چه‌ند قه‌سیده‌یه‌كی خۆشه‌ویستی بۆ خیومار… ئه‌نتۆنیۆ ماچادۆ*.. و: نه‌ژاد عزیز سورمێ
(1)
نه‌مزانی
ئه‌وه‌ی له ده‌ستته
لیمۆیه‌كی زه‌رده
یا تاڵی هه‌تاوه خیومار !
لێوه‌كانتم له تاڵه زێڕینه‌كاندا بینی
زه‌رده‌مسكه ده‌بنه‌وه بۆم ..
لێم پرسی چیم ده‌ده‌یێ
ئه‌و ده‌مه‌ی ده‌سته‌كانت له میوه‌یه‌كی
بێستانی گه‌شاوه‌دا
ده‌یچنن
یا ئێواره وه‌خته ئارامه بۆشه‌كان؟
یا ون بوونی زێڕین ؟
یان ڕه‌نگه وێنه‌یه‌ك بێ
له ئاوێكی وه‌ستاودا ؟
یاخود به سووتانی چیایه‌ك بۆ ئه‌وی دی
زه‌رده ده‌په‌ڕێ ؟
ئایا خۆشه‌ویستی
تاڵی خۆرئاوا
له ئاوێنه ڕه‌نگ په‌ڕیوه‌كاندا ده‌شكێنێ ؟
(2)
خه‌ونم پێوه دیتی خیومار
له باخچه‌كه‌تدا بووی
ڕووبارت به ژێردا ده‌ڕۆیشتن
تۆ له‌و باخچه‌یه‌تدا بووی
كه ڕۆژگارێكه
به تامانی ئاسنینی سارده‌وه
ده‌وره دراوه ..
چۆله‌كه‌یه‌كم بینی ته‌نیا
به نه‌رمی بهسهر دره‌ختی (ئالمیس)ـه‌وه
له ده‌م ڕووباری پیرۆزه‌وه
كه سه‌رچاوه و تینوویه‌تی تیا
له تینوویه‌تیان ده‌جریوێنێ ..
له‌و باخچه‌یه‌دا خیومار
باخێكی دی له یه‌كگرتنی دڵه‌كانمان
له‌دایك ده‌بێ ..
كاتمان
له ناو یه‌كتردا ده‌توێنه‌وه و
پێكه‌وه هێشووی خه‌ون
له قه‌ده‌حی بێگه‌ردماندا
ده‌گووشین
ئیتر چیرۆكی دووانه‌مان له‌بیر ده‌كه‌ین
یه‌كه‌میان
( له‌باره‌ی پیاو و ژنێك
كه وه‌ك ئاسك و شێر وان
هاتوون پێكه‌وه بخۆنه‌وه
ئه‌وی دی ده‌ڵێ :
خۆشه‌ویستی به‌ختیاوه‌ر نییه
دوو ته‌نیاییه له ته‌نیاییه‌كدا )
شاعیره‌كه بیرت لێ ده‌كاته‌وه خیومار !
ماوه‌ی به‌ینیشمان
له لیمۆ و وه‌نه‌وشه‌یه
كێڵگه‌كان هێشتا كه‌سكن
وه‌ره له‌گه‌ڵم خیومار !
چیا له هێللانه‌وه به‌ره‌و لێڕی داربه‌ڕوان
قووتمان ده‌دا ..
ڕۆژ له ڕۆیشتنیدا ماندوو ده‌بێ
شه‌مه‌نده‌فه‌ری ئێمه‌ش ده‌ڕوا
بێده‌نگی له‌گه‌ڵ ڕۆژدا هه‌ڵده‌لووشێ و
ڕیتم به‌ره‌و سێبه‌ر ده‌بزوێ و
( خوادامارا)یش
ڕه‌نگی زێڕینی بزر ده‌كا
چوون شازاده و عاشقه‌كه‌ی
پێكه‌وه هه‌ڵدێن و
مانگیش هه‌ناسه‌سوار به دوایانه‌وه‌یه ..
شه‌مه‌ننه‌فه‌ر ون ده‌بێ و
له جه‌سته‌ی شاخ دا فیشكه‌ی دێ ..
خاك نه‌زۆك و ئاسمان بڵیند
له پشت چیای گرانێت و
پشت چیای بازڵت
ئه‌وه‌تا ده‌ریای دیماهی نه‌هاتوو
با پێكه‌وه بڕۆین
ئه‌وه ئازادی یه .
(3)
له فارغۆنی شه‌مه‌ننه‌فه‌ره‌كه‌وه بۆت ده‌نووسم
له كاتی ژووانی وه‌همیدا
كه ته‌لان په‌لكه‌زێڕینه له بادا ده‌شكێنێ و
خه‌میشی بهسهر پشتی چیاوه ده‌قڵیشێ ..
خۆر و زه‌نگه‌كان له قولله كۆنه‌كانیانن
ئای له‌و بانگی شێوانه هێمن و بژوێنه
ئای له‌و ئێواره منداڵانه‌یه‌ی
شاعیره‌كه‌ت خۆشی ویست
ئای له‌و ڕۆژه … ڕۆژی گه‌نجی
كاتێ جه‌سته‌یه‌ك بووم
له ڕه‌نگی گوڵ له كه‌ناردا .
• ئه‌نتۆنیۆ ماچادۆ ، شاعیری ئیسپانیایی 1875 له ئه‌شبیلیا
له دایك بووه ، 1903 یه‌كه‌م كۆشیعری بڵاو كردووه‌ته‌وه
كه به قه‌ڵه‌مبازێك له شیعری ئیسپانیایی له قه‌ڵه‌م درا .
له 1898 كۆشیعری دووه‌می له ئه‌نده‌لووس بڵاو ده‌كاته‌وه
ده‌گووترێ به شاعیرانی ئه‌ندلووسه‌وه كاریگه‌ر بووه ، هه‌روه‌ها به
( ئیبنی عه‌ره‌بی) و هه‌ندێ له شاعیرانی عه‌ره‌ب له‌وانه ( عه‌بدولوه‌هاب به‌یاتی)
(** ) ئه‌م قه‌سیده‌یه‌ی ماچادۆ له ماڵپه‌ڕی ( دیوان العرب)ـه‌وه كراوه به كوردی
بڕوانه :
