باران ئەگرێ
جارێکی تر بڕواتەوە ئاسمان
رێ لە شەو ئەگرێ
ژووانێک لەگەڵ رۆژ ببەستێ
رێ لە هەموو شتێ ئەگرێ
تەنیا یەک شت نەبێ
تەنیا رێ
لە چاڵە هەزار بە هەزارەکانی خۆی نەبێ
تەنیا رێ لە خۆی ناگرێ
تەنیا خۆی
خۆی
خ
ۆ
ی
*زیڤینیگ: ئەشکەوتێکە خەڵک تێیدا بژی
** رەشگ: حەسوود
28-1-2017
باکوری زەمین
