کورتە چیرۆک/ ئەو کاتەی هەستمکرد پیرم… رەسووڵ بەختیار

رۆژانە سواری پاس دەبووم، هەردەم لەنزیک شۆفێرەکە دادەنیشتم، بەو پیەی، لەنزیکترێن وێیتگەی گەڕەکی زەیتوون بووم، هیچ کات خۆم بەپیر نەزانیووە، هەردەم وام دەزانی لەهەمووان گەنجترم، گەڕەکەی ئێمە کەوتۆتە ئەوپەڕی شار، یان راستر بڵێم، لەو شارە نوێیانەن بەم دوایە دروستکراون، تەنیا چەند قوتابییەی ناوەندی لەپێش من سواری پاسەکە دەبوون، ئەوان تەمەنیان لەدوانرە تا پانزدە ساڵی دەبوو، هەمووشیان عەرەب بوون، زۆر وەڕس دەبووم، کاتێک بەدەنگی گەورە، لەگەڵ یەکتردا دەدوان، رۆژێک زۆر بێزار بووم، پێمگوتن، ئێوە نازانن بەهێمنی قسە بکەن، ئەوە پاسە و گشتییە، خۆ بۆ ئێوە دانەنیشتووین، گوێمان لەهەرا و هۆسەی ئێوە بێ، یەکێکیان بەکوردییەکی نیوە عەرەبی و بەسەردەخەنەیەکەوە گوتی: عەمۆ، ئێمە خەڵک، صحرا، رومادی، سەوتمان گەورە، لا تزعل، ئەتوو توڕە نابی.
لەچەندین،.
هەڵوێستی دیکە، زۆر زوو بێزار دەبووم، لەگفتوگۆی نێو پاس، گلەیی ئەو دایکانەی، کە منداڵەکانیان بۆ قوتابخانە دەبرد،.
زۆر جار بە ئاماژە بەشوفێری پاسەکەم رادەگەیاند :
دەتەوێ هەموو خەڵکی گەڕەکی فەرمانبەران و شارەوانی و نەود و چوار سواری پاسەکە بکەیت.
شوفێرەکەش هەر زوو تێدەگەیشت: مامۆستا ناکرێ کەس جێبێڵین، هەموو ئەوانەی جێمانهێشتوون، دواتر شکایەت دەکەنو دەڵێن پاسی ژمارە ئەوەندە جێیهێشتووین، بابگەینە لای چاودێری پاسەکان، ئەوجا دەزانی، راستدەکەم یان نا.
زۆر زوو زوو تووشی گفتوگۆی لابەلا دەبم، بەڵام ئەم بەیانییە بڕیارمدا، نە قسە و ئاماژە بکەم، خوانەخواستە رۆژێک تووشی شەڕێکی لابەلابم، نەوەک وەک سایتە سێبەرەکان و هەندێک بابەتی ناوفەسبووک، قسەی ناشرینم پێ بگوترێ، دواتر ببمە بێێشتە خۆشەی لاپەڕە درۆزنەکان.
ئەو بەیانییە، کاتێک لەگەڕەکەکەمان دەستم بۆ پاس راگرت، دوای وەستانی پاسەکە، کە ویستم لەسەر کورسییەک دانیشم، بینیم،هەموو کورسییەکان گیراوە، وەک ئەوەی لەدوا وێستگە بێمە ناو پاسەکەوە، جێی کەسی لێ نەمابوو، لەو کاتەدا دەستم بەسەقفی پاسەکە گرت، نەوەک بەرببمەوە، یەکێک لەو گەنجانەی پێشتر باسمکرد، گوتی: مامە وەرە لێرە دانیشە،
دەزانم ئەو رێزی لێنام، بەڵام زۆرم پێناخۆش بوو، چونکە هەستم کرد پیر بوومە، پێش ئەوەی دانیشم، لەهەر جوولەیەکی پاسەکە بەملاو بەولادا دەجولام، هەستمکرد وەک جاران ناتوانم دەستم بەلایەک و کورسی و سەڤفی پاسەکە خۆم راگرم.

رەسووڵ بەختیار

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.