تونێڵی تەنیایی.. شەماڵ بارەوانی
Closed
کەی دێیت
دەیجورەکانی دەروونم
بکوژێنیتەوە
و
سەبەتەی حەزم پڕکەیت لەماچ
کەی دێیت
کراسی ئامێزم
بۆ بدووریت
و
بەپەنجەی سۆزت
ئاگری چاوەڕوانیم خامۆش کەیت
کەی دێیت
گۆپاڵی ناز
بە پشتی چەماوەم
ببەخشیت
و
فرۆشگەی تەمەنم
لێوان لێو کەیت
لە نوقڵی ژیان
کەی دێیت
قومێک هەناسەم بدەیتێ
و
بازنگی بەختەوەری
بخەیتە مەچەکی خەونەکانم
کەی دێیت
پاڵتۆی هەستت
لە سەرتەنافی عاتفەم
هەڵخەیت
و
شەقامی نیگام
سیخناخ کەیت لەدیدار
کەی دێیت
پارچەشکاوەکانی دڵم
کۆبکەیتەوە
و
تونێڵی تەنیاییم
ئاودان کەیتەوە
کەی دێیت
کەزی شیعرەکانم
بهۆنیتەوە
و
بیابانی قەسیدەم
بەبارانی میهرەبانیت
تەڕکەیت
چۆڵەوانیم لەبەر داکەنیت
و
وەرزی ئاوەدانیم لەبەرکەیت
..
