Skip to Content

ئینجانەی بەختم.. شەماڵ بارەوانی

ئینجانەی بەختم.. شەماڵ بارەوانی

Closed
by ته‌مموز 31, 2021 General, Poems

هەموو سپێدەیەک
من و تەنیایی
بەدەم پیاسەی بێزارییەوە
شەقامی خەم تەی دەکەین..

هەموو نیوەڕۆژێک
لەسەر ڕێگەی چاوەڕوانی
ئەلبوومی بیرەوەرییەکان هەڵدەدەینەوە..

هەموو ئێوارەیەک
سەردەکەینە مەیخانەی ئازار و
جامێک مەستی دەنۆشین..

هەموو شەوێک
لەسەر دۆشەگی نیگەرانی
گوێ بۆ ئاوازی دابڕان هەڵدەخەین..

کەی دەگەڕێیتەوەو
لەئینجانەی بەختم بڕوێیت
ئاوێتەی ترپەی هەناسەکانم بیت و
لەئامێزی حەزەکانمدا بتوێیتەوە

لەبێ تۆییدا
مـــن لە
بەهارێکی ڕەنگ زەردو
گۆرانییەکی غەمگین
لە
جەستەیەکی مۆمیاکراو
لەچۆمێکی وشکبوو دەچم

لەدووری تۆ

لە پاڵەوانێکی شکستخواردوو
ئیمپڕاتۆرێکی ڕووخاو
لە
داستانێکی تراژیدیک و
له چامەیەکی بێ شیعر دەکەم

لەنەوەتەیەک دەچم
-زمان
-جوگرافیا
-مێژوو
-کلتوور و
هەموو شتێکی دزرابێ.

Previous
Next
Kurdish