Skip to Content

بەرچنەیەک لە بۆنی گزنگ.. ستیڤان شەمزینی

بەرچنەیەک لە بۆنی گزنگ.. ستیڤان شەمزینی

Closed
by May 15, 2021 General, Poems

ساتێک چوومە ژێر خاک
پڕ بە گەرووم هاوارم ئەکەم عەشق ئاینم بوو
ژنێک لەتوخمی پەروانە
فەرمانڕەوای سەرتەختی ئیمپراتۆریای دڵم بوو


کاتێ رەوانم لەسەر شاپەڕی باڵی فریشتەیەک
بەرز ئەبێتەوە بۆ ئاسمان
بە خوداوەند ئەڵێم ئاشقی ژنێکی سرک بووم
لە سولالەی با و تۆفان


کاتێ لە تراویلەکەوە ترنجامە
کارێزی روون و بێگەردی میهرەبانیتەوە
تریفەت لەبەر پێمدا راخست و
دەروازەی گزنگت بە ڕوومدا کردەوە


کاتێ عەشقت خۆی گەیاندە دڵم
وەک ماسییەک بووم بە تۆڕی تۆوە
بیرتە لەسەر تەمی پەنجەرەی خەونێک نووسیم
عەشق دوا گۆرانی منە


بۆ دۆزینەوەم سەرت کرد
بە هەزار کەلاوەی رووخاو و وێرانبوودا
نەتزانی لە ژێر دارتوویەکی بێ نازدا
مێژووی گەڵاڕێزان ئەنووسمەوە


پێش هەرەسهێنانی شەو لە خەونمدا
بۆنی پەرچنەیەک گزنگم کردبوو
هەر تۆ دەرکەوتیت لەگەڵ تیشکی هەتاو
کەوتمە مەراقی ژوانێکەوە


پێش زەمەنی لە سێدارەدانی باخچە
هیچ کاتێک بۆنی هەناسەت نەکردم
ئێستاش ئێشک ئەگریت
بەدیار خۆڵەمێشی بابردووی حەسرەتەکانمەوە


کاتێ بە ئاسمانەوە تۆم ئەبینی
لە جەستەی هەورێکی سەرخۆشدا
نەمدەزانی رۆژێک دێ
دڵۆپ دڵۆپ فرمێسکەکانت ئەبارێتە سەر دڵم


بیرمە لە ساتی مەرگی چڵە نێرگزدا
تاڤگەی هەستت رژایە ناو منەوە
کانییەکی ترت پێناساندم
لەودیو تەمتوومانی مەرگ و فەنابوونەوە


هەر ئەوەندە ئەزانم لەدڵی تۆوە هەڵئەقوڵێم
رێچکە ئەگرم بۆ ناو رۆحت
ئەوە بزانە لە عەشقی منەوە ئەبارێی و
جۆگەلە ئەبەستی بۆ ناو هەستم


لە یادی مەکە ئادرێسی هەمیشەییم
لە گەڕەکی هەناسە گەرمەکانتدایە
لە یادی ناکەم گۆڕی جاویدانی عەشقم
لە پرچە قەترانییەکانی تۆدایە


سۆلنا – سکەندەناڤیا مۆڵ
ستیڤان شەمزینی
ستۆکهۆلم – سۆلن
ا

Previous
Next