Skip to Content

کۆمیدیای مناڵ بازاڕ.. نەوزاد بەند

کۆمیدیای مناڵ بازاڕ.. نەوزاد بەند

Closed
by January 31, 2022 General, Poems

( )

ــبە سێ چوار خولەک ئەم کۆمیدیایەم نوسی و ڕامکردەوە بۆ ماڵەوە ـــ

ــنەوزاد بەندی ــــ

حەز ناکەم خۆر ئاوابێ و ..ببێ بەشەو ..
حەز ناکەم ڕۆژ بێتەوە و ..تەواو بێ خەو ..
ئەمە عەقڵی مناڵە ..
شوکور بۆخوا
هەموومان مناڵ بووینەوە ..
له کەسایەتی و ڕەسەنایەتی و
مەردایەتیی چووینەوە ..
ڕا ئەکەین بە دوای بتڵێ زەیتا ..
بە دوای تەعین بوونا ..
بە دوای نۆ کیلۆ ئاردا ..
بە خۆبەخشیی فەرمانگاکان شاد و شوکورین ..
لە هەموو کەمتەرخەمی و کولەمەرگییەک ، ئەبوورین ..
وەک مناڵ ڕا ئەکەین بە دوای دەبەیەک نەوتا ..
ئاساییە مانگ بترازێ لە چل و هەفتە بکشێ لە هەشت و حەوتا ..
بتڵێ غاز ڕامانئەکێشێ ..
بە بینینی تەنکەر حاڵمان لێ دێ و
دوای ئەکەوین وەک دەروێشێ ..
لەسەرەی بەنزینی شەش سەد و پەنجاییدا ، چوار سەعات ئەوەستین ..
تەمەنمان لەو شتانەدا ئەڕوا و
بێ دەربەستین ..
هێندەی هەموو کارگەکانی چین و ئەڵمانیامان دا بە ئوتومبیلی کیلۆمەتر سفر و
بە جادە ڕوخاوەکانا ، پۆز لێ ئەدەین ..
شەقاممان هەیە ناوی پۆزە ..
بە هۆی نەشتەرگەری جوانکاریشەوە ،
هەموومان لووتمان یەک تۆزە ..
ئیتر خەریکی چاولێکەرین ..
بەرد بفرۆشە ، بەرد ئەفرۆشن
نێر بدۆشە ، نێر ئەدۆشن ..
حاڵی حازر مۆدێلی خانوو ڕوخاندن و
خانوو دروست کردنەوەی مۆدێرنە ..
شۆڤاژ و سەقفی مەغریبی ..
دەرمانخانە و چێشتخانە ..
لەگەڵ سەروپێخانە ..
نیوەمان بفەوتێ ، نیوەکەی تر خەریکی گارە گار و هێلکە کردنن
وەک دەواجن ..
ئەوانەی باسی شۆڕش و بەرگری ئەکەن ،
سوک و ڕیسوا و بێ ڕەواجن ..
بە جووتێ سمێڵ وباڵایەکی مەتر و هەشتاوە ،
ڕا ئەکەین جۆزەی موەلیدە ڕاست کەینەوە ..ئەم کەلاوە و ئەو کەلاوە ..
دۆعا ئەکەین ئەم مانگەیش وەریگرین ..
گەردنیشیان ئازا ئەکەین ئەگەر پێش وەرگرتن ، بمرین ..
مانگمان لێ ئەکەن بە چل ڕۆژ ،
وەک مناڵ ، بێ دەنگ ،
بە گیرفانی بەتاڵەوە ،
ڕائەکەینەوە بۆ ماڵەوە ..
پارەی چاپیان لێکردووین بە ئاڵتوونی عیار
بیست و چوار ..
وەک مناڵ تەماشای کۆمپانیاکانی بەرپرسان ئەکەین ،
وەک چۆن لە مناڵیدا تەماشای زۆر خۆرییەکانی بۆدسبنسەرمان ئەکرد ..
ملیارەکانیان ئەژمێرین ..
ئەڵێین کۆشکێکی تریشیان کڕی ..
حەز ئەکەین سێڵفییەکیان لەگەڵدا بگرین ..
جەرگی هاوڕێکانمانی پێ ببڕین ..
حەزمان لە دڵتەقاندنی یەکترییە ..
حەزمان لەنانبڕینی یەکترییە ..
تەماشای دەریایەک نەوت و ئاسمانێ غازی سروشتی ئەکەین و ..
ڕائەکەینەوە بۆ ناو چوار دیواری سارد و سڕ ..
لێی هەڵئەنیشین وەک مریشکی کڕ ..
ئەڵێین سەعاتەکەیان بە نیو ملیۆن دۆلارە
ئەڵێین قەمسەڵەکەیان بە شەش هەزار دۆلارە ..
سەیارەکانیان گولە بڕە ..نەک زیزیکە گولەیان تێگرێ ..
نەک پەپولە ئاڕپیجییان بۆ هەڵدا ..
نەک پۆڕێکی خوراو ، نارنجۆکیان پیاکێشێ ..
ئەڵێین بۆینباخەکەیان بە هەزار دۆلارە ..
ئەڵێین کۆشکەکەیان سێسەد ژوورە ..
ئەوەندە ملیار ، نرخی تەیارە ..
ئەوەندە ملیۆن ، نرخی بانیۆ و
مەلەوانگەکانیان ..
ئەوەندە هەزارن ، ژمارەی حیمایەکانیان ..
جا بە سەعاتە سێ هەزاریی و قەمسەڵە پێنج هەزاری و فەلافلە پێنج سەد دینارییەکەمانەوە ،
ڕائەکەینەوە بۆ ماڵەوە ..
دەستئەکەینەوە بە خواردنی ئێکسپایەر و
زاوزێ و یارییە باجێنە ، لە پاڵەوە ..
لەناو داڵانێکی شێدار ..
خۆمان مەڵاس ئەدەین ،
وەک مناڵی بێعار ..
لەو دەڤەرە ، پشیلەیەکی لێ نیە ،
چاوی کوێر نەکرابێ ..
کلکی نەبڕا بێ ..
سەگێکمان لا دەست ناکەوێ ،
قاچی نەشکابێ ..
گوێچکەی نەبڕا بێ ..
گوێدرێژێکمان بەردەست نییە ،
بریندار نەکرابێ ..
بێحورمەتیی پێ نەکرابێ ..
پەڕەسێلکەیەکمان دەستناکەوێ ،
سەد بەردی تێ نەگیرابێ ..
چۆلەکەیەک بۆ خوێی چێشت دەست ناکەوێ ..
ڕیشۆڵەیەک ، سەد جێ قۆچەقانی ،
لە لەشیا نەچێنرابێ ..
درەختێ لق و پۆپی نەسوتێنرا بێ ..نیە ..
ئاخر ئەو گیاندار و درەختانەن ،
تەوژمی کارەبایان ڕاگرتووە ..
گاز و نەوتەکەمانیان بردووە ..
زیکزیکەیەکم بینی ، پەنجا تەنکەر
نەفسا و .. هەزاران مەترەسێ جا ، گازی دابوو بە شانیا و ئەیکرد بەو دیوا ..
بمرێ زیکزیکە ..
بڕوخێ زیکزیکە ..
لە ژوورە تاریکەکان ، مناڵ بەخێو ئەکەین ..
حەزیش لە خاریج و یاپراخی گەڵامێو ئەکەین ..
لە نیوەی فیلمدا ، کارەبامان لێ ئەکوژێننەوە و ..
پێش وەخت خۆمان ئەکەین بە ژێر جێگاوە ،وەک نەخۆش ..
هەر زوو لە بیرمان ئەچێتەوە ،
کە یەکێکمان ئەگیرێ ..یان ئەکوژرێ ،
ئەچینەوە قاوغەکەی خۆمان و
ئەڵێین مستەحەق بوو ،
خۆمان خۆش ..
وەک مناڵ بە پۆل خۆمان ئەدەین بە ئاوا ..
ئیجە و دەریای ناوەڕاست ، بە چوپ ئەبڕین ..یان بە مەلە ..
زۆربەی زۆرمان ئەخنکێین و
بۆ تەلەفزیۆنەکان ئەبین بە هەواڵی به پەلە ..
کە ئەیشپەڕینەوە لەو بەحرانە ،
هیچ ووڵاتێ وەرمانناگرێ ، ڕائەوەستین لەسەرسنوورەکانیان ،
مانگ و ساڵ ، ئاقڵانە ..
بەڕاستی مناڵگەلێکی عەجولین ..
ئازاکانمان ئەوانەن کە ئەگرین ..
چەندەها مەلای ئازامان هەیە ،
لەسەر مینبەر ئەگرین ..
بە گریانەوە هاوار ئەکەن :
وەڵاهی ماڵ ئەناسم ، مانگێکە گۆشتیان نەخواردووە ..
ماڵ ئەناسم ڕۆژی ژەمێ ئەخۆن ..
ماڵ ئەناسم ئەڵێ مامۆستا پارەی چلورەیەکم پێ نیه بۆ مناڵەکەم ،
دەی خوایە گیان ئەم ناحەقیە هەڵنەگری 😂
مامۆستای مەکتەبیش هەندێکیان ئازان ،
لەبەردەم کامێراکانا ، دەست ئەکەن بە گیرفانیانا ، دوو سەد و پەنجاییەک دەردێنن و
ئەڵێن : قەسەم بەخوا .. وەڵا بیلا تەڵا ، هەر ئەوە شک ئەبەم ..
جا ئەگری ..
دەرچووی زانکۆی ئازایشمان زۆرن ،
بە گریانەوە ئەڵێن : وەڵاهی حەوت ساڵە زانکۆم تەواو کردووە و
بێ ئیش و کار
بێ مار ..بێ مندار ..
دوو جار لە ڕێی یۆنان خنکاوم و ..
خوا نەیکوشتووم ..ئەوانیش تێر و پڕ ئەگرین ..
بەڵام ئەم گریانەیش تا ڕادەیەک ڕێپێدراوە ..لەو ڕادەیە تێپەڕێ ،
هێڵی سووره و مەلاکان دوور ئەخرێنەوە ..یان ئەگیرێن.. یان سودفە و تەسادوف ، ئەکوژرێن ..
مامۆستاکان ، زیاد لە ڕادەی ڕێپێدراو بگرین ،
فەلاقه ئەکرێن ..ئەگیرێن ..یان بە سەرگوزشتەی خۆش خۆش ، سووک ئەکرێن ..
دوای سەعات دوور ،
هەرچی شەقامە ئەگیرێ بە عەرەبانە ..
لووتکەی هەرچی شاخ و گردیش هەیە ،
گیراوە بە کۆشک و ڤێلای شاهانە
یەک جیاوازیمان هەیە لەگەڵ مناڵا ، ئەوەیە درۆ زۆر ئەکەین ..
دەوڵەمەندمان خۆی وا نیشان ئەدا لاتە ..
لاتیشمان وا خۆی دەرئەخا قەپاتە ..

عەمرمان نەمێنێ بۆ ئەم هەموو مناڵە سەر سپیە سمێڵ بابڕە ..
عەمرمان نەمێنێ بۆ ئەم هەموو مناڵە مەمک زلە سمت خڕە ..
جرت و فرتمانە ،
بە ئوتومبیل و پیادە ،
بە ئەنواع نەخشە و خەیاڵەوە ..
شەڕ لەگەڵ یەکتری ئەکەین..
قۆڵی یەکتری ئەبڕین ..
پۆرتی یەکتری ئەشکێنین و
بە بەعزێ پارەی تەبعی دڕاوی حەرامەوە ،
ڕا ئەکەینەوە بۆ ماڵەوە ..
کە ووتیشی : اللە اکبر ..
ڕائەکەین بۆ دەستنوێژ گرتن ..
هەرچی سەگ و سەگبابیمان کردووە ،
لەگەڵ ئاوی دەستنوێژا ،
بە مەچەکمانا دێتە خوار و
پاکدەبینەوە لە پیسی و بۆریی ..
بەو جۆرە ئەیبەینەوە
بەهەشت و حەفتا حۆری ..
چەن جوانە میللەتێ هەمووی مناڵە و
زاوزێیش ئەکەن ..
چەن جوانە میللەتێ هەموو مەلۆتکەن و
کەچی ڕێیش ئەکەن ..
مناڵی بێ دایبی ..
ئاودەستخانە گشتییەکانیان وێران کرد ..
مناڵی بێ عار ..
تا بەنزین گرانتر بێ ، ئوتومبیل زیاتر لێ ئەخوڕێ ..
تا ئارد و ڕۆن گرانتر بن ، زیاتر ئەخۆن ..
تا هەژار و ڕیسواتر بن ،
زیاتر دوو گیان ئەبن و ..
بە هەلهەلە و گریانەوە ..
بە بەنج و سیزریانەوە ،
خەستەخانەی ئەهلی جمەی دێ ..
ویس چەن جوانە ئەم میللەتە ..
ئەم عیللەتە .

Previous
Next