یادەوەریی پیاڵەیەکی بەتاڵ.. فەرەیدوون سامان
بەرەبەیانە و ھێشتا پیاڵەکان
وەکوو چاوە شەکەتەکانم بێدارن
من پرچی ئاڵۆزی خەیاڵ و
بەرەبەیانیش پرچی خاوی خۆرەتاو دەھۆنێتەوە،
پیاڵەکان، بە وێنای ھەستەکانم شکاون
نەستم ئاسا پەرش و بڵاون…
دەڵێن لە نێوان ھەڵدان و شکاندندا
ئەو دەستانەی لە ساتەکانی مەستی رازان و رامان
شەوی تاری شەونخونی تەمەنی تاڵ
بە ھێوری ئاوا دەبن
دەست لێکبەرەدەن
.. مات و بێدەنگ
شکستە باڵ
وێنەی مەلی تەریوی نێو قەفەس
گوڵە سپییەکانی یادەوەریمان رەش ھەڵدەگەڕێنن.
گوڵە سپییەکان
چەندە سارد و سڕ و خاون
بێ شنەی ھەناسەی تۆ ھەڵدەوەرێن
مەلی تاراوی شکستەباڵی خەوی منیش
روو لە ئاسمانی تەماوییە
لە نێو ھێلانەی ساردوسڕی بێ ئومێدیەکاندا بەجێماون.
مەلی بەرەبەیان باڵەکانی بێداری خۆی رادەوەشێنێت
بێ ئۆقرە لەو چاوەڕوانییە بێھوودەیە ھەڵپڕووکاوەم
ئاسمان کش و ماتە
نە حەپە حەپی سەگ
نە نووزەی کوکوختییەک
، نە خشەخشی دڵۆپە خووناوێکی سەر گەڵاکان دێت
بەرەبەیانە و ھەموو شتێک بێ چرپەیە
مەگەر کۆستی ئەو چامەیە پڕ کسپەیە
مەلی خەوی چاوی بێداری من نەبێ
باڵەکانی تێکناوە
بۆبێھودەییم دەچریکێنێ،
ئەوە نییە
لە دوورەوە
بۆنی هەناسەت دەکەم
لە دوورەوە
.. تامی ماچەکانت دەکەم
خۆرھەڵات و ھەر چەند دەکەم خەوم نایێ
چاوەڕوانی گەیشتن بە دیداری تۆ
بۆتە مەحال،
رێبوارێکی ونبووم
ناونیشانی تۆش وێستگەیەکی نامۆیە
نازانم ئەو شەفەندەرە بێ ئامانە
رێگایەکی سەخت وقاچاخە
کەنارێکی نائارامە
ئاوازی گۆرانیەکی قەدەغەیە،
من کە ھەنگاوی قوڕسی رۆژگارم
لە بەھاری تەمەندا تێپەڕی
چاوم کز و مووی سەرم سپی
روانینەکانم مات و ماندوو
گۆچانێکی میھرەبانیش نییە دەستم بگرێت
یان ھاودەمێک، ئامێزی تەنیاییم بۆ بکاتەوە،
ئەوە سێبەری منە
… کۆڵان بە کۆڵان بۆت دەگەڕێ
بەو بەرەبەیانە و ھێشتا
ئەستێرە چاوبزەکان نە خەوتوون
تۆش نە ترووسکاییەکم پێدەبەخشیت
نە مشتێک ئاسوودەییم پێدەفرۆشێت
نە پیاڵەیەک شەرابی خەستی خەوێکی قووڵم پێدەنۆشێت،
خۆرھەڵات و مانگیش لەپرخەی خەودایە
سەراپا لە نێو خەوێکی قووڵدا خەوتووە
مەگەر ئەوە منم بوومەتە خەونی رەنگاورەنگی پەپوولەیەکی باڵشکاو
خۆزگەی وەریوی گوڵێکی لە بن پێدا پڵیشاو
لەباوەشی وەرزێکی نائومێدیدا
ئۆقرەم گرتووە
لەسەر پشتی خەمەکانی ئەو گۆچانە پاڵ کەوتووم
بەرەو نامۆیی ئەبەدی سەرھەڵدەگرم
بەربەیانەو مەلی خەوی تاراوی من
شەپۆلێکی خەمێکی تۆراوە
لەسەر کەناری بێدەنگی شار راکشاوە
یاساوڵەکان چەتەی بیابانن
سروودبێژی سرووتی داڕمانی پەرستگای عەشی ئێمەن
بەسەر یادەوەرییەکانی مێژووی خۆیاندا کەوتوون
ئەڤینی پێدەشتی مەحاڵ تەی دەکەن
دوای تۆ
کێو نەما تاشەبەردی خەیاڵی تۆی لێ ھەڵنەکۆڵم
بیابان نەما لە کۆچەکانتدا گەردەلول دامنەپۆشێت
کوچە وکۆڵانەکانی حەسرەت نەما
بۆت نەگەڕێم وەکو شێت
بووم بە میوانی شۆستەکانی سەرگەردانی
بۆ ماچێ گڕبە سەر شەپۆلی گڕکاندا تێپدەپەڕیم
سەرماوسۆڵەی زستان بەرگم بوو
قرچەی گەرمای ھاوین چەترم
ئەڤینت درەختێک بوو
ھەرچەند پەل و پۆ و قەدیان بڕییەوە
رەگی قووڵی لە وەرزێکدا سەرھەڵدایەوە،
دوای تۆ خۆر ھەڵات
نازانم مەلی باڵشکاوی خەوی من
بۆ کوێ ھەڵفڕیوە..
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
