هاتووم بەرەو لای تۆ.. قەسیدەی: ستیڤان شەمزینی
هاتووم خۆم هەڵسووم لە بۆنی پرچەکانت
تاکو ببمە شووشە عەترێکی رژاو بەرووی دنیادا
هاتووم وەک نەمامێک لە کۆشی تۆدا بڕوێم
تا وەک شۆڕەبییەک بەسەر خەیاڵەکانتا بڵاوببمەوە
هاتووم لە سینگی تۆدا سۆراخی چێژێک بکەم
تاکو لە ئاسمانی تۆدا لە شەقەی باڵ بدەمەوە
هاتووم جەستەی نەرمت بە ئەسپایی هەڵکرۆژم
تاکو لە دڵتا وەک سنەوبەرێکی شەرمن بمنێژیت
هاتووم دەستەکانم بخەمە نێو دەستی ماندووتەوە
تاکو راددەی توانەوە و ئاوێتەبوون هەڵیانگڵۆفم
هاتووم لە کانیاوی چاوەکانتا تینوێتیم بشکێنم
تاکو مۆمی کزی تەمەنم بەسەر هەستتا بتووێتەوە
هاتووم بە دوای خەونێکی گشت ژیانما ئەگەڕێم
تاکو لافاوی ماچم مەراقی دەروونت بشواتەوە
هاتووم وەک شوێنکەوتووی دێوانەیەکی دێرین
تاکو لە بناری مەمکەکانتدا منداڵ ببمەوە
هاتووم لەشت بکەمە پیانۆی ئاوازێکی دەگمەن
تا پەنجەکانم بە سمفۆنی ئەوین ئاشنا بکەمەوە
هاتووم بولبوولی رۆحت لە قەفەز دەربێنم
تاکو دەستلەملان و ئاوێزانی باڵات ببمەوە
هاتووم پڕ بە سییەکانم هەناسەت هەڵمژم
تاکو نەفەسی ژیانم سەرلەنوێ بۆ بگەڕێتەوە
هاتووم بەرەو ئەو شەتڵگەیەی تۆی تێدا رواویت
تا وەک هەنگێک شیلەی لێوەکانت بنۆشمەوە
هاتووم سۆمای چاوت لە ئەنگوستەچاوێکدا بدزم
تا دیدەی تاریکی رۆحمی پێ رۆشن بکەمەوە
هاتووم لە سپێتیتا خۆم لە گوناه پاک بکەمەوە
تاکو لەنێو برژانگەکانتا دووبارە بڕسکێمەوە
هاتووم بەرەو گوڵستانی چڕ و پڕ جۆشی تۆ
تاکو گوڵی ماچەکانت نەڕنم هەرگیز ناڕۆمەوە
هاتووم لەئاگری ئەوینتا ببمە قەقنەز و خۆڵەمێش
تا رەشەبایەک بەسەر تۆدا پەرش و بڵاوم بکاتەوە
هاتووم قژی ئازارەکانت بە پەنجە شانە بکەم
تا نەمرم هیچ کات لێوم لە لێوەکانت ناکەمەوە
هاتووم بتکەمە قیبلەی هەموو نوێژەکانم
تاکو لەسەر بەرماڵی دامەنت سەربنێمەوە
هاتووم دەستنوێژم بە بارانە فرمێسکت هەڵگرم
تاکو کورەی عەشقم، تەزیویت گەرم بکاتەوە
هاتووم لە پێڵووی چاوەکانتدا ببمە چرایەک
تا حەرف بەحەرف لە شیعرەکانما بتنووسمەوە
هاتووم قورسایی خۆشەویستیت لە کۆڵ بنێم
تاکو لە نێو دەممدا شەکری دەمت بتوێتەوە
هاتووم کۆدی هەموو نهێنییەکانی ژیانم بکەمەوە
تاکو لە بوخچەی نهێنییەکی نوێدا بتشارمەوە
هاتووم رازی نەبیستراوی رۆحم بۆ تۆ بدرکێنم
تا لەحەسرەتی باوەشی پڕ سۆزت سەرنەنێمەوە
هاتووم شەبەقی تەنهاییت بە عەشق پڕ بکەمەوە
تاکو وەک بەفر بەسەر بێزارییەکانتا بتوێمەوە
هاتووم دەلاقەیەک بۆ ماچ و باوەشت بدۆزمەوە
تاکو لەگەڵ خۆری تۆدا هەموو رۆژێ هەڵبێمەوە
هاتووم لەگەڵت بم و بۆ هەمیشە لات بمێنمەوە
تا شەربەتی ماچەکانت بڕژێتە گەرووی تاڵمەوە
هاتووم تێر بە بینایم لە جوانییەکەت بڕوانم
تا قومێ لە پێکەنینی پڕ ئەفسوونت بخۆمەوە
هاتووم لە گۆمی گریانتا بێ سەرو شوێن ببم
تا ببمە بارانی عەشقێک سەرتاپا بتخوسێنمەوە
هاتووم مێژووی سووتانی دڵمت بۆ بگێڕمەوە
تاکو لە باوەشێکتا هەستی بزڕکاوم بژێتەوە
هاتووم ئومێدە وەریوەکانم لە تۆدا بدۆزمەوە
تا بەهیوای رامووسانێک وەک ژیلەمۆ بگەشێمەوە
هاتووم دڵی خۆم بە تاڵی زوڵفت لە سێدارە بدەم
تاکو دوای تۆ وەک بێ دڵێک لە ژیاندا بمێنمەوە
ستۆکهۆڵم – سۆلنا
